31 ޖުލައި 2023 - 14:53
ސިޔާސީ މަސްރަހު އޮތްގޮތުން ރިޔާސީ އިންތިހާބުގައި ވާދަކުރާނީ ޕީޕީއެމާއި އެމްޑީޕީ ކަމަށާއި އެހެން ޕާޓީތަކަށް ތާއިދު އޮތް ތަނެއް ނުފެންނަ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބުގެ ކެމްޕެއިނަށް، ށ. ފުނަދުއަށް ވަޑައިގެން، އެމްޑީޕީގެ ކެންޑިޑޭޓް ވިދާޅުވީ ވޯޓުލާއިރު ވާދަވެރިންނަކީ ކޮބައިތޯ ބަލަންޖެހޭ ކަމަށެވެ. ދެތިން ކެންޑިޑޭޓެއްގެ ވާހަކަ އަޑުއިވޭ ކަމަށާއި ނަމަވެސް، ސިޔާސީ މަސްރަހު އޮތްގޮތުން ވާދަކުރާނީ މި ކޯލިޝަންގެ މައި ޕާޓީ، އެމްޑީޕީ އަދި ޕީޕީއެމާ ކަމަށް އެ މަނިކުފާނު ވިދާޅުވި އެވެ.
ރައީސް ވިދާޅުވީ އެހެން ބަޔަކަށް އެ ބުނާ ވަރުގެ ތާއިދު އޮތް ތަނެއް ފެންނަން ނެތް ކަމަށެވެ.
"ތި ބޭފުޅުން ނިންމަންވީ 2018 ގެ ކުރީގައި އޮތް ހާލަތަށް އަޅުގަނޑުމެން އެނބުރި ދާނީތޯ ނުވަތަ ފެށިފައިވާ ތަރައްގީގެ މަޝްރޫއުތަކާއެކު، މި ރަށް ވެސް ހިމެނޭ ގޮތަށް، މި އަތޮޅު ވެސް ހިމެނޭ ގޮތަށް އެ މަޝްރޫއުތަކާއެކީގައި ކުރިއަށް ދާނީތޯ." އެ މަނިކުފާނު ވިދާޅުވި އެވެ.
ރައީސް ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި ކުރިމަތިލާން ޖެހުނު ދަތި އުނދަގުލާއި އުފުލަން ޖެހުނު ހާލަތު ހަނދާނުގައި ބަހައްޓަންޖެހޭނެ ކަމަށެވެ.
"އެހެންވެ، 9 ސެޕްޓެމްބަރުގައި ތި ބޭފުޅުން ނިންމަވާ ނިންމެވުން އެއީ ރާއްޖޭގެ މުސްތަގުބަލާ ވަރަށް ބޮޑަށް ގުޅިފައިވާ ކަމެއް. ތަރައްގީއާއެކީ ކުރިއަށް ދާނީތޯ ނޫނީ އެ އަނިޔާވެރިކަމާއި ބިރުވެރިކަމުގެ ތެރެއަށް އަޅުގަނޑުމެން ދާނީތޯ." އެ މަނިކުފާނު ވިދާޅުވި އެވެ.
ރައީސް ވިދާޅުވީ 2018 ގެ ރިޔާސީ އިންތިހާބަށްފަހު މަސައްކަތްކުރީ ރައްޔިތުންނަށް ބޭނުންވާ އަސާސީ ހިދުމަތްތައް ފޯރުކޮށްދިނުމަށް ކަމަށެވެ. އެއްވެސް ރަށެއް ތަފާތު ނުކޮށް، ހިދުމަތް ދިނުމަކީ މި ސަރުކާރުގެ އެއް އަސާސް ކަމަށް ވެސް ވިދާޅުވި އެވެ.
ތަރައްގީއަށް މި ފަސް އަހަރުގެ ތެރޭގައި ވަރަށް ގިނަ މަޝްރޫއުތައް ހިންގާފައިވާ ކަމަށާއި މި ރަށަށް ވެސް، ކުރީގެ ރިޔާސީ އިންތިހާބުގެ ކެމްޕެއިންގެ ތެރޭގައި ވައުދުވި ބައެއް ކަންތައްތައް ނިންމައި، އަނެއް ބައި ކަންތައްތައް ކުރަމުން އަންނަކަން ފާހަގަކުރެއްވި އެވެ.
މިސްކިތް އެޅުމާއި ފެނުގެ ހިދުމަތާއި ސްކޫލުތައް ދަތިތައް ހައްލުކުރުމަށް 15 ކްލާސްރޫމް އަދި ހޮސްޕިޓަލްގެ ހިދުމަތްތައް ރަނގަޅުކޮށްދިނުމަކީ، 2018 ގައި އޭރުގެ އިދިކޮޅު ކެންޑިޑޭޓުގެ ގޮތުން ރައީސް ވެވަޑައިގެންނެވި ވައުދުކެވެ.
ޔާމީންގެ ވެރިކަމުގައި ޕީއެސްއައިޕީ ބަޖެޓުން ތަރައްގީއަށް 22 ބިލިއަން ރުފިޔާ ހަރަދުކުރިޔަސް، މި ސަރުކާރުގެ ޕީއެސްއައިޕީ ބަޖެޓުން 32 ބިލިއަން ރުފިޔާ ހަރަދުކޮށްފައިވާ ކަމަށް ވިދާޅުވި އެވެ. އޭގެ ތެރޭގައި، 141 ރަށެއްގައި ފެނާއި ނަރުދަމާ ގާއިމްކުރުމަށް 5.6 ބިލިއަން ރުފިޔާ އަދި 150 ރަށެއްގައި އަސާސީ އެހެނިހެން ހިދުމަތްތައް ފޯރުކޮށްދިނުމުގެ މަސައްކަތް ކުރަމުން އަންނަ ކަމަށް ވެސް ވިދާޅުވި އެވެ.
އިތުރު ދައުރަަކަށް އެ މަނިކުފާނު އިންތިހާބުކޮށްފި ނަމަ ބޯހިޔާވަހިކަމުގެ މައްސަލަ ހައްލުކުރުމަށް ރޯހައުސް ނުވަތަ ފްލެޓު އެޅުމަށް މެނިފެސްޓޯގައި ހިމަނާފައިވާ ކަމަށާއި މަސްވެރިންނަށް ބޭނުންވާ އައިސް ވެސް ހެޔޮ އަގެއްގައި މި ރަށުން ލިބޭނެ ގޮތް ހަމަޖައްސައިދޭނެ ކަމަށް ރައީސް ވިދާޅުވި އެވެ.
ހަނިމާދޫ އެއާޕޯޓު އަދި އާރުޓީއެލް ފެރީއާ އެކު ތިލަދުންމައްޗަށް މި އަންނަނީ މި ރަށް ހިމެނޭ މި އަތޮޅާއެކު ތިން އަތޮޅަކަށް އިންގިލާބީ ބޮޑު ބަދަލެއް ކަމަށް ވިދާޅުވެ، އެ ބަދަލާއެކު ކުރިއަށް ވަޑައިގަތުމަށް ރައީސް އެދިވަޑައިގަތެވެ.