15 އޯގަސްޓް 2023 - 09:29
މޯލްޑިވްސް ނޭޝަނަލް ޕާޓީ (އެމްއެންޕީ)ގެ ވެރިކަމެއްގައި ގައުމީ އެއާލައިން މޯލްޑިވިއަން އާއި އެމްޓީސީސީން ދޭ ދަތުރުފަތުރުގެ ހިދުމަތްތައް އެއް ސޮފްޓްވެއާއަކުން ލިިބޭނެ ގޮތް ހަދައި، ބޮޑެތި ލުއިތަކެއް ގެނެސްދޭނެ ކަމަށް އެ ޕާޓީގެ ރިޔާސީ ކެންޑިޑޭޓް މުހައްމަދު ނާޒިމް ރޭ ވިދާޅުވެއްޖެ އެވެ.
ނާޒިމްގެ ރިޔާސީ ކެމްޕެއިނަށް ރޭ ތ. ތިމަރަފުށީގައި ބޭއްވި ޖަލްސާގައި އޭނާ ވިދާޅުވީ ތަރައްގީ އާއި ކުރިއެރުމުގެ ހުރިހާ ކަމެއް ވެސް އެންމެ ބޮޑަށް ގުޅިފައި އޮންނަނީ ދަތުރުފަތުރުގެ ނިޒާމާ ކަމަށެވެ. ރާއްޖޭގެ ދަތުރުފަތުރުގެ ނިޒާމު، ރަނގަޅު ވިއުގައަކުން ގުޅާލައިގެން ނޫނީ ދިވެހިން ބޭނުންވާ ތަރައްގީ ގެނެސް ނުދެވޭނެ ކަމަށް ވެސް އޭނާ ވިދާޅުވި އެވެ.
"އަޅުގަނޑުގެ އެންމެ ފުރަތަމަ ކަމެއްގެ ގޮތުގައި ކުރަން ވިސްނާފައި އޮތީ ދަތުރުފަތުރުގެ ނިޒާމު ރަނގަޅު ވިއުގާއަކުން ގުޅާލުން،" އޭނާ ވިދާޅުވި އެވެ.
ނާޒިމް ވިދާޅުވި ގޮތުގައި، އެކަން ކުރާނީ މޯލްޑިވިއަންގެ ފްލައިޓްތަކާއި އެމްޓީސީސީން ދޭ އާރުޓީއެލް ފެރީގެ ޓިކެޓިންގެ ހިދުމަތް އެއް ސޮފްޓުވެއާއަކުން ލިބޭނެ ގޮތް ހަދައިގެން ކަމަށެވެ. އެ ސޮފްޓްވެއާގެ އެހީގައި އެ މީހަކު ހުރި ތަނަކުން ރާއްޖޭގެ ކޮންމެ ހިސާބަކަށް ވެސް ފަސޭހަ ކަމާ އެކު ދަތުރުކުރެވޭނެ ރޫޓެއް ދައްކައިދޭނެ އެވެ. އަދި އެ ސޮފްޓްވެއާ އިން ޓިކެޓް ވެސް ބުކް ކުރެވޭނެ އެވެ.
"އެ ވިއުގާއިން ގުޅާލީމާ މި ރަށުން ފުރައިގެން ދާ މީހާ، މާލެއަށް ދެވޭ ވަރަށް ސޮފްޓުވެއާގެ ތެރެއިން ބުކިން ހެދޭނެ. އަދި މާލެއިން މި ރަށަށް އަންނަން މީހާއަށް ވެސް،" ތިމަރަފުށީގައި ބޭއްވި ޖަލްސާގައި އޭނާ ވިދާޅުވި އެވެ.
"މޯލްޑިވިއަނުން ޓިކެޓް ގަނެ، މި ރަށަށް ޖައްސައި، އާރުޓީއެލް އިން މި ރަށުން ފުރައިގެން ކަނޑޫދުއަށް ދާން ބޭނުންވާ މީހާއަށް ވެސް ދެވޭނެ. މިއަދު ހާލަތަކީ ކޮބައިތޯ؟ މިއަދު ހާލަތަކީ މި ރަށަށް އާދެވިއްޖެއްޔާ، މި ރަށުން ނުދެވިގެން މިތަނުގައި ތިބެން ޖެހެނީ."
ނާޒިމް ވިދާޅުވި ގޮތުގައި، 2013 ވަނަ އަހަރު ކުރީގެ ރައީސް ޑރ. މުހައްމަދު ވަހީދުގެ ވެރިކަމުގައި ތިމަރަފުށި އެއާޕޯޓް ހުޅުވުމަށް ބޭއްވި ރަސްމިއްޔާތުގައި އޭނާ ވެސް ބައިވެރިވެވަޑައިގެންނެވި އެވެ. އެ އެއާޕޯޓް އަދިވެސް އޮތީ އެތަން ހުޅުވިއިރު ވެސް އޮތް ގޮތަށް އެއްވެސް ކުރިއެރުމެއް ނުލިބި ކަމަށް ވިދާޅުވި އެވެ.
"އެއާޕޯޓް އެ ދުވަހު ހުޅުވިއިރު ވެސް އަޅުގަނޑުމެންނަށް ފެނޭ ރަންވޭގެ އެއްކޮޅުން ގިރަމުން ދިޔަ މަންޒަރު. މިއަދު ވެސް އޮތީ އެ ހާލަތުގައި،" އޭނާ ވިދާޅުވި އެވެ.
ތިމަރަފުށި އެއާޕޯޓްގެ މައްސަލަ ހައްލުކޮށް، އެތަން ތަރައްގީކޮށްދިނުމަށް ނާޒިމް ރޭ ވައުދުވެވަޑައިގެންނެވި އެވެ. އަދި ތ. އަތޮޅަށް ވަރަށް ގިނަ އިތުރު ވައުދުތަކެއް ވެސް އޭނާ ހުށަހެޅުއްވި އެވެ. އޭގެ ތެރޭގައި ހިމެނޭ ބައެއް ކަންކަމަކީ؛
• ތިމަރަފުށީގެ ސިޓީ ހޮޓާގެ މަސައްކަތް ކުރުން.
• ފުރަތަމަ 100 ދުވަހުގެ ތެރޭގައި ފުނައްޑޫ ތަރައްގީކުރުމުގެ އަމަލީ މަސައްކަތް ފެށުން.
• ތިމަރަފުށީގައި ހަދަމުން އަންނަ ފްލެޓްތަކުގެ ކުލި 5،000ރ. އިން 2،000ރ. އަށް ކުޑަކުރުން.
• ތިމަރަފުށީގައި އިސްލާމީ މަރުކަޒެއް ހެދުން
• ކިނބިދު އާއި ވޭމަންޑޫ ގުޅާލައި އެއްފަސްކުރުން.