11 ޖުލައި 2023 - 13:00
ޖަމައިކާގައި ތަމްރީނު ހަދަމުން އަންނަ ރާއްޖޭގެ އުންމީދީ އަންހެން ސްޕްރިންޓަރު މަރިޔަމް ރޫޔާ އަލީ، ޖޫނިއާ 200 މީޓަރު ދުވުމުގެ ގައުމީ ރެކޯޑް މުގުރާލައިފި އެވެ.
ރޫޔާ މި ރެކޯޑް މުގުރާލާފައި ވަނީ އާދިއްތަ ދުވަހު ޖަމައިކާގެ ވެރިރަށް ކިންގްސްޓަންގައި އޮތް ޖެމެއިކާ ނެޝަނަލްސްގައި ވާދަކޮށް، 25.59 ސިކުންތުން ރޭސް ފުރިހަމަ ކޮށްގެންނެވެ.
މީގެ ކުރިން 200 މީޓަރުގެ ޖޫނިއާ ރެކޯޑް އޮތީ އަހްނާ ނިޒާރު އަތުގަ އެވެ. އަހްނާ މި ރެކޯޑް ހެދީ މިދިޔަ އަހަރުގެ އެސޯސިއޭޝަން ޗެމްޕިއަންޝިޕްގައި 25.77 ސިކުންތުން ރޭސް ނިންމައިގެންނެވެ.
ބޭންކް އޮފް މޯލްޑިވްސް (ބީއެމްއެލް) ގެ ސްކޮލާޝިޕްގެ ދަށުން ލިބުނު ފުރުސަތެއްގައި ރޫޔާ ޖަމައިކާގައި ތަމްރީނު ހަދަމުން އަންނަނީ ދުނިޔޭގެ ލެޖެންޑަރީ ސްޕްރިންޓަރު އުސެއިން ބޯލްޓް ތަމްރީނު ކުރި ޖެމެއިކާގެ ރޭސާސް ޓްރެކް ކްލަބުގަ އެވެ.
ރޫޔާ ވަނީ އޭޕްރީލް މަހު، ޖަމައިކާގައި އޮތް "ވެލޯސިޓީ ފެސްޓް"ގައި ވާދަކޮށް، 22 އަހަރުވީ ޖޫނިއާ 100 މީޓަރު ދުވުމުގެ ގައުމީ ރެކޯޑް މުގުރާލައިފަ އެވެ.
އެތުލެޓިކްސްގައި ރޫޔާ ވާދަކުރަން ފެށީ 2013 ވަނަ އަހަރު ޖަމާލުއްދީން ސްކޫލުގައި އުޅެމުންނެވެ. އޭނާ ވަނީ ވިލާ އިންޓަނޭޝަނަލް ހައި ސްކޫލުގެ ފަރާތުން ބައިވެރިވެ މިދިޔަ އަހަރު ގދ. ތިނަގޫގައި އޮތް މަކިޓާ ޖޫނިއާ ޗެމްޕިއަންޝިޕްގައި 19 އަހަރުން ދަށުގެ އެންމެ މޮޅު އަންހެން އެތުލީޓުގެ މަގާމު ހޯދައިފަ އެވެ. އަދި އޭގެ ފަހުން ރާއްޖޭގައި ބޭއްވި ގްރޯން ޕްރީގެ އެންމެ މޮޅު އަންހެން އެތުލީޓަކީ ވެސް އޭނާ އެވެ.
ބައިނަލްއަގުވާމީ މުބާރާތެއްގައި ރޫޔާ އެންމެ ފުރަތަމަ ރާއްޖެ ތަމްސީލު ކުރީ މިދިޔަ އަހަރުގެ އޮގަސްޓް މަހު އިނގިރޭސި ވިލާތުގެ ބާމިންހަމް ގައި އޮތް ކޮމަންވެލްތު ގޭމްސް އެވެ. އޭގެ ފަހުން އޮކްޓޫބަރު މަހު ކުވޭތުގައި އޮތް އޭޝިއާގެ 18 އަހަރުން ދަށުގެ ޔޫތު މުބާރާތުގައި ވެސް ވާދަ ކުރި އެވެ.
މީގެ އިތުރުން ރޫޔާ ވަނީ ފެބްރުއަރީ މަހު ކަޒަކިސްތާނުގައި އޮތް 10 ވަނަ އޭޝިއަން އިންޑޯ އެތުލެޓިކްސް ޗެމްޕިއަންޝިޕުގައި ރާއްޖެ ތަމްސީލު ކޮށްފަ އެވެ. އެ މުބާރާތުގައި ރޫޔާ ވަނީ 60 މީޓަރު ދުވުމުގައި ވާދަކޮށް އަހުނާ ނިޒާރު ގައުމީ ރެކޯޑު މުގުރާލިތާ ހަތް މިނެޓު ފަހުން އޮތް ހީޓުގައި ވާދަކޮށް އަހުނާގެ އެ ރެކޯޑު މުގުރާލާފަ އެވެ. ރޫޔާ 7.66 ސިކުންތުން ރޭސް ނިންމި އިރު އަހުނާ ރޭސް ނިންމީ 7.89 ސިކުންތުންނެވެ.