26 އޯގަސްޓް 2023 - 06:47
މިދިޔަ އަހަރު ނެރުނު އެންމެ ބޮޑު އެއް ސައިފައި ފިލްމު "ޑޫން"ގެ ދެވަނަ ބައި މި އަހަރު ރިލީޒްކުރާ ގޮތަށް ކުރިން އޮތް ނަމަވެސް، އެ ފިލްމު އަންނަ އަހަރަށް ފަސްކޮށްފި އެވެ.
އެ ފިލްމު ސިނަމާތަކުގައި އަޅުވަން ކުރިން ނިންމީ އަންނަ ނޮވެމްބަރު މަހު ތިނެއްގަ އެވެ. އެ ފިލްމު ދެން އަޅުވާނީ އަންނަ އަހަރު މާޗު 24 ގަ އެވެ.
ރިޕޯޓްތައް ބުނި ގޮތުގައި، އެ ފިލްމު ފަސްކުރަން ޖެހުނީ ހޮލީވުޑްގެ "ރައިޓާސް ސްޓްރައިކް" ނުވަތަ ސްކްރީންރައިޓަރުންގެ މުޒާހަރާއާ ގުޅިގެންނެވެ. އެ މުޒާހަރާއާ ގުޅިގެން އެހެން ބައެއް ފިލްމާއި ސީރީޒްތައް ވެސް ގެނެސްދޭ ތާރީހުތައް ވަނީ ފަސްކޮށްފަ އެވެ.
މިދިޔަ އަހަރު ނެރުނު "ޑޫން"ގެ ފުރަތަމަ ބައި ބިނާކޮށްފައިވާ އޭގެ ވާހަކަ ފޮތުގެ ދެބައިކުޅަ އެއްބަޔަށެވެ. ފުރަތަމަ ފިލްމުގައި ލީޑުން ފެނުނު ޓިމޮތީ ޝަލަމޭ އާއި ޒެންޑާޔާ އަދި ރިބެކާ ފާގަސަންގެ އިތުރުން ޖޯޝް ބްރޯލިން އާއި ހަވިއޭ ބާޑެމް އެވެ.
ދެވަނަ ފިލްމުގައި ފްލޮރެންސް ޕަފް އަދި އޯސްޓިން ބަޓްލާ ވެސް މުހިންމު ރޯލަކުން ފެންނާނެ އެވެ.
"ޑޫން"ގެ ފުރަތަމަ ބަޔަށް ބޮކްސް އޮފީހުގައި 400 މިލިއަން ޑޮލަރުގެ އާމްދަނީއެއް ލިބުނެވެ. ކޮވިޑް ތެރޭގައި އެ ފިލްމު އެޅުވިއިރު އެއީ ވަރަށް ރަނގަޅު އާމްދަނީއެކެވެ.