26 އޯގަސްޓް 2023 - 12:32
ބަނގުރާ ގެންގުޅުނު މައްސަލައެއްގައި ޕީއެސްއެމްގެ ކުރީގެ ޑެޕިއުޓީ މެނޭޖިން ޑިރެކްޓަރު އާމިނަތު ޝާޔަން ޝާހިދުގެ ދެމަފިރިން ހައްޔަރުކޮށް، ޝަރުތުތަކަކާ އެކު އިއްޔެ ދޫކޮށްލައިފި އެވެ.
ކްރިމިނަލް ކޯޓުގެ އަމުރުގައިވާ ގޮތުން ޝާޔަން އާއި އޭނާގެ ފިރިމީހާ އަހްމަދު ޝައްމާން ނަޒީރު ހައްޔަރުކުރީ ގަވާއިދާއި ހިލާފަށް ބަނގުރާ ގެންގުޅުނު ކަމުގެ ތުހުމަތުގަ އެވެ.
އެ ދެމަފިރިންގެ ބަންދުގެ މުއްދަތު ޖަހަން އިއްޔެ ކޯޓަށް ގެންދިއުމުން ޝަރުތުކުރުމަށް ފަހު ވަނީ ދޫކޮށްލައިފަ އެވެ. ނަމަވެސް، އެ ޝަރުތާ ގުޅޭ އިތުރު ތަފުސީލެއް އަދި ނޭނގެ އެވެ.
ޝާޔަން ބަންދުން ދޫކޮށްލީ އޭނާ ހުރި ތަނުން ފެނުނު ބަނގުރާ ދަޅުތަކަކީ އޭނާގެ ފިރިމީހާގެ ތަކެތި ކަމަށް ބުނެފައި ވާތީ އާއި އޭނާ އަކީ ކުށުގެ ރެކޯޑް އޮތް މީހަކަށް ނުވާތީ ކަމަށް ކޯޓު އަމުރުގައިވެ އެވެ.
ޝަރުތުކުރުމަށް ފަހު ޝާޔަންގެ ފިރިމީހާ ވެސް ދޫކޮށްލި އިރު، އެތަނުން ފެނުނު ބަނގުރާ ދަޅުތަކަކީ އޭނާގެ ތަކެތި ކަމަށް ކޯޓުގައި އޭނާ އިއުތިރާފުވެފައިވާ ކަމަށް ވެސް އެ އަމުރުގައިވެ އެވެ.
މި މައްސަލާގައި ޝާޔަންގެ ދެމަފިރިންގެ އިތުރުން ހަ މީހަކު ހައްޔަރުކުރި އެވެ. އޭގެ ތެރޭގައި ޝާޔަންގެ ދައްތަ ވެސް ހިމެނެ އެވެ. މަސްތުވާތަކެތި ބޭނުންކުރުމާއި ޓްރެފިކް ކުރި ކަމުގެ ތުހުމަތު ކުރެވޭތީ އޭނާގެ ބަންދަށް ކޯޓުން ވަނީ 10 ދުވަސް ދީފަ އެވެ. ދެން ތިބި މީހުންގެ ބަންދަށް ވެސް 10-15 ދުވަސް ދީފަ އެވެ.
އެނގިފައިވާ ގޮތުގައި، އެ މީހުން ހައްޔަރުކޮށްފައި ވަނީ މާލޭގެ ދެ ތަނެއް ފުލުހުން ރެއިޑްކޮށްގެންނެވެ.