31 ޑިސެމްބަރ 2023 - 20:28
ރެއިން ފެށިގެން މެދުކެނޑުމެއް ނެތި މާލެ އަށް ވެހޭ ވާރޭގައި ގެއްލުން ލިބުނު ބައެއް ގެތަކަށް ރައީސް ޑރ. މުހައްމަދު މުއިއްޒު ވަޑައިގެން އެ ގޭގޭގެ ހާލަތު ބައްލަވާލައްވައިފި އެވެ.
އެ ގޭގެ އަށް ރައީސް ވަޑައިގަތީ ނައިބު ރައީސް ހުސައިން މުހައްމަދު ލަތީފާއި ޑިފެންސް މިނިސްޓަރު މުހައްމަދު ޣައްސާން މައުމޫނާއި ލޯކަލް ގަވަމެންޓް މިނިސްޓަރު އާދަމް ޝަރީފްގެ އިތުރުން މޯލްޑިވްސް ނެޝަނަލް ޑިޒާސްޓާ މެނޭޖުމަންޓުގެ އިސްބޭފުޅުންނާ އެކުގަ އެވެ.
ރައީސް މުއިއްޒު ވަނީ ވިއްސާރާގައި އެ ގޭގެ އަށް ލިބުނު ގެއްލުންތައް ބައްލަވައިލައްވައިފަ އެވެ. އަދި އެ ގެތަކުގައި ދިރިއުޅޭ މީހުންނާ ވާހަކަފުޅު ދައްކަވައި ސަރުކާރުން އެހީ ފޯރުކޮށްދޭނެ ކަމުގެ ޔަގީން ވެސް ދެއްވި އެވެ.
މި ޒިޔާރަތަށް ފަހު ނޫސްވެރިންނާ ވާހަކަފުޅު ދައްކަވަމުން ރައީސް ވިދާޅުވީ، ސްޓޯމް ވޯޓާ ނިޒާމު އަޕްގްރޭޑު ކުރުމުގެ މަސައްކަތް ކުރަމުން އައި ނަމަވެސް އެކަމުން އެކަށީގެންވާ ހައްލެއް ނުލިބޭ ކަމަށެވެ.
މި ސަރުކާރުގެ އަމާޒަކީ މާލޭގެ ހުރިހާ މަގެއް ހަދައި، މަގުތަކުގެ އަޑީގައި ވަރުގަދަ ސްޓޯމްވޯޓާ ނިޒާމެއް ގާއިމް ކުރުން ކަމަށް އެ މަނިކުފާނު ވިދާޅުވި އެވެ.
"އެހެންވިއްޔާ އިރާދަކުރެއްވިއްޔާ މިފަދަ ސިޗުއޭޝަނެއްގައި ވެސް މިފަދަ މައްސަލަތައް ހައްލު ކުރެވިގެންދާނެ،" ރައީސް މުއިއްޒު ވިދާޅުވި އެވެ.
ރައީސް ވަނީ މާލެ މަގުތަކުގައި ފެން ހިންދުމުގެ މަސައްކަތް ކުރަމުން އަންނަ ސަލާމަތީ ބާރުގެ އޮފިޝަލުންނާ ވެސް ބައްދަލުކުރައްވައިފަ އެވެ.