30 މެއި 2023 - 12:56
ރާއްޖެއިން ސީމަނުން ޓްރާންސްޕޯޓުން ދޭން ޖެހޭ އައިޑެންޓީޓީ ޑޮކިއުމެންޓް، (އެސްއައިޑީ) ދޫނުކުރާތީ، ބައެއް ގައުމުތަކަށް ރާއްޖޭގެ ސީމަނުންނަށް ނުވަދެވޭ ކަމަށް ރާއްޖޭގެ ސީމަނުންގެ އޭޖެންޓު، އޭޝިއާ މެނޭޖްމެންޓުން ބުނެފި އެވެ.
އިންޓަނޭޝަނަލް މެރިޓައިމް އޯގަނައިޒޭޝަން (އައިއެމްއޯ) ގެ ވައިޓް ލިސްޓުގައި ރާއްޖެ 2015 ވަނަ އަހަރުގައި ހިމެނުނު ކަމަށެވެ. އަދި އިންޓަނޭޝަނަލް ލޭބާ އޯގަނައިޒޭޝަން (އައިއެލްއޯ) އާއި މެރިޓައިމް ލޭބާ ކޮންވެންޝަން (އެމްއެލްސީ) ކޮންވެންޝަން ވެސް ތަސްދީގުކުރި އެވެ.
އެކަމަކު އޭޝިއާ މެނޭޖްމެންޓްގެ ވެރިޔާ އަހުމަދު ނަސީރު ވިދާޅުވީ އެ މުއާހަދާތަކުގައިވާ ގޮތަށް ޓްރާންސްޕޯޓް މިނިސްޓްރީން ދޫކުރަންޖެހޭ ސީފެއަރާސް އައިޑެންޓިޓީ ޑޮކިއުމެންޓާއި ސީމަންބުކް ހަދަނީ އެހެން ޕޯޓުތަކުން ބަލައިގަންނަ ވަރަށް ވުރެ ފެންވަރު ދަށްކޮށް ކަމަށެވެ.
އޭނާ ވިދާޅުވީ، ބްރެޒިލް އާއި އެމެރިކާ ބައްރުގެ ބައެއް ގައުމުތަކުގެ ބަނދަރަށް ރާއްޖޭގެ ސީމަނުންނަށް ނުވަދެވޭ އިރު ކުރިއަށް އޮތްތަނުގައި މެދުއިރުމަތީގެ ބަނދަރުތަކާއި އޭޝިއާ ސަރަހައްދުގެ ބަނދަރުތަކަށް ދިވެހި ސީމަނުންނަށް ނުވަދެވުމުގެ ކަންބޮޑުވުން އެބަ އޮތް ކަމަށެވެ. ސަބަބަކީ އެގައުމުތަކުން ވެސް އައިއެލްއޯ މިންގަނޑަށް ފުރިހަމައަށް ބޯލެމުގެ މަރުހަލާތަކުގައި އުޅޭތީ އެވެ.
އޭނާ ވިދާޅުވީ، މިކަމުގައި ޓްރާންސްޕޯޓު މިނިސްޓްރީއާ އެކު މަޝްވަރާތައް އެތައް ފަހަރަކު ކުރެވިއްޖެ ކަމަށާއި އެކަމަކު ހައްލެއް ނުލިބޭ ކަމަށެވެ.
"ބްރެޒިލްއަކަށް ނުވަދެވޭނެ ދިވެހިންނަށް. އެ މީހުން އެންމެ ގަދައަށް މި ކޮންވެންޝަން ނަގައިގެން މި އުޅެނީ. މަދު ގައުމެއް ފިޔަވައި އެހެން ގައުމުތަކުން މި އުސޫލަށް އަމަލު ކުރޭ،" އޭނާ ވިދާޅުވި އެވެ.
އޭޝިއާ މެނޭޖްމެންޓްގެ ދަށުން 80 ސީމަނުން ތިބި އިރު، އެ ސަރަހައްދުތަކުގެ ގައުމުތަކަށް ދަތުރުކުރަން ބޯޓުތަކުން ދިވެހި ސީމަނުން ނުނަގާ ކަމަށް އޭނާ ވިދާޅުވި އެވެ. އެހެންވެ، ރާއްޖޭގައި ބޯޓު ދަތުރުކުރުމުގެ ދާއިރާ އެއްކޮށް އުވުމުގެ ފުރުސަތު ވެސް އެބަ އޮތް ކަމަށް އޭނާ ވިދާޅުވި އެވެ.
މިކަމާ ގުޅޭ ގޮތުން ޓްރާންސްޕޯޓު މިނިސްޓްރީން ޖަވާބެއް ނުލިބުނެވެ.
އެހެން ނަމަވެސް އެނގިފައިވާ ގޮތުގައި މި މައްސަލަ ހައްލުކޮށް، ޕޯޓުތަކުން ބަލައިގަންނަ ފެންވަރުގެ ޑޮކިއުމެންޓެއް ހެދުމަށް ޓްރާންސްޕޯޓު މިނިސްޓްރީން އަންނަނީ އިމިގްރޭޝަނާ އެކު މަސައްކަތް ކުރަމުންނެވެ.