22 ޑިސެމްބަރ 2023 - 16:04
މާފުށީ ޖަލުގައި ގައިދީންތަކެއް ބަނޑުހައިހޫނު ކަމުގެ ހަޅުތާލެއް ހިންގަމުން ދާ ކަމަށް މޯލްޑިވްސް ހިއުމަން ރައިޓްސް އެންޑް ޑިޓެއިނީ ވޮޗް އިން ބުނެފި އެވެ.
އެ ޖަމިއްޔާ އިން މިއަދު ނެރުނު ބަޔާނެއްގައި ބުނިގޮތުގައި ގައިދީން ހަޅުތާލު ކުރަން ފެށީ ޖަލުގެ ޔުނިޓް 10 ގައި ތިބި ފަސް ގައިދީއަކާ މެދު މޯލްޑިވްސް ކަރެކްޝަނަލް ސާވިސް އިން ތަފާތު ކުރަމުންދާ ކަމަށް ބުނެ އެވެ.
އެގޮތުން ގައިދީންނަށް ކަނޑައެޅިފައިވާ ވަގުތުގައި ބޭރަށް ނިކުތުމުގެ ފުރުސަތު ނުދިނުމާއި އުސޫލާ ހިލާފަށް ގައިދީން އެކަހެރިކޮށް ވަކި ގޮޅިތަކެއްގައި ބަންދު ކުރާ ކަމަށް އެ ބަޔާނުގައި ވަނީ ތުހުމަތު ކޮށްފަ އެވެ.
އެ މައްސަލާގައި ގައިދީން ބަނޑުހައި ހޫނު ކަމުގެ ހަޅުތާލު ކުރަމުން އަންނަތާ މިއަދަށް ތިން ދުވަސް ވެފައިވާ ކަމަށް ވެސް އެ ބަޔާނުގައި ބުނެފައިވެ އެވެ.
އެ މައްސަލާގައި "މިހާރު" ން ސުވާލު ކުރުމުން ކަރެކްޝަންސްގެ މީޑިއާ އޮފިޝަލަކު ވިދާޅުވީ ގައިދީންނަށް ޖަލުން ދޭ ކެއުންތައް ނުކެޔަސް، ޖަލުގައި ގައިދީންނަށް ހާއްސަ ކޮށްފައިވާ ފިހާރައިން ވިޔަފާރި އުސޫލުން ކާބޯތަކެތި ގަނެގެން ކަމުންދާ ކަމަށެވެ.
ގައިދީން ފާޅު ކުރަމުންދާ ކަންބޮޑުވުންތައް ހައްލު ކުރަން މަސައްކަތް ކުރަމުން ދާ ކަމަށް އޭނާ ވިދާޅުވި އެވެ.