13 ސެޕްޓެމްބަރ 2023 - 12:50
މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ މުވައްޒަފުންނަށް މުސާރައިގެ 50 ޕަސެންޓް އަނެއްކާ ވެސް ޑޮލަރުން ދޭން ނިންމައިފި އެވެ.
ކުންފުނީގެ ބޯޑުން އެގޮތަށް ނިންމާފައިވާ ކަން އެމްއޭސީއެލްގެ މުވައްޒަފުންނަށް މިއަދު ފޮނުވި އިންޓާނަލް މެމޯއެއްގައި ވަނީ އަންގައިފަ އެވެ.
އެ މެމޯގައި ބުނީ ކޮވިޑް-19 އާ ގުޅިގެން މުވައްޒަފުންގެ މުސާރައިގެ 50 ޕަސެންޓް ޑޮލަރުން ދިނުން މެދު ކަނޑާލުމަށް ފަހު، މި މަހުން ފެށިގެން އަނެއްކާވެސް އެ އުސޫލުން މުސާރަ ދޭ ގޮތަށް ހަމަޖައްސާފައިވާ ކަމަށެވެ.
އެމްއޭސީއެލްގެ ޖެނެރަލް މެނޭޖަރު ކޯޕަރޭޓް އެފެއާޒް، ހަސަން އަރީފް ވިދާޅުވީ ބޯޑުން އެގޮތަށް ނިންމީ ކުންފުނީގެ ކޭޝް ފްލޯ މިހާރު ރަނގަޅުވަމުން އަންނާތީ ކަމަށެވެ. އަދި މުސާރައިގެ އެއްބައި ޑޮލަރުން ދޭ ގޮތަށް އިޔާދަކުރުމަށް، ކޮވިޑަށް ފަހު ބޯޑަރު އަލުން ހުޅުވާލި އިރުއްސުރެ ފެށިގެން އެ ކުންފުނިން މަސައްކަތް ކުރަމުން އަންނަ ކަމަށް ވެސް އޭނާ ވިދާޅުވި އެވެ.
ރާއްޖޭގެ މައި ވައިގެބަނދަރު، ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލް އަކީ ސަރުކާރު ކުންފުނިތަކުގެ ތެރެއިން އެންމެ ގިނައިން ޑޮލަރު ވަންނަ އެއް ތަނެވެ. އެ ކުންފުނީގައި 4،000 އެއްހާ މުވައްޒަފުން މަސައްކަތްކުރެ އެވެ.
މިފަހުން އެ ކުންފުނިން ވަނީ ދެ އަހަރުގެ މެދުކެނޑުމަކަށް ފަހު މުވައްޒަފުންނަށް އަހަރީ ބޯނަސް ވެސް ދީފަ އެވެ. ފާއިތުވި ދެ އަހަރުގެ ބޯނަސްގެ ގޮތުގައި ކޮންމެ މުވައްޒަފަކަށް 25،000ރ. ދިނެވެ.