07 ޖެނުއަރީ 2024 - 10:12
އެމްޑީޕީގައި ގިނަ ދުވަސްތަކެއް ވަންދެން މަސައްކަތް ކުރެއްވި އިނގުރައިދޫ ދާއިރާގެ މެންބަރު ހަސަން އަހުމަދު (ހަސަންޓޭ) ސަރުކާރު ހިންގާ ޕާޓީ ޕީއެންސީ އާ ގުޅިވަޑައިގެންފި އެވެ.
ހަސަންޓޭ މިއަދު ވަނީ ޕީއެންސީ އާ ގުޅިވަޑައިގަތް ފޯމް ރައީސް ޑރ. މުހައްމަދު މުއިއްޒު އާ ހަވާލު ކުރައްވާ ފޮޓޯއެއް "އެކްސް"ގައި ޕޯސްޓު ކުރައްވައިފަ އެވެ. އަދި ވިދާޅުވީ މިއަދުން ފެށިގެން ރައީސް މުއިއްޒަށް ތާއީދު ކުރަން ނިންމާފައިވާ ކަމަށެވެ.
"ތެދުވެރިކަމާއި އިހްލާސްތެރިކަމާއިއެކު ޕީއެންސީ އާއެކު ހުންނާނެ ވާހަކަ ދަންނަވަން،" އޭނާ ވިދާޅުވި އެވެ.
އެމްޑީޕީގެ ކުރީގެ ރައީސް މުހައްމަދު ނަޝީދާ ގާތް ގުޅުމެއް އޮތް ހަސަންޓޭ، އެމްޑީޕީ ދެބައިވުމުން ހުންނެވީ ކުރީގެ ރައީސް އިބްރާހިމް މުހައްމަދު ސޯލިހްގެ ފަޅީގަ އެވެ.
ހަސަންޓޭގެ އިތުރުން ވެސް އެމްޑީޕީގެ ޕާލަމެންޓްރީ ގްރޫޕްގެ ގިނަ މެމްބަރުންތަކެއް މި ފަހުން ވަނީ ޕީއެންސީއާ ގުޅިވަޑައިގެންފަ އެވެ.
އެމްޑީޕީން ޕީއެންސީއާ ގުޅިވަޑައިގަތް 13 މެމްބަރުންނާ އެކު އެއީ މަޖިލީހުގައި މިހާރު މައިނޯރިޓީ ޕާޓީ އެވެ.
1- މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ)
2- ފޭދޫ ދާއިރާގެ މުހައްމަދު ނިހާދު.
3- އިސްދޫ ދާއިރާގެ އަލީ ހަމީދު.
4- ކަނޑިތީމު ދާއިރާގެ އަބްދުﷲ ޝަހީމް އަބްދުލްހަކީމް.
5- ކުރެންދޫ ދާއިރާގެ އަބްދުލް ޣަނީ މުހައްމަދު.
6- މަތިވެރި ދާއިރާގެ ހަސަން ޒަރީރު.
7- މުލަކު ދާއިރާގެ އިބްރާހިމް ނަސީރު.
8- ނިލަންދޫ ދާއިރާގެ އަބްދުލް މުހުސިން ހަމީދު (ޖޭފޯ)
9- މާފަންނު ދެކުނު ދާއިރާގެ އާދަމް އަލީ (އާދަންކޮ)
10- ކޮމަންޑޫ ދާއިރާގެ މުހައްމަދު ރާޝިދު (ރާޑޯ)
11- ތޮއްޑޫ ދާއިރާގެ ހަސަން ޝިޔާން (ގިޓާ)
12- ގުރައިދޫ ދާއިރާގެ އިބްރާހިމް ޝާޒް
13- މައްޗަންގޮޅި ދެކުނު ދާއިރާގެ އަހުމަދު ހައިތަމް
ހަސަންޓޭ ޕީއެންސީ އާ ގުޅިވަޑައިގަތުމުން މަޖިލީހުގައި ތިއްބަވާ އެމްޑީޕީ މެންބަރުންގެ އަދަދު 43 އަކަށް ވެއްޓޭނެ އެވެ. އެހެން ނަމަވެސް މަޖިލީހުގެ މެޖޯރިޓީއެއް އެ ޕާޓީއަކަށް ނުގެއްލެ އެވެ. އަދި މަޖިލީހުގެ މައިނޯރިޓީ ޕާޓީ ޕީއެންސީގައި 16 މެންބަރުން ތިއްބަވާނެ އެވެ.