11 އޮކްޓޯބަރ 2023 - 09:18
އިނގިރޭސި ކްލަބް ޗެލްސީގައި ކާމިޔާބު ދުވަސްތަކެއް ހޭދަކުރި އެ ކްލަބްގެ ލެޖެންޑް އެޑެން ހަޒާޑް އުމުރުން 32 އަހަރުގައި ފުޓްބޯޅަ ކުޅުން ހުއްޓާލައިފި އެވެ.
ފުޓްބޯޅަ ކުޅުންތެރިންގެ އެންމެ ޕީކް އުމުރުގައި އޭނާ ކުޅުން ހުއްޓާލީ އަނިޔާގެ ގިނަ މައްސަލަތަކެއް ކުރިމަތިވުމުންނެވެ. ރެއާލް މެޑްރިޑަށް 2019 ގައި 100 މިލިއަން ޑޮލަރަށް ވުރެ ވެސް ބޮޑު އަގެއްގައި ބަދަލުވެ އެ ކްލަބްގައި ތިން އަހަރު ހޭދަ ކުރި އިރު ވެސް ހަޒާޑްގެ ބޭނުން އެ ކްލަބަށް އެއްގޮތަކަށް ވެސް ނުހިފުނެވެ.
ފްރާންސްގެ ލިލް އަށް ވެސް އެ ޓީމާ އެކު ވެސް ތަށިތައް ހޯދި ހަޒާޒް ވަނީ ކްލަބް ފުޓްބޯޅައިގައި ހުރިހާ ކާމިޔާބީއެއް ހޯދައިފަ އެވެ.
"އަމިއްލަ ނަފްސު އެކަމެއް ހުއްޓާލަން ގޮވާލާއިރު އެންމެ ރަނގަޅު ވަގުތުގައި އެކަމެއް ހުއްޓާލަން ޖެހޭނެ. ސޯޅަ އަހަރު ތެރޭ 700 އަށް ވުރެ ގިނަ މެޗު ކުޅުމަށް ފަހު އަހަރެން ޕްރޮފެޝަނަލް ފުޓްބޯޅަ ކެރިއަރު މިހާހިސާބުން ނިންމާލީ،" ނިމިދިޔަ ސީޒަނަށް ފަހު ރެއާލާ އެކު ހަދާފައިވާ އެގްރީމަންޓް ދެފަރާތް އެއްބަސްވެގެން އުވާލި ފަހުން އެހެން ކްލަބަކާ ނުގުޅެ ހުރި ހަޒާޑްގެ ރިޓަޔާމަންޓް ޕޯސްޓުގައި ބުންޏެވެ.
ޗެލްސީގައި ހޭދަކުރި ދުވަސްވަރު އޭނާއަކީ ސަޕޯޓަރުންނަށް އެންމެ ކަމުދިޔަ އެއް ކުޅުންތެރިޔާ އެވެ. އެ ކްލަބާ އެކު އޭނާ ވަނީ ދެ ފަހަރު ޕްރިމިއާ ލީގު ކާމިޔާބު ކުރުމުގެ އިތުރުން އެފްއޭކަޕާއި ލީގް ކަޕް އަދި ދެ ފަހަރު ޔޫރޮޕާ ލީގު ވެސް ކާމިޔާބު ކޮށްފަ އެވެ. ނަމަވެސް ޗެމްޕިއަންސް ލީގު އެ ކްލަބާ އެކު ކާމިޔާބެއް ނުކުރެވުނެވެ. ޗެމްޕިއަންސް ލީގުގެ މެޑަލް ރެއާލް މެޑްރިޑާ އެކު އޭނާ ހޯދީ، އޭނާގެ މާބޮޑު ހިއްސާއެއް ނެތި އެވެ.
ހަޒާޑް ޗެލްސީ ދޫކޮށްލީ އެޓީމަށް ކުޅެދިން 352 މެޗުން 110 ގޯލު ޖަހައިފަ އެވެ. ޗެލްސީގައި އޭނާގެ އެންމެ ފަހު މެޗަކީ 2019 ވަނަ އަހަރު އާސެނަލް ބަލިކުރި ޔޫރޮޕާ ލީގު ފައިނަލެވެ.
ރެއާލްގައި އޭނާ ކުޅުނު 26 މެޗުން ކާމިޔާބު ކުރެވުނީ އެންމެ ހަތް ގޯލެވެ. ނަމަވެސް އެ މުއްދަތުގައި އޭނާ ވަނީ ދެ ފަހަރު ލަ ލީގާ ކާމިޔާބުކޮށް، ކޮޕަ ޑެލް ރޭ އާއި ސްޕެނިޝް ސުޕަ ކަޕްގެ އިތުރުން ޗެމްޕިއަންސް ލީގާއި ޔޫއެފާ ސުޕަ ކަޕް އަދި ފީފާ ކްލަބް ވޯލްޑް ކަޕް ވެސް ކާމިޔާބު ކޮށްފަ އެވެ.
"އަހަރެންގެ ކެރިއަރުގައި މޮޅު ކޯޗުންނާއި ވަރަށް ރަނގަޅު ޓީމްމޭޓުންނާ އެކު ރަނގަޅު ވަގުތުތަކެއް ހޭދަކުރެވުނު، އެ ހުރިހާ އެންމެން މަތިން ވެސް ވަރަށް ހަނދާން ވާނެ. އަހަރެން ކުޅުނު ހުރިހާ ކްލަބެއް، ލިލް އާއި ޗެލްސީ އަދި ރެއާލަށް ޝުކުރު އަދާކުރަން، މީގެ އިތުރުން ބެލްޖިއަމް ގައުމީ ޓީމަށް ކުޅުމުގެ ފުރުސަތު ދިން ކަމަށްޓަކައި ބެލްޖިއަމް ފުޓްބޯޅަ އެސޯސިއޭޝަނަށް ޝުކުރުވެރިވަން،" ހަޒާޑް ބުނެފައި ވެއެވެ.
"ވޭތުވެދިޔަ އަހަރުތަކުގައި އަހަރެންނަށް ސަޕޯޓް ކުރި ހުރިހާ ސަޕޯޓަރުންނަށް ވެސް ވަރަށް ހާއްސަ ޝުކުރެއް އަދާކުރަން، ތިޔަ އެންމެން ވަނީ އަހަރެން ދިޔަ ކޮންމެ ކްލަބެއްގައި ވެސް ހިތްވަރު ދީފައި. މިހާރު މި ވަގުތަކީ އަހަރެންގެ ވޯބިވާ އާއިލާއާ އެކު ތަފާތު އާ ތަޖުރިބާއެއް ކޮށްލަންވީ ވަގުތު."
ހަޒާޑް ވަނީ މިދިޔަ އަހަރު އޮތް ވޯލްޑް ކަޕަށް ފަހު ގައުމީ ޓީމަށް ވެސް ކުޅުން ހުއްޓާލައިފަ އެވެ. ލަކްސެމްބާގާ ދެކޮޅަށް 2008 ވަނަ އަހަރު ފުރަތަމަ މެޗު ކުޅުނު ހަޒާޑް ގައުމީ ޓީމުން ރިޓަޔާ ކުރީ 126 މެޗުން 33 ގޯލު ޖަހައިދީފަ އެވެ. ބެލްޖިއަމް ގައުމީ ޓީމާ އެކު އޭނާ ތިން ވޯލްޑް ކަޕާއި ދެ ޔޫރޯ މުބާރާތުގައި ކުޅުނެވެ.
ބެލްޖިއަމް އިން 2018 ވަނަ އަހަރު ވޯލްޑް ކަޕްގެ ތިންވަނަ ހޯދި މުބާރާތުގައި ތިން ގޯލު ޖެހި އެވެ. އޭގެ ތެރޭގައި ތިންވަނަ ހޮވި މެޗުގައި އިންގްލެންޑް ކޮޅަށް ޖެހި ގޯލު ފާހަގަ ކޮށްލެވެ އެވެ.