21 ފެބުރުއަރީ 2024 - 06:47
އާދިއްތަ ދުވަހާ ވުޅޭ
އެ ތަށްޓަށް އަހަރެން ބަލައިލި ވަގުތު އަހަންނަށް ފެނުނީ ދައްތަ އަތުގައި އޮތް ދެ ތަނޑިގަނޑެވެ. ވަގުތުން ޒިލޭބީ ކާހިތް ވެސް ކެނޑުނީއެވެ. ދެން އެހެން ދިމާއަކަށް ވެސް އަހަންނަކަށް ނުބެލުނެވެ. ބަލިވެގެން ވާނުވާ ނޭނގިފައިއޮތް އިރު، ތަނޑިތައް ނެގިހެން ހީވުމާއި، ކިނާންގެ ދައްތަ ވިހަވި ވާހަކައާއި، ރަނގަޅުވި ވާހަކައާއި ހުރިހައި ވާހަކައެއް އެއްކޮށްލުމުން އެ ނަންބަރުގެ ޖަވާބު ދިމާކުރަން އަހަންނަށް ވަރަށް ފަސޭހައެވެ. އެއީ އަހަރެންގެ ތަނޑިތަކެވެ. ޝައްކެއް ވެސް ނެތެވެ. އެންމެ ހެއްވާކަމަކީ، އެ ކަން ސިއްރުކުރަން ކިނާން މަސައްކަތް ނުކުރިކަމެވެ.
"ދައްތަ ރަނގަޅުވާން އެންމެ ބޮޑު އެހީވި މީހަކީ އާލިޔާ،" ޒިލޭބީއެއް ނަގަމުން ކިނާން ބުންޏެވެ. "ބޮޑުވާބިއްލޫރިގަނޑެއް ހިފައިގެން ނުކުތަސް މި ވަރު ފަހަރިއެއް ދެން ނުލިބޭނެ އިނގޭ. ތީ ހަމަ އަސްލު ރަނޭ ދައްތާ!"
އޭރު އަހަރެން ސައިތަށި ތުންޖަހަނީއެވެ.
"ގައިމުތާ!" ދައްތަ ވަރަށް އުފާވެފައި ބުންޏެވެ. "ބަލަ އާލިޔާއަކީ ވެސް ރަންގަނޑެކޭ! ދެކުދިން ޒިލޭބީކާން ތިބޭ! އަންނާނަން މި ތަނޑިގަނޑު ނަގައިގެން. މިހާރު ދުޅަގަނޑު އެއްކޮށް ފިލައިފި."
"އެއީ ކީއްކުރަން؟" ކިނާން ވަގުތުން ބުންޏެވެ. "ދެން ތި ބާއްވާ!"
އަހަރެން ވަގުތުން ކޮށިއެރިއެވެ. އަހަރެންގެ ބުރަކަށީގައި ދައްތަ ފިރުމަން ފެށިއެވެ. ކިނާން މުޅީން ވެސް ކަންތައްކުރަނީ އެހެންނެވެ. ޔަގީނުން ވެސް އަހަންނަށް ދެކޮޅަށް އެއްޗެއް ނުބުނެވޭނެ ކަހަލަ ގޮތަށެވެ.
"ދޯ އާލިޔާ!" ކިނާން ބުންޏެވެ. "ދައްތަގެ އަތާ ކިހާ ގުޅޭ؟"
އަހަންނަށް ކުރެވުނުހައި ވެސް ކަމަކީ ދައްތަޔަށް ހިނިތުންވެލުމެވެ. އެދުވަހަކީ، ފަހަކަށް އައިސް އަހަރެން އެންމެ ދެރަވި ދުވަހެވެ. ނިދާ ވަގުތު ޖެހުނު އިރު ވެސް އަހަރެން ހުންނަނީ ފާޑެއްގެ ގޮތެއްވެފައެވެ. ނޭވާކުރުވެފައެވެ. އަހަރެން ހިތަށްއެރިއެވެ. ހިތުތެރެއަށް ފެތިފައިވާ އެ ބިޔަ ފުރޭތައެއް ވަރުގެ ވާހަކަ ހިތުން ނެރެގެން ނޫނީ އަހަންނަކަށް ހަމަނޭވައެއް ނުލެވޭނެއެވެ. އެ ކަން ޖެހޭނީ ކުރާށެވެ. ކިނާން އުޅެނީ އަހަރެން އެ ތަނޑިތައް ދައްތައަށް "ދިނީތީ" އުފަލުންނެވެ. އަހަންނަށް ޝުކުރުއަދާކުރުން ހުއްޓައިނުލައެވެ. އޭނަގެ ބޭނުމަކީ އަހަރެންގެ ހިތް ގަދަކަމުން އެ ގޮތަށް އެ ކަން ގަބޫލުކުރުވުންބާއެވެ؟
"އާލިޔާ ހާދަ ހީވެޔޭ ކަމަކާ ވިސްނާހެން،" ނިދަންއޮވެފައި ކިނާން ބުންޏެވެ. "ރެންޓްކަންތަކާތަ ތި ވިސްނަނީ؟ މި މަހު ހަމަ އަސްލު ވެސް އަހަރެން އަތުގަ.."
"ކިނާން އަޅެ ކީއްވެތަ އަހަރެން ކައިރީ އަހާނުލީ؟" ކިނާން ދެއްކި ވާހަކައަށް ވިސްނައިލުމެއް ނެތި އަހަންނަށް ކުރެވުނީ އަހަރެންގެ ހިތުގައި އޮތް ސުވާލެވެ. "އަހަރެން ހީކުރީ ތަނޑިތައް ގެއްލުނީކަމަށޭ!"
"އެ ކަމާތަ ތި ވިސްނަނީ؟" އެއީ އެއްވެސް ކަމެއް ނޫންކަން ދޭހަވާ ކަހަލަ ރާގެއްގައި ކިނާން ބުންޏެވެ. "އާލިޔާގެ އެއްވެސް އެއްޗެއް، އާލިޔާ ކައިރީގަ ނާހާ އަހަރެން ނަގާނެހެން ހީވޭތަ؟ ތަނޑިތައް ނަގައިގެން ގެންދާށޭ އާލިޔާ އެއްފަހަރު ބުނީމަ، ޔަގީންކުރަން ދެވަނަ ފަހަރަށް ވެސް އެހިން. ހަނދާނެއް ނެތް؟"
އަހަރެން ހަމަ ކުޑަކޮށް ވެސް ހަނދާނެއް ނެތެވެ. ބަލި އެންމެ ބޮޑުވެގެން އުޅުނު އިރު ވާއެއްނުވާއެއް އަހަންނަކަށް ނޭނގެއެވެ. އެނގޭކަމަކީ ކިނާން ދޮގުނަހަދާކަމެވެ. އެ ހިސާބުން އަހަރެންގެ ހިތަށް ފިނިކަން ލިބުނެވެ. ވަރަށް އުފާވިއެވެ. މުދަލާއި ފައިސާއަކީ އައިސްގޮސްވާ އެއްޗެކެވެ. އެ ހިފައިގެން ކަށްވަޅަކަށް ނުދެވޭނެއެވެ. ނުލިބޭނީ ވެސް ތަދީ ވެސް ލޯބިވާ ފިރިއެކެވެ. އެހެން ހިތަށްއަރުވައިލާފައި ހިތްހަމަޖައްސައިލީއެވެ.
އަހަންނާ ދިމާއަށް ބަލަހައްޓައިގެން އެތައް އިރަކު މުޝީރާ އިނެވެ. ހީވާ ކަހަލައެވެ. ދެއްކި އެއްވެސް ވާހަކައެއް މުޝީރާއަކަށް ގަބޫލެއް ނުކުރެވުނެވެ.
"ސީރިޔަސްކޮށޭ މި ބުނީ،" އަހަރެން ބުނީމެވެ. "އަހަރެން އޯކޭދިނީމައޭ ދައްތައަށް ތަނޑިތައް ދިނީ. އަހަރެން ހަނދާންނެތުން އެއީ އަހަރެންގެ މައްސަލައެއް."
އޮފީހުގެ ސައިގަޑީގައި އަހަރުމެން ތިބީ ސައިކޮޓަރީގައެވެ. އެ ތަން އޮތީ ހުސްކޮށެވެ. މުޝީރާގެ މޫނުމަތިން ހީވީ އޭނަ ދައްކަން ހުރި ވާހަކަތައް ފެންފޮދަކާ އެއްކޮށް ދިރުވައިލިހެންނެވެ. ފުރަތަމަ ވެސް ބޭރުކޮށްލީ ފުން ނޭވައެކެވެ.
"އަހަރެންގެ ބޭބީ ބަލިވެގެން ބޯގޮވައިގެން އަހަރެން އުޅުނު އިރު އަހަންނަށް އެހީވި މީހަކީ ތީ،" މުޝީރާ ބުންޏެވެ. "އަށް ހާސް ރުފިޔާއަކީ އަހަންނަށް ވަރަށް ބޮޑު އެއްޗެއް. އަބަދު ވެސް އަހަރެން އެ ކަން ހަނދާންބަހައްޓާނަން. އާލިޔާ ހެޕީވާ ކޮންމެ ގޮތެއް އަހަންނަށް އޯކޭ. ބުނެބަލަ! ކިނާނާ މެރީކޮށްގެން އުޅެން އާލިޔާ ބޭނުންތަ؟ އެ ކަމަށް އަހަރެން ހިތްވަރުދޭންވީތަ ނޫނީ ތެދަށްތަ ވާހަކަދައްކަންވީ؟"
"ހިތްވަރުދީ!" އަހަރެން ބުނީމެވެ. "ކިނާންއަކީ ގޯސްމީހެއް ނޫނޭ!"
"މައްސަލައެއް ނެތް،" މުޝީރާ ގޮނޑީގައި ހަމަޖެހިލަމުން ބުންޏެވެ. "އެކަމަކު އަހަރެން ރުޅިއައިސްފާނެތީ، އަހަރެން ރުއްސަން ކިނާނަކީ ގޯސްމީހެއް ނޫނޭ ނުބުނާތި! އެ ކަން އެންމެ ފުރަތަމަ ގަބޫލުކުރަންޖެހޭ މީހަކީ އާލިޔާ. އާލިޔާ ބޭނުމެއް ނޫން ކިނާން ދެކެ އެކަކު ވެސް ރުޅިއަންނާކަށް. އެއީ ވެސް މައްސަލައެއް ނޫން. ތި ކަހަލަ ބައިވަރު އަންހެނުން އުޅޭ. އާލިޔާއަށްޓަކާ އަހަރެން ވެސް އާލިޔާއަށް ތި ހަނގުރާމަކޮށްދޭނަން. އޯކޭއެއްނު!"
އަހަރެން އުފަލާ އެކުގައި ބޯޖަހައިލީމެވެ. ވެދިޔަ ހުރިހައި ކަމެއް ވަޅުލައިފައި، ފައިން ތަޅައި ފަސްގަނޑު ބާރުކުރުމަށް ފަހު އަހަރެން ހިނގައިގަތީމެވެ. ފައިމަގުގައެވެ. ސައިކަލު ހަދަން ގެންދިޔަ ގޮތަކަށް ސައިކަލެއް ނުއެއް ގެނެއެވެ. އެއް ދުވަސް ވިއެވެ. އެއް ހަފުތާ ވިއެވެ. އަހަރެން އޮފީހުން ނުކެނޑިގެން ކިނާން ޝަކުވާ ނުކުރި ތާނގައި، އަހަރެން އޮފީހަށް ގެންގޮސް ގެނެސްދެނީ ވެސް ކިނާނެވެ. ނުގަޑިއެއްގައި އޮފީހަށް ދާންޖެހުނަސް ކިނާން އެއްވެސް ސުވާލެއް ނުކުރެއެވެ. ބާޒާރުކުރަން ގޮސް ކިތަންމެ އިރަކު ބޭރުގައި މަޑުކުރަން ޖެހުނަސްވެހެވެ. ވީމާ، ސައިކަލު ކޮބައިހޭ އަހާކަށް އަހަންނަކަށް ނުކެރުނެވެ. ކިނާން ދެކެ ބިރަކުން ނޫނެވެ. މީހަކަށް ވިއްކައިލައިފީމޭ ބުނާ އަޑުއަހަން ޖެހިދާނެތީއެވެ. އެހެން ނުބުނާހައި ހިނދަކު ސައިކަލު ގެންނާނެކަމުގެ އުންމީދު ކުރެވޭނެތީއެވެ. އެހެނަސް އަހަރެންގެ ހިތް ބުންޏެވެ. ސައިކަލާ މެދު ދެން އުންމީދުކަނޑައިލާށެވެ. އެޔެއް ދެނެއް ނުލިބޭނެއެވެ. އަހަރެންގެ ހިތް އެ ގޮތް ގަބޫލުކުރީކަމަށް ވެސް ވެދާނެއެވެ.
މުހުސިނާއަކީ މުޝީރާއަށް ފަހު ދެން އަހަންނާ އެންމެ ގާތްކޮށް އުޅޭ އެކުވެރިޔާއެވެ. އޭނަ ވެސް އަމިއްލަ ސައިކަލެއް ގެންގުޅެއެވެ. އޮފީހުގެ ގަރާޖުން މުހުސިނާ ސައިކަލު ނެރިގެން އަންނަ ތަން ބަލަން އަހަންނަށް ހުރެވުނެވެ. ހިތަށްއެރިއެވެ. އަހަރެންގެ ވެސް ސައިކަލެއް ހުންނާނެއެވެ. އެއީ ކިހައި ފަސޭހަވާ ކަމެއްހެއްޔެވެ؟ ކިހައި ބޮޑު މިނިވަންކަމެއް އިހުސާސްކުރެވޭކަމެއްހެއްޔެވެ؟
"ކީއްވެ ބިޓަކަށް ބަލާހެން އަހަންނަށް ތި ބަލަނީ؟" މުހުސިނާ ސަމާސާ ރާގެއްގައި އެހިއެވެ.
"މި ސައިކު ލޯބިކަމުން ސައިކަށް މި ބަލަނީ،" ސައިކަލު ފަހަތަށް އަރަމުން އަހަރެން ބުނީމެވެ. "މަގޭ ފިރި އެބަ ގުޅާ!"
ސައިކަލު ނައްޓައިލިއެވެ. އަހަރެން ފޯނުނެގީމެވެ.
"ކީއް ތި ކޮށްލަނީ؟" ކިނާން އެހިއެވެ.
އެއީ ކިނާން ނުކުރާ ކަހަލަ ސުވާލެކެވެ. އޭނަގެ ރާގު ވެސް ތަފާތެވެ. އަހަރެންގެ ހިތް އަވަސްވިއެވެ. ހިތަށްއެރިއެވެ. އޭނަ އެ އުޅެނީ ކީއްކުރަންބާއެވެ؟
"މީ މޫންޓިޔާ އެއްކޮށް ކޮފީއަކަށް މި ދަނީ،" އަހަރެން ބުނީމެވެ. "ޖޮއިންކުރަން ބޭނުން؟"
"އުހުނ! ދެ ކުދިން ގޮސްލާ!" ވަރަށް ލޯބިން ކިނާން ބުންޏެވެ. "މިރޭ އަހަރުމެން އެބަ ޖެހޭ ކެއުމަކަށް ދާން. އަހަރެން ބިލްދައްކާނީ. ވެލަންޓައަންސްޑޭގަ ހުރިހާ ރައްޓެހިން ބިޓުންނާ އަނބިން ގޮވައިގެން ތަންތަނަށް ދާ އިރު މަ ވެސް ބޭނުން މަގޭ އަންހެނުން ގޮވައިގެން ތަނަކަށް ދާން. ނުވަޔަކަށް ތައްޔާރުވާތި!"
"އޯކޭ!" އަހަރެން ބުނީމެވެ.
އެހެން ބުނެފައި ކިނާން ފޯނުބޭއްވިއެވެ. ރައްޓެހިވެގެން އުޅުނު އިރު ވެސް ނުކުރާ ކަމެއް ކުރަން ކިނާން އުޅެނީ ކީއްވެގެންހެއްޔެވެ؟ ދުރާލައި ރާވައިގެން އެ ގޮތަށް ރެސްޓޯރަންޓަކަށް ދިޔުމަކީ ކިނާނާ އެއްގޮތަކަށް ވެސް ވައްތަރު ކަމެއް ނޫނެވެ. އަހަންނަށް ވީ ބިރަކަށެވެ. އެ ކަމާ ވިސްނަން އިންދައި މުހުސިނާ ވާހަކަދައްކަން ފެށިއެވެ.
"އޭ! ސައިކުގެ ވާހަކަ ބުނީމަ އެބަ އޮތޭ ސުވާލެއް،" މުހުސިނާ ބުންޏެވެ. "ސައިކު ވިކުނީތަ؟"
އަހަރެންގެ މެޔަށް ހީވީ ފެންއެއްޗެއް އޮއްސައިލިހެންނެވެ. އޭރު ސައިކަލުގެ ޚަބަރެއް ނުވާތާ ތިން ހަފުތާ ވަނީއެވެ. ކިނާން ސައިކަލު ވިއްކައިލަފާނެހެން ހީވެފައިއޮތީމައި ދެން އަހަރެން ހެދީ އެ ވަގުތަށް ހެދެން އޮތް އެންމެ މޮޅު ގޮތެވެ.
"ހީވަނީ،" އަހަރެން ބުނީމެވެ. "ކިނާން ތި ކަމާ އުޅެނީ."
"އެ ކަހަލަ ފިރިއެއް އަހަންނަށް ވެސް ހޯދަދީބަލަ!" މުހުސިނާ ބުންޏެވެ. "ސައިކު ވިއްކާލަދީފަ ނުވެސް އެނގިހުއްޓާ އެކައުންޓަށް ލާރިގަނޑު. ކީއްވެ ސައިކު ވިއްކާލީ؟"
ބުނާނެ އެއްޗެއް ނޭނގިފައި އަހަންނަށް އިނދެވުނެވެ. ހިތަށްއެރިއެވެ. ދޮންނަމެޝިނު މީހަކަށް ދިން ދުވަހު އަޅަންވީ ރަނގަޅު ފިޔަވަޅު އަހަންނަށް އެޅުނު ނަމައެވެ. އެކައުންޓުގައި ހުރި ފައިސާތަކާއި، ގެއަށް ގަތް މުދާތައް ހުސްވަނީއެވެ. އަދިވެސް އަހަރެން ހަނުހުންނަންވީހެއްޔެވެ؟ ކިނާނަކީ ހަމަ އެ ވަރުގެ ފިރިއެއްހެއްޔެވެ؟ ބަލިވީމައި އެހީތެރިވުމުން ފިރިއެއްގެ ޒިންމާ ނިމުނީހެއްޔެވެ؟ ސައިކަލަށް ހެދި ގޮތެއް އަހައިލުމަކީ މައްސަލައަކަށް ވެދާނެހެއްޔެވެ؟
"ސައިކުގެ ކޫސަނި މައްސަލަތައް މާ ގިނަވީ." އެ ވަގުތު ހިތަށްއައި ޖަވާބުދީފައި ނިންމައިލީމެވެ.
ރޭގަނޑުގެ ކެއުމަށް ދާން އަހަރެން ތައްޔާރުވީމެވެ. އެހެނަސް އުފަލެއް ނުވެއެވެ. އަހަރެން ހުރީ ބިރުގެންފައެވެ. މި ފަހަރު ލިބޭނީ ކޮން ޚަބަރެއްބާއޭ ހިތަށްއަރާފައެވެ. އަށްގަޑި ބައިވާން އުޅެނިކޮށް ކިނާން ގެއަށް އައެވެ. ރަތްކުލައިގެ ބޮޑު ފިނިފެންމާބޮނޑިއެއް ހިފައިގެންނެވެ. އަނެއްކާ ވެސް އަހަރެންގެ ހިތުގެ ވިންދު އަވަސްވިއެވެ. ދެން ދިނީ، ޓޮމް ފޯޑް ބްލެކް އޯކިޑް ސެންޓުފުޅިއެވެ. ހީވަނީ އަސްލުހެންނެވެ. އެހެން ނަމަ، ޔަގީނުން ވެސް އަގެއް ހެވެއް ނުވާނެއެވެ.
"ކީކޭ ހިތަށްއަރަނީ؟" ވަރަށް ހެވިފައި ކިނާން އެހިއެވެ.
"ކޮން ދިމާއަކަށްބާއޭ މިއަދު އިރުއޮއްސުނީ؟" ސަމާސާ ރާގެއްގައި އަހަރެން ބުނީމެވެ. "އަދި ކިރިޔާ މި އެނގުނީ ކިނާން ކިހާ ލޯބިވާކަން."
"އެނގިއްޖެއްނު ދޯ؟" އަހަރެންގެ ކޮލުގައި ހިފައިލަމުން ކިނާން ބުންޏެވެ. "މިހާރު މިއުޅެނީ އާލިޔާ ކިހާ ލޯބިވޭތޯ ބަލާލަން."
ނުނިމޭ