04 ޖޫން 2023 - 13:45
ސިޔާސީ ޕާޓީތަކަށް ވަންނަން އެދޭ ފޯމުގައި ފުރިހަމަކުރަން ޖެހޭ މައުލޫމާތުތަކުގެ ތެރޭގައި މަންމަގެ ނަން ޖެހުން ލާޒިމްކުރީ އޮޅުވާލައިގެން ޕާޓީތަކަށް ވައްދަން ވަގު ފޯމު ހުށަހަޅާ މީހުންނަށް އުނދަގޫކުރަން ކަމަށް އިލެކްޝަންސް ކޮމިޝަނުން މިއަދު ބުނެފި އެވެ.
ޕާޓީތަކަށް ވަންނަން އެދޭ ފޯމު އިސްލާހުކޮށް، ސިޔާސީ ޕާޓީތަކުގެ ގަވައިދަށް އިސްލާހު ގެނައުމުގެ ގަވައިދު މިދިޔަ ބުދަ ދުވަހު ވަނީ ގެޒެޓްކޮށްފަ އެވެ. މި އިސްލާހު މި ގެނައީ ދަ ޑިމޮކްރެޓްސްގެ ނަމުގައި އާ ސިޔާސީ ޕާޓީއެއް އުފައްދަން މަސައްކަތް ކުރަނިކޮށެވެ.
މިއީ އެ ޕާޓީ އުފައްދަން ދަތިކޮށް ހުރަސްއަޅަން ހިންގާ ކަންކަމުގެ ތެރޭގައި ހިމެނޭ ކަމެއް ކަމަށް އެ ޕާޓީ އުފެއްދުމުގެ ހަރަކާތުގައި އުޅޭ މެމްބަރުން ތުހުމަތުކުރެ އެވެ.
އެކަމަކު އެ އިސްލާހުގައިވާ ގޮތަށް ޑިމޮކްރެޓްސް އިން އަމަލުކުރަން ނުޖެހޭ ކަމަށް އިލެކްޝަންސް ކޮމިޝަނުން ބުންޏެވެ. އެއީ ސިޔާސީ ޕާޓީތަކާ އެކު ބޭއްވެވި މަޝްވަރާ ބައްދަލުވުންތަކުގައި ވާހަކަ ދެކެވި އެއްބަސްވެވިގެން ގެނެވޭ ބަދަލެއް ކަމަށް ވެސް ބުންޏެވެ.
ބައެއް ޕާޓީތަކުން މިހާރު ވެސް ފޯމު ހުށަހަޅަނީ މަންމަގެ ނަން ހިމަނައިގެންނެވެ. އިލެކްޝަންސުން ދިން މައުލޫމާތާ އެއްގޮތަށް ޑިމޮކްރެޓްސް އިން ވެސް ފޯމު ހުށަހެޅީ މަންމަގެ ނަމާ އެކުގަ އެވެ.
ކޮމިޝަންގެ ރައީސް ފުއާދު ތައުފީގް ވިދާޅުވީ ފޯމުތަކުގައި މަންމަގެ ނަން ޖަހަން ނިންމުމަކީ ޕާޓީތަކާ އެކު ވެސް ވާހަކަ ދެކެވި ވަރަށް ކުރީއްސުރެން އަމަލުކުރަން ނިންމާފައި އޮތް ކަމެކެވެ. އެއީ ވަކި ބަޔަކަށް ޓާގެޓްކޮށްގެން ކުރި ކަމެއް ނޫން ކަމަށް އޭނާ ވިދާޅުވި އެވެ.
އޭނާ ވިދާޅުވި ގޮތުގައި ފޯމަށް ގެނައި އިސްލާހު ގެޒެޓްކުރި އިރު މަންމަގެ އައިޑީކާޑު ނަމްބަރު ޖަހަން ޖެހޭ ގޮތަށް އިނީ ކުށަކުންނެވެ. އެކަން އިސްލާހުކޮށްފައި އަލުން ގެޒެޓްކުރާ ގޮތަށް ވަނީ ހަަމަޖައްސައިފަ އެވެ.
"މަންމަގެ އައިޑީކާޑު ނަމްބަރަކީ ޖަހަން ލާޒިމްވާ އެއްޗެއް ނޫން،" އޭނާ ވިދާޅުވި އެވެ.
ފުއާދު ވިދާޅުވި ގޮތުގައި ޕާޓީއަށް ވަންނަން ހުށަހަޅާ ފޯމުގައި މަންމަގެ ނަން ޖަހަން ޖެހުނީ ވެސް އޮޅުވާލައިގެން ޕާޓީތަކަށް ވެއްދުން ހުއްޓުވުމަށް ކުރެވޭނެ ކަންކަން ހޯދިއިރު، އެއް ހައްލަކަށް ފެނުނު ކަމެކެވެ.
"އެކި މީސް މީހުންގެ ނަމުގައި ފޯމު ފުރާތީވެ، މި ގެނައި ބަދަލަކީ ވަރަށް ގިނަ ފޯމުތައް ފުރާއިރު އަސްލު ހުށަހަޅާ މީހާ ނަމަ އެނގޭނެ މަންމަގެ ނަން. އެކަމަކު މިސާލަކަށް އާއިލާގެ މައުލޫމާތު ނޭނގޭ މީހަކު ފޯމެއް ފުރަންޏާ މަންމަގެ ނަން ނޭނގުން ގާތީ، އެހެންވީމަ އިތުރު ކަމެއް ފޯމުގައި މި ހިމެނީ ވަގު ފޯމު ފުރާ މީހުންނަށް އުނދަގޫކޮށްލަން،" ފުއާދު ވިދާޅުވި އެވެ.
ސިޔާސީ ޕާޓީތަކަށް ވަގަށް މީހުން ވެއްދުން ހުއްޓުވުމަށް ފޯމު ހުށަހަޅާ ހިސާބުން އެ މީހަކަށް އެސްއެމްއެސް ފޮނުވަން ވެސް އީސީން ވަނީ ނިންމައިފަ އެވެ. އަދި ވެބްސައިޓުގައި ވެސް ހަތް ދުވަސް ވަންދެން މައުލޫމާތު އާއްމުކުރެ އެވެ.