13 މާޗް 2024 - 07:55
ސައިންސް ފިކްޝަން ފިލްމު "ޑޫން 2" ބޮކްސް އޮފީހުގައި އެ ފިލްމުގެ ފުރަތަމަ ބައިގެ ރިކޯޑް މުގުރާލުމާ ވަރަށް ގާތްވެއްޖެ އެވެ.
ރިޕޯޓްތައް ބުނި ގޮތުގައި، މި މަހު އެކެއްގައި ސިނަމާތަކުގައި ދައްކަން ފެށި "ޑޫން 2" އަށް މިހާތަނަށް ވަނީ 367.5 މިލިއަން ޑޮލަރުގެ އާމްދަނީއެއް ދުނިޔޭގެ ބޮކްސް އޮފީހުގައި ލިބިފަ އެވެ. އަދި 2022 ވަނަ އަހަރު ނެރުނު "ޑޫން 1" އަށް ވަނީ ދުނިޔޭގެ ބޮކްސް އޮފީހުގައި 400 މިލިއަން ޑޮލަރަށް ވުރެ ބޮޑު އާމްދަނީއެއް ލިބިފަ އެވެ.
"ޑޫން 2"ގެ ބަޖެޓަކީ 190 މިލިއަން ޑޮލަރެވެ.
ދުނިޔޭގެ ބޮކްސް އޮފީހުގެ ރިކޯޑް މުގުރާލުމާ ގާތަށް "ޑޫން 2" ގޮސްފައިވާއިރު، މި ފިލްމު މިހާރު ވަނީ އެމެރިކާގެ ބޮކްސް އޮފީހުގައި "ޑޫން 1" ފަހަތަށް ޖައްސާލައިފަ އެވެ. "ޑޫން 1" އަށް އެމެރިކާގެ ބޮކްސް އޮފީހުގައި ލިބިފައި ވަނީ 108 މިލިއަން ޑޮލަރެވެ. އެކަމަކު، "ޑޫން 2" އަށް އެމެރިކާގެ ބޮކްސް އޮފީހުގައި މިހާތަނަށް ވަނީ 157 މިލިއަން ޑޮލަރު ލިބިފަ އެވެ.
ހޮލީވުޑްގެ ޓްރޭޑް އެނަލިސްޓުން ލަފާކުރާ ގޮތުގައި، މަހެއްހާ ދުވަހުގެ ތެރޭގައި މި ފިލްމަށް ދުނިޔޭގެ ބޮކްސް އޮފީހުގައި 700 މިލިއަން ޑޮލަރު ލިބޭނެ އެވެ.
"ޑޫން"ގެ ފުރަތަމަ ބައި ބިނާކޮށްފައިވާ އޭގެ ވާހަކަ ފޮތުގެ ދެބައިކުޅަ އެއްބަޔަށެވެ. ފުރަތަމަ ފިލްމުގައި ލީޑުން ފެނުނު ޓިމޮތީ ޝަލަމޭ، ޒެންޑާޔާ، ރިބެކާ ފާގަސަން، ޖޯޝް ބްރޯލިން އަދި ހަވިއޭ ބާޑެމް އެވެ. ދެވަނަ ފިލްމުގައި ވެސް މި އެކްޓަރުން އުޅެ އެވެ.
ދެވަނަ ފިލްމުގައި ފްލޮރެންސް ޕަފް އަދި އޯސްޓިން ބަޓްލާ ވެސް މުހިންމު ރޯލުތަކުން ފެނެ އެވެ.