15 ފެބުރުއަރީ 2017 - 11:29
މާދަމާރޭ ކުޅޭ ގޮތަށް ހަމަޖެހިފައި އޮތް ޗެރިޓީ ޝީލްޑް ފުޓްބޯޅަ މެޗު މާދަމާ ހަވީރު ކުޅޭ ގޮތަށް އެފްއޭއެމުން ބަދަލުކޮށްފި އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް ވިދާޅުވީ ކްލަބް ވެލެންސިއާ އާއި މާޒިޔާގެ މެޗު ހަވީރަށް ބަދަލުކުރީ މާދަމާރޭ ސަރުކާރުގެ ބޮޑު އިވެންޓެއް އޮތުމުން ކަމަށާއި ބޭނުންވަނީ ވީހާ ވެސް ގިނަ ބަޔަކަށް ދަނޑަށް ވަދެވޭނެ ގަޑިއެއްގައި މެޗު ބާއްވަން ކަމަށެވެ.
ކަޕްވިނާސް ކަޕް އުވާލުމަށް ފަހު 2009 ވަނަ އަހަރު އަހަރު ތައާރަފްކުރި ޗެރިޓީ މެޗުގައި މާޒިޔާ ވާދަކުރަނީ މިދިޔަ އަހަރުގެ އުރީދޫ ދިވެހި ޕްރިމިއާ ލީގުގެ ޗެމްޕިއަން ޓީމުގެ ހައިސިއްޔަތުންނެވެ. ކްލަބް ވެލެންސިއާ އަށް ފުރުސަތު ލިބުނީ އެފްއޭ ކަޕް ޗެމްޕިއަން ޓީމުގެ ހައިސިއްޔަތުންނެވެ.
މެޗުން މޮޅުވާ ޓީމަކަށް 100،000ރ. ލިބޭއިރު ކުރިން އޮންނަ އުސޫލުގެ ދަށުން މީގެ ތެރެއިން 20،000ރ. ޗެރިޓީ އަކަށް ހަދިޔާކުރަން ޖެހެ އެވެ. އެކަމަކު މި އަހަރު ގެނައި ބަދަލާ އެކު ހުރިހާ ފައިސާއެއް ހަދިޔާކުރަން ޖެހޭނީ ޗެރިޓީ އަކަށެވެ. މާޒިޔާ މޮޅުވެއްޖެ ނަމަ ފައިސާ ދޭނީ މޯލްޑިވްސް އޯޓިޒަމް އެސޯސިއޭޝަނާއި ކުޑަކުދިންގެ ހިޔާ އަށެވެ. ވެލެންސިއާ އިން އެހީ ދޭނީ ޓައިނީ ހާޓްސް އޮފް މޯލްޑިވްސް އާއި ބިއުޓިފުލް އައިސް ޑައުން ސިންޑްރޯމް އެސޯސިއޭޝަން އޮފް މޯލްޑިވްސް އަށެވެ.
ފާއިތުވި ދެ އަހަރު ޗެރިޓީ ޝީލްޑް އުފުލާލީ މާޒިޔާ އިންނެވެ. އެ ދެ ފަހަރު ވެސް އެ ޓީމު މޮޅުވީ ނިއު ރޭޑިއަންޓާ ވާދަކޮށެވެ. މިއީ ޗެރިޓީ ޝީލްޑް މެޗެއްގައި މާޒިޔާ އާއި ވެލެންސިއާ ބައްދަލުކުރާ ފުރަތަމަ ފަހަރެވެ.