12 ޖޫން 2016 - 15:07
ކޮލަމްބޯ (ޖޫން 12) - ތަމަޅަ ޓައިގަރުންނާ އެކު ކުރި ދިގު ހަނގުރާމައިގައި 65،000 މީހުން ގެއްލިފައިވާ ކަމަށް ލަންކާ އިން ފުރަތަމަ ފަހަރަށް އެއްބަސްވެއްޖެ އެވެ.
ލަންކާގެ ރައީސް މައިތުރިޕާލާ ސިރިސޭނާ ވަނީ ހަނގުރާމައިގެ ދުވަސްވަރު ނިގުޅައިގެންފައިވާ އިންސާނީ ހައްގުތަކުގެ މައްސަލަތައް ބަލާ ކުށްވެރިވާ ފަރާތްތަކަށް އަދަބު ދޭނެ ކަމަށް ވިދާޅުވެފަ އެވެ. އިންސާނީ ހައްގުތަކުގެ މައްސަލަތައް ބެލުމަށް ކުރީގެ ރައީސް މަހިންދާ ރާޖަޕަކްސާ ވަނީ ދެކޮޅު ހައްދަވައިފަ އެވެ.
ހަނގުރާމައިގެ ސަބަބުން އެއްފަރާތްވެފައިވާ މީހުން ސުލްހަ ކުރުމަށް އުފައްދާފައިވާ އޮފީހުގެ ވެރިޔާ އަދި ކުރީގެ ރައީސް ޗަންދުރިކާ ކުމާރަތުންގާ ވިދާޅުވީ 1994 ވަނަ އަހަރުން ފެށިގެން އެކި އެކި ކޮމިޝަންތަކުން އެއްކުރި މައުލޫމާތަށް ބަލާއިރު ހަނގުރާމައިގައި 65،000 މީހުން ގެއްލިފައިވާ ކަމަށް ބެލެވޭ ކަމަށެވެ.
ލަންކާގެ އުތުރުގައި ވަކި ސަރުކާރެއް އުފެއްދުމަށް ޓައިގަރުން ހަނގުރާމަ ފެށީ 1983 ވަނަ އަހަރު އެވެ. ރާޖަޕަކްސާގެ ވެރިކަމުގައި ހަނގުރާމަ ނިމުމަކަށް ގެނައީ މެއި، 2009 ގަ އެވެ. އޭގެ ކުރިން މާކްސިސްޓުން ވަނީ 1987-89 އަށް ސަރުކާރު ބަދަލު ކުރުމަށް ހަރަކާތްތަކެއް ހިންގައިފަ އެވެ.
ހަނގުރާމައިގައި އިންސާނީ ހައްގުތައް ގެއްލިފައިވާ މައްސަލަތައް ތަހުގީގު ކުރުމަށް އދ. އިން ފާސްކޮށްފައިވާ ގަރާރު ތަންފީޒުކުރާ މިންވަރާ ބެހޭ ގޮތުން ޖެނީވާގައި މި މަހު ފަހުކޮޅު ބާއްވާ ބައްދަލުވުމުގައި ލަންކާ އިން ޕްރެޒަންޓޭޝަނެއް ދިނުމަށް ވަނީ ހަމަޖެހިފަ އެވެ. ހަނގުރާމައިގައި ގެއްލިފައިވާ މީހުންގެ އާއިލާތަކަށާއި އަނިޔާ ލިބުނު މީހުންނަށް އިންސާފު ހޯދައިދިނުމަށް އދ. އިން ވަނީ ގޮވާލައިފަ އެވެ