01 ޑިސެމްބަރ 2023 - 18:38
އަރަބިއްޔާ ސްކޫލްގެ ޓީޗަރެެއް ކަމަށްވާ ޝައިހް ޒަމްޒަމް ފާރިޝް އެ ސްކޫލްގެ ދަރިވަރުންތަކަކަށް ޖިންސީ ފުރައްސާރަކުރި ކަމަށް ތުހުމަތު ކުރަނީ ފްރޭމް ކުރަން ކަމަށް ވިދާޅުވެ އެ ތުހުމަތުތަކަށް އޭނާ މިއަދު ފާރިޝް އިންކާރު ކުރައްވައިފި އެވެ.
އަރަބިއްޔާ ސްކޫލްގެ ދަރިވަރުންތަކަކަށް ޒަމްޒަމް ފާރިޝް ޖިންސީ ފުރައްސާރަ ކުރި ކަމަށް ބުނެ މައްސަލަ ފުލުހަށް ހުށަހެޅީ އެޑިއުކޭޝަން މިނިސްޓްރީ އާއި ޖެންޑާ މިނިސްޓްރީން މިދިޔަ މަހުގެ އަށް ވަނަ ދުވަހު އެވެ. ފުލުހުން މިއަދު ވަނީ އެ މައްސަލަ ބަލަމުންދާ ކަމަށް ބުނެފަ އެވެ.
އެ ތުހުމަތުތަކާ ގުޅިގެން "މިހާރު" އިން ސުވާލު ކުރުމުން ޒަމްޒަމް ފާރިޝް ވިދާޅުވީ އެ މައްސަލަ ހުށަހެޅިތާ މަހެއްވާން ގާތްވެފައި ވާއިރު ސްކޫލުގެ އިތުރުން އެޑިޔުކޭޝަން މިނިސްޓްރީ ނުވަތަ ޖެންޑާ މިނިސްޓްރީން ވެސް އެ މައްސަލާގައި އޭނާއާ އެއްވެސް ސުވާލެއް ކޮށްފައި ނުވާ ކަމަށެވެ.
"މީޑިއާއިން އަޅުގަނޑަށް ވެސް މި އެނގުނީ. މިހާ ދުވަސްވެފައި ވާ އެކަހަލަ މައްސަލައެއްގައި އެވަރުގެ ތުހުމަތެއް ކުރާއިރު ކޮންމެވެސް އެއްތާކުން އަޅުގަނޑާ ސުވާލު ކުރާނެ ނޫންތޯ؟. އެތައް ކުދިންތަކަކަށް ފުރައްސާރަ ކުރި ކަމަށް ބުނާއިރު އެއްވެސް ތަނަކުން އަޅުގަނޑާ އެއްވެސް ސުވާލެއް ނުކުރޭ. މައްސަލައެއް ހުށަހަޅާފައި އޮތް ކަމަކަށް ވެސް ނާންގާ،" އޭނާ ވިދާޅުވި އެވެ.
ޒަމްޒަމް ވިދާޅުވީ "އިންޑިއާ އައުޓް" މައްސަލައިގައި ވެސް އުޅުނީ ފްރޭމްކުރަން ކަމަށާއި މިހާރު ވެސް ބަޔަކު މަސައްކަތް ކުރަނީ ބަޔަކު އަޑީގައި ތިބެގެން އޭނާ ފްރޭމް ކުރަން ކަމަށެވެ.
"އަޅުގަނޑު މިއީ އެހާ ބަލައިގެން އުޅޭ މީހެއް. އަންހެން ޓީޗަރަކާ ވެސް އަޅުގަނޑު ވާހަކަ ދައްކައި ސަކަރާތް ޖަހައެއް ނޫޅެން. މިއީ ހަމަ ފްރޭމް ކުރުމަށް ބަޔަކު ރާވައިގެން ކުރާ ކަމެއް. މީގެ ކުރިން ވެސް ކުރި،" އޭނާ ވިދާޅުވި އެވެ.
"މިހާރު ވެސް އުޅެނީ ފްރޭމް ކުރަން. މަތީފަޑި ބަދަލުވިޔަސް ތިރި އޮތީ އަދި އޮތީ ހަމަ އޮތް ގޮތަށް."
މިދިޔަ އަހަރު އެ ސްކޫލުގެ މެނޭޖްމެންޓްގެ އިތުރު ދެ މުވައްޒަފަކަށް ވެސް ޖިންސީ ފުރައްސާރައިގެ ތުހުމަތު ކޮށް ސަސްޕެންޑް ކޮށްފައިވާ ކަމަށާއި ނަމަވެސް އެ މީހުންގެ މައްޗަށް އެކަން ސާބިތުނުވެ، އަލުން ވަޒީފާ ދީފައިވާ ކަމަށް އޭނާ ވިދާޅުވި އެވެ.
ޒަމްޒަމް ފާރިޝް އަރަބިއްޔާ ސްކޫލުން ވަކިވާން ނިންމާފައިވާ ވާހަކަތަކާ ގުޅިގެން އޭނާ ވިދާޅުވީ އެހަކަލަ އެއްވެސް ނިންމުމެއް ނިންމާފައި ނުވާ ކަމަށެވެ.
ޒަމްޒަމް ފާރިޝް އަކީ މިދިޔަ ސަރުކާރުގައި، އޭރުގެ ރައީސް އިބްރާހިމް މުހައްމަދު ސޯލިހު ނެރުއްވި ގަރާރަކަށް ފާޑުކިޔުމުގެ ސަބަބުން ވަޒީފާ އިން ސަސްޕެންޑް ވެސް ކުރި ޓީޗަރެކެވެ. އެކަމަކު، މިދިޔަ އަހަރުގެ ތެރޭގައި ވަޒީފާއާ ބެހޭ ޓްރައިބިއުނަލުން ވަނީ އޭނާ ސަސްޕެންޑް ކުރީ ގޯސްކޮށް ކަމަށް ކަނޑައަޅައިފަ އެވެ.
އޭނާ ސަސްޕެންޑް ކުރުމުގެ ކުރިން ވެސް އެފަދަ ކަންކަމުގައި ހާޒިރުކޮށް، ނަސޭހަތްތެރިވެފައިވާ ކަމަށް ވެސް އޭރު އެޑިއުކޭޝަން މިނިސްޓްރީން ބުނެފައި ވެ އެވެ.