09 ފެބުރުއަރީ 2017 - 15:17
ވޮޝިންޓަން (ފެބްރުއަރީ 9) - ސީރިއާގެ އިދްލީބަށް އެމެރިކާ އިން މި މަހު ދިން ވައިގެ ދެ ހަމަލާއެއްގައި އުސާމާ ބިން ލާދިންގެ ވަރަށް ގާތް މީހަކު މަރާލާފައިވާ ކަމަށް ޕެންޓަގަނުން ބުނެފި އެވެ.
ޕެންޓަގަންގެ ތަރުޖަމާން ކެޕްޓަން ޖެފް ޑޭވިސް ވިދާޅުވީ މި މަހު 3 ވަނަ ދުވަހު ދިން ވައިގެ ހަމަލާގައި އަލްގައިދާގެ 10 މީހުން ސީރިއާ އިން މަރާލާފައިވާ ކަމަށެވެ. އަދި 4 ވަނަ ދުވަހު ދިން ހަމަލާގައި މަރާލި އަބޫ ހާނީ އަލް މަސްރީ އަކީ އަލްގައިދާގެ ކުރީގެ ލީޑަރު ބިން ލާދިންގެ ވަރަށް ގާތް މީހެއް ކަމަށް ޑޭވިސް ވިދާޅުވި އެވެ. މަސްރީ އަކީ 1980 އަދި 1990 ގައި އަފްޣާނިސްތާނުގައި ޓްރޭނިން ކޭމްޕްތަކެއް ހިންގި މީހެއް ކަމަށްވެ އެވެ. އަދި އޭނާ އަކީ ބިން ލާދިން 2011 ވަނަ އަހަރު މަރާލުމުން އަލްގައިދާ ޖަމާއަތާ ހަވާލުވެފައިވާ އައްޔުމަން އަލް ޒަވާހިރީއާ ވެސް ގާތް ގުޅުމެއް އޮންނަ މީހެއް ކަމަށް ބައެއް މީހުން ބުނެ އެވެ.
ޑޭވިސް ވިދާޅުވީ މި ބާވަތުގެ ވައިގެ ހަމަލާތަކުގެ ސަބަބުން އެމެރިކާ އާއި ދުނިޔޭގެ އެހެން ގައުމުތަކުގައި ދޭން އަލްގައިދާ އިން ރާވަމުންދާ ހަމަލާތައް ހުއްޓުމަކަށް ގެނެވޭނެ ކަމަށެވެ. ސީރިއާގައި އަލްގައިދާ ހަރަކާތްތެރި ވަނީ ޖަބްހަތު ފާތިހު އަލް ޝާމް ނުވަތަ ކުރީގެ އަލް ނުސްރާ ފްރަންޓް ފަދަ ޖަމާއަތްތައް މެދުވެރިކޮށެވެ.
އެމެރިކާ އިން މިދިޔަ ހަފުތާގައި ވެސް ވަނީ އަލްގައިދާއާ ދެކޮޅަށް ޔަމަނުގައި ވައިގެ ހަމަލާދީފަ އެވެ. މި ހަމަލާގައި ވަނީ އެމެރިކާ ސިފައިންގެ މީހަކާއި އާއްމުންގެ 16 މީހުން މަރުވެފަ އެވެ. މިއީ ރައީސްކަމާ ޑޮނަލްޑް ޓްރަމްޕް ހަވާލުވެވަޑައިގެންނެވި ފަހުން ހިންގި ފުރަތަމަ އަސްކަރީ އޮޕަރޭޝަނެވެ. ޔަމަނަށް ދިން ވައިގެ ހަމަލާ ކާމިޔާބު ކަމަށް އެމެރިކާ ސަރުކާރުން ވަނީ ބުނެފަ އެވެ.