10 ޖޫން 2016 - 15:50
އަމިއްލަ ގައުމުގައި 1998 ވަނަ އަހަރުގެ ބޭއްވި ވޯލްޑް ކަޕަށް ފްރާންސް ނުކުތް އިރު އެންމެ ބޮޑު އުއްމީދަކީ އަލްޖީރިއާ އަށް އުފަން ޔުވެންޓަސްގެ ތަރި ޒައިނުއްދީން ޒިދާނެވެ. އޭނާ އެ ފަހަރު ފްރާންސްގެ އުއްމީދު ހަގީގަތަކަށް ހަދައިދިނެވެ. އޭގެ 18 އަހަރު ފަހުން އަމިއްލަ ގައުމުގައި ޔޫރަޕިއަން ޗެމްޕިއަންޝިޕުގައި ފްރާންސް ވާދަކުރާއިރު އެންމެ ބޮޑު ހިތްވަރަކީ ޔުވެންޓަސްގެ ޕައުލް ޕޮގްބާ އެވެ. ޒިދާން ފަދައިން ފްރާންސް ދަރިކޮޅަށް ނިސްބަތްނުވާ ޕޮގްބާ އަށް ފްރާންސްގެ އުއްމީދު ހާސިލްކޮށްދެވިދާނެ ހެއްޔެވެ؟
"އޭނާ އަކީ އާދަޔާހިލާފު މޮޅު ކުޅުންތެރިއެއް،" ފްރާންސްގެ ކޯޗު އަދި 1998 ވަނަ އަހަރު ވޯލްޑް ކަޕް ކާމިޔާބުކޮށްދިން ކެޕްޓަން ޑިޑިއާ ޑިޝޯމްޕް ބުންޏެވެ.
އެފްރިކާގެ ގައުމެއް ކަމަށްވާ ގިނީ ދަރިކޮޅަށް ނިސްބަތްވާ ޕޮގްބާއާ މެދު އުއްމީދު ކުރެވެނީ ހަމައެކަނި ޑިޝޯމްޕް ފަދަ ކޯޗުން ދައްކާ ވާހަކަތަކުންނެއް ނޫނެވެ. އޭނާ ވަނީ އެކަން ސާބިތު ވެސް ކޮށްދީފަ އެވެ. އޭނާ ވަނީ 2013 ވަނަ އަހަރު ފީފާ 20 އަހަރުން ދަށުގެ ވޯލްޑް ކަޕް ކެޕްޓަނެއްގެ ގޮތުން ފްރާންސަށް ކާމިޔާބުކޮށްދީފަ އެވެ. މުބާރާތުގެ މޮޅު ކުޅުންތެރިޔާގެ މަގާމް ވެސް ހޯދި އެވެ.
މުޅި ދުނިޔޭގައި މި ވަގުތު ހުރި އެންމެ މޮޅު އެއް ސެންޓްރަލް މިޑްފީލްޑަރަކީ ޔަގީނުން ވެސް ޕޮގްބާ އެވެ. ބޯވައެއް ފަދައިން އޭނާގެ ދެ ފައި ދަނޑު މަތީގައި ފަތުރާލާފައިވާއިރު، ޔުވެންޓަސް އިން މިދިޔަ އަހަރު އިޓާލިއަން ލީގު ކާމިޔާބުކުރުމުގައި ޕޮގްބާގެ ދައުރު ވަރަށް ބޮޑެވެ. ޖިސްމާނީ ގޮތުން ވަރުގަދަ މި ކުޅުންތެރިޔާ އަކީ ދިފާއުގައި އަދި އެޓޭކުގައި ވެސް ބައިވެރިވާ ކުޅުންތެރިއެކެވެ. ފްރާންސް ޓީމުގެ މައިބަދަ އަކީ ޕޮގްބާ އެވެ. އުފެއްދުންތެރިން ފުރުސަތުތައް ތަނަވަސްކުރެ އެވެ. ގޯލް ޖަހަ އެވެ.
"އޭނާ އަކީ ޒުވާން ކުޅުންތެރިއެއް އަދި އޭނާ އަކީ ދަނޑު ބޭރުގައި ވެސް މަގުބޫލު ކުޅުންތެރިއެއް. ޒުވާޏުން ވަރަށް ޝައުގުވެރިވޭ އޭނާ ހެދުން އަޅާގޮތާއި އޭނާގެ އިސްތަށިގަނޑުގެ ސްޓައިލަށް ވެސް،" ޑިޝޯމްޕް ބުންޏެވެ.
ޑިޝޯމްޕާއި ޑޭވިޑް ޓްރެޒެގޭ އަދި މިޝޭލް ޕްލެޓިނީ ފަދައިން ޔުވެންޓަސްގެ ކަޅާއި ހުދުގެ ޖާޒީގައި ޕޮގްބާ ވިދަމުން އައި ނަމަވެސް، މުބާރާތާ އޭނާ ކުރިމަތިލަނީ ވަރުގަދަ އެހެން ހަނގުރާމައެއްގެ ތެރެއިންނެވެ. އޭނާ ގެންދަން ޔޫރަޕުގެ ބޮޑެތި ކްލަބްތަކުން ޔުވެންޓަސް އަށް ދެމުން އަންނަ ޕްރެޝަރުގެ އަސަރު ޕޮގްބާ އަށް ވެސް ކުރާނެ އެވެ.
"އަހަރުން ފެށުނު ފަހުން ދުވާލަކު 20 ފޯންކޯލް އަހަންނަށް އާދޭ ޕޮގްބާ ހޯދަން،" އޭނާގެ އޭޖެންޓް މިނޯ ރައިއޯލާ ބުންޏެވެ.
އޭނާ ގަތުމަށް ބާސެލޯނާ އާއި ޕީއެސްޖީ އާއި މެންޗެސްޓާ ޔުނައިޓެޑާއި މެންޗެސްޓާ ސިޓީ އަދި ރެއާލް މެޑްރިޑް އޮތީ 100 މިލިއަން ޑޮލަރު ހުށަހަޅަން ތައްޔާރަށެވެ. އެއީ ދިވެހި ފައިސާ އިން ބަލާނަމަ 1.5 ބިލިއަން ރުފިޔާ އެވެ.
އެއްބަނޑު އެއްބަފާ ދެބެން ކަމަށްވާ ފްލޮރެންޓިން އަދި މަތިއަސްއާ އެކު ޕެރިހުގެ ރަށްބޭރު އަވަށެއްގައި ކުޑައިރުގެ ދުވަސްތައް ހޭދަކުރި ޕޮގްބާގެ ކުރިއެރުމުގެ އަސްލަކީ ވެސް ދެ ބޭބެއިންނާ އެކު ކުޅެން ފެށުމެވެ.
"މަތިއަސް އާއި އަހަންނާ އެކު އަބަދުވެސް ޕޮގްބާ ކުޅެން ބޭނުންވާނީ. އަހަރެން އަބަދުވެސް ބުނަން އެއް އުމުރެއްގެ ކުދިންނާ އެކު ކުޅެ ވަގުތު ބޭކާރުނުކުރާށޭ. ބައެއް ފަހަރު އަހަރެމެންނާ އެކު ކުޅެން އުޅެމުން ރޮމުން ރޮމުން ދާނެ. އެއީ ޖިސްމާނީ ގޮތުން އަހަރެމެންނަށް ވުރެ ބަލިކަށި ވުމުން،" ގިނީގެ ގައުމީ ޓީމަށް ކުޅޭ ފްލޮރެންޓިން ބުންޏެވެ.
ކުރިއަރަމުން ގޮސް ޕޮގްބާ ވަނީ އުމުރުން 16 އަހަރުގައި، 2009 ވަނަ އަހަރު މެންޗެސްޓާ ޔުނައިޓެޑުން ފުރުސަތު ހޯދައިފަ އެވެ. ޕްރިމިއާ ލީގުގައި 2012 ވަނަ އަހަރު ޔުނައިޓެޑަށް ފުރަތަމަ މެޗު ކުޅެންދިން އިރު އޭނާ އެ ކްލަބް ދޫކޮށް ދިޔައީ އެކަށީގެންވާ ފުރުސަތު ނުދޭ ކަމަށް ބުނެ އެވެ. އެކަމާ ޔުނައިޓެޑުގެ އޭރުގެ ކޯޗު އެލެކްސް ފާގަސަން ވަރަށް ބޮޑަށް ހިތްހަމަނުޖެހުނެވެ. އެކަމަކު އިޓަލީ އަށް ދިއުމަކީ ރަނގަޅު ނިންމުމެއްކަން ޕޮގްބާ ވަނީ ސާބިތުކޮށްދީފަ އެވެ.
ފްރާންސްގެ މަޝްހޫރު ކުޅިވަރު ނޫސް ލެ އެކިއުޕޭ އިން ސިފަކުރާ ގޮތުގައި ޕޮގްބާ އަކީ މީހަކު އެންމެ ހީނުކޮށްފާނެ ގޮތަކަށް ބޯޅަ ގެންއުޅޭ އަދި ގޯލް ޖަހާ ކުޅުންތެރިއެކެވެ. ޒިދާނަކީ ވެސް އެފަދަ ކުޅުންތެރިއެކެވެ. ފްރާންސަށް ފުރަތަމަ ފަހަރަށް ދުނިޔޭގެ ތަށި ޒިދާން ކާމިޔާބުކޮށްދިން ފަދައިން، އަމިއްލަ ފަސްގަނޑުގައި ކުޅެ ޔޫރަޕުގެ ތަށި ފްރާންސަށް ޕޮގްބާ ހޯދައިދޭނެ ކަމަށް ފްރާންސް ސަޕޯޓަރުން ދެކެނީ އެހެންވެ އެވެ.