06 ޖޫން 2024 - 11:00
ބައިނަލްއަގުވާމީ ހާރިޖީ މައިދާނުގައި އިންޑިއާއިން އަދާކުރަމުން އައި ދައުރު މި ފަހުން ވަނީ މަޑުމަޑުން ފުޅާވާން ފަށައިފަ އެވެ. އޭޝިއާ ސަރަހައްދުގެ ގައުމުތަކުގެ ތަރުތީބުގައި ޗައިނާއާ ފައިހަމަކޮށްލެވޭ ހަމައެކަނި ގައުމުގެ ގޮތުގައި އިންޑިއާ އިން ވަނީ ރަނގަޅަށް ވެސް އިސް ސަފަށް ޖެހިލައިފަ އެވެ.
އިންޑިއާގެ ވެރިކަންކުރާ ބީޖޭޕީއަށް މި ފަހަރު ލަފާކުރި ގޮތަށް، ގާނޫނު ހަދާ މަޖިލީހުގެ މެޖޯރިޓީ ނުލިބުނަސް، ބޮޑުވަޒީރުކަމުގައި ތިންވަނަ ދައުރެއް ކަށަވަރުކުރައްވައި، މޯދީ ވަނީ ދުނިޔޭގައި ވެސް އެންމެ ސީނިއާ ލީޑަރުންގެ ލިސްޓުން ޖާގަ ހޯއްދަވައިފަ އެވެ.
ތަޖުރިބާކާރުން ގަބޫލުކުރާ ގޮތުގައި، ކުރިއަށް އޮތް ފަސް އަހަރުގެ ތެރޭގައި، މޯދީ އަމާޒަކަށް ވާނީ، ބައިނަލްއަގުވާމީ މައިދާނުގެ އިސް ސަފުން އިންޑިއާ އިން ހޯދާފައިވާ މަގާމު އިތުރަށް ވަރުގަަދަކުރެއްވުމަށެވެ. އިންޑިއާގެ އިތުރުން މުޅި ދުނިޔޭގެ ތާރީހަށް މޯދީގެ ލެގަސީ ފެތުރުމަށެވެ.
އެކަމުގެ އެންމެ ބޮޑު ހެއްކަކީ، އދ.ގެ އެންމެ ބާރުގަދަ ގުނަން ކަމަށްވާ، ސަލާމަތީ މަޖިލީހުގެ ދާއިމީ ގޮނޑިއެއް ހޯދަން އިންޑިއާއިން ފަށާފައިވާ މަސައްކަތެވެ.
"ތިން އިންތިހާބުގެ ކާމީޔާބީއާ އެކު، މޯދީ ވާނީ ބައިނަލްއަގުވާމީ މައިދާނުގައި އެންމެ އިސް އެއް ލީޑަރަށް،" ކިންގްސް ކޮލެޖް ލަންޑަންގެ ބައިނަލްއަގްވާމީ ގުޅުންތަކުގެ ޕްރޮފެސަރު ހަރްޝް ވީ ޕަންޓް އޭއެފްޕީއަށް ވިދާޅުވި އެވެ.
"މޯދީ ވަނީ އޭނާގެ އަމިއްލަ އަދި އިންޑިއާއިން ވެސް ބޮޑެތި ކަންތައްތަކެއް ހާސިލުކުރަން ކަނޑައަޅުއްވާފައި. އަދި އެކަމުން މޯދީ އެއްވެސް ވަރަކަށް ދޫދެއްވާނެ ކަމަކަށް ނުބެލެވޭ."
އިންޑިއާގައި މޯދީގެ ފިކުރު ބިންވަޅުކެނޑުމުގެ އިތުރުން، ބައިނަލްއަގުވާމީ މައިދާނުގައި އިންޑިއާއިން ހޯދާފައިވާ މަގާމު ފުރިހަމައަށް ބޭނުންކުރައްވާނެ ކަމަށް ތަޖުރިބާކާރުން ގަބޫލުކުރައްވަ އެވެ.
މިދިޔަ އަހަރު ކްރިކެޓް ވާލްޑް ކަޕް ބޭއްވުމަށް ފަހު، މޯދީ މިހާރު އަމާޒު ހިއްޕަވާނީ، 2036 ވަނަ އަހަރުގެ ސަމަ އޮލިމްޕިކްސް ވެސް އިންޑިއާއަށް ގެނައުމަށެވެ.
ކުރިއަށް އޮތް ދައުރުގައި ހާރީޖީ ގުޅުންތައް ބިނާކުރައްވަން މޯދީގެ ވިސްނުންފުޅު ގެންގުޅުއްވާނެ ގޮތް ތަސައްވަރު ކުރާއިރު، ފާއިތުވި 10 އަހަރު އެޅުއްވި ބިންގާތައް ވަޒަންކޮށްލުން މުހިންމެވެ.
އިންޑިއާ އަކީ އެމެރިކާ، ޖަޕާން އަދި އޮސްޓްރޭލިއާއާ އެކު، އޭޝިއާ ޕެސިފިކް ސަރަހައްދުގައި ޗައިނާގެ ވަރުގަދަ ބާރާ ދެކޮޅަށް މަސައްކަތްކުރާ ގްރޫޕް ބައެކެވެ.
އެމެރިކާގެ ރައީސް ޖޯ ބައިޑަން ވަނީ މިދިޔަ އަހަރު މޯދީގެ ޝަރަފުގައި ވައިޓް ހައުސްގައި ބޭއްވި ރަސްމީ ޖާފަތުގައި، އިންޑިއާ އާއި އެމެރިކާގެ ގުޅުމަކީ "21 ވަނަ ގަރުނުގެ އެންމެ މުހިންމު" ގުޅުމުގެ ގޮތުގައި ސިފަކުރައްވައިފަ އެވެ.
ޗައިނާގެ އަސްކަރީ ބާރާ ވާދަކުރުމުގައި އެހީތެރިވުމަށް، އެމެރިކާ އިން މިދިޔަ ފެބްރުއަރީ މަހު ވަނީ އިންޑިއާއަށް ހަތަރު ބިލިއަން ޑޮލަރުގެ ޒަމާނީ ޑްރޯން ވިއްކުމަށް ފާސްކޮށްފަ އެވެ.
ޔޫރަޕްގެ ގައުމުތަކާ ވެސް އިންޑިއާގެ ގުޅުން ފުޅާވަމުން އަންނައިރު، އަސްކަރީ ޖެޓުތަކާއި ސަބްމެރީންތައް ވިއްކުމަށް ފްރާންސް އާ އެކު ބިލިއަން ޑޮލަރުގެ އަސްކަރީ އެއްބަސްވުންތައް ސޮއިކުރަން ވަނީ އަމާޒުހިފައިފަ އެވެ.
ޗައިނާ އާއި އިންޑިއާ އަކީ ރަޝިއާ ވެސް ހިމެނޭ ގޮތަށް ޝަންހާއީ ކޯޕަރޭޝަން އޮގަނައިޒޭޝަން ފޯރަމްގެ މެމްބަރުންނެވެ.
އެކަމަކު 2020 ވަނަ އަހަރު އިންޑިއާ-ޗައިނާ ބޯޑަރުގައި ދެ ގައުމުގެ ސިފައިން ވަރުގަދައަށް ހަމަލާތައް ބަދަލުކުރި ހާދިސާއަށް ފަހު، ދެ ގައުމު ގުޅުން ވަނީ ވަރަށް ބޮޑަށް ނުތަނަސްވެފަ އެވެ.
އެހެންވެ، ޗައިނާގެ ބާރު އޮބިއަޅާފައި ބޭއްވުމަށް އިންޑިއާއިން ރަހުމަތްތެރި ގައުމުތަކުގެ އެހީގައި މަސައްކަތް ކުރާނެ ކަމަށް ތަޖުރިބާކާރުން ލަފާކުރެ އެވެ.
އިންޑިއާގެ ބޯޑަރު ވަރުގަދަ ކުރުމަށް މޯދީގެ ސަރުކާރުން ވަނީ އެތައް ބިލިއަން ޑޮލަރެއް ހަރަދުކޮށްފަ އެވެ. އެކަމަކު އެ ނުތަނަވަސްކަމުގެ ތެރޭގައި ވެސް، ދެ ގައުމުގެ ވިޔަފާރީގެ ގުޅުން ވަރުގަދަ އެވެ. ޗައިނާއަކީ އިންޑިއާގެ ދެވަނަ އަށް އެންމެ ބޮޑު ވިޔަފާރީގެ ބައިވެރިޔާ އެވެ.
މޯދީ މި ހަފްތާގައި އިންޑިއާ އަކީ "ގްލޯބަލް ސައުތުގެ ވަރުގަދަ އަދި މުހިންމު އަޑެއް" ކަމަށް ވިދާޅުވެފައިވާއިރު، މިދިޔަ އަހަރު އިންޑިއާއިން ވަނީ އޭޝިއާ، އެފްރިކާ އަދި ދެކުނު އެމެރިކާގެ ގައުމުތަކުގެ މަންދޫބެއްގެ ގޮތުގައި އިންޑިއާއިން އަދާކުރާ ދައުރު ފުޅާކުރުމުގެ މަސައްކަތުގެ ތެރެއިން "ވޮއިސް އޮފް ދަ ގްލޯބަލް ސައުތު" ގެ ދެ ސަމިޓެއް ބާއްވައިފަ އެވެ.
އެފްރިކަން ޔޫނިއަން ބްލޮކް ޖީ20 ގެ ދާއިމީ މެމްބަރަކަށް ވެގެން ދިޔައީ މޯދީގެ ބެލުމުގެ ދަށުން ކަމަށްވާއިރު، އިންޑިއާއިން އަންނަނީ ދުނިޔޭގެ ނިންމުންތައް ނިންމުމުގައި ތަރައްގީވަމުން އަންނަ ގައުމުތަކުގެ ބަހެއް ބޭނުންވާ ކަމަށް ވަކާލާތު ކުރަމުންނެވެ.
މީގެއިތުރުން، އިންޑިއާއަކީ ކުރިއަރަމުން އަންނަ އިގްތިސާދުތަކުގެ ބްރިކްސް ކްލަބުގެ ފައުންޑިން މެމްބަރެއް ވެސްމެ އެވެ.
ފިނި ހަނގުރާމައިގެ ދުވަސްވަރުން ފެށިގެން އިންޑިއާ އާއި ރަޝިއާއާ ދެމެދު ގާތް ގުޅުމެއް އޮންނަ އިރު، ރަޝިއާ އަކީ އިންޑިއާއަށް އެންމެ ގިނައިން ހަތިޔާރު ފޯރުކޮށްދޭ ގައުމެވެ.
އިންޑިއާ އިން ވަނީ ރަޝިއާ އިން ޔޫކްރޭނަށް އަރައިގަތުން ފާޅުގައި ކުށްވެރިކުރުމުން ދުރުވުމުގެ އިތުރުން، އދ.ގައި ރަޝިއާ އާ ދެކޮޅަށް ނެގޭ ވޯޓުތަކުގައި ބައިވެރިވުމަށް ދެކޮޅު ހަދައިފަ އެވެ.
މިދިޔަ މާޗް މަހު ރަޝިއާގެ ރައީސް ލެޑެމިއާ ޕޫޓިން އަލުން އިންތިހާބުވުމުން މަރުހަބާ ވިދާޅުވެ، މޯދީ ވަނީ ދެ ގައުމުގެ "ހާއްސަ" ގުޅުން އިތުރު ހަރުފަތަކަށް ގެންދިޔުމަށް އުއްމީދު ކުރައްވާ ކަމަށް ވިދާޅުވެފަ އެވެ.
ޕާކިސްތާނުން ޓެރަރިޒަމަށް ހިތްވަރުދޭ ކަމަށް ތަކުރާރުކޮށް ތުހުމަތުކޮށް، މޯދީގެ ސަރުކާރުން ވަނީ ޕާކިސްތާނާ އެއްވެސް ގުޅުމެއް ބާއްވަން ދެކޮޅު ހަދައިފަ އެވެ. އަދި ކަޝްމީރުގެ ކޮންޓްރޯލް ހޯދުމުގެ ޒަމާންވީ ކޯޅުމަކީ ދެ ގައުމު މެދުގައި އޮންނަ ނުތަނަވަސްކަމުގެ މައިގަނޑު ސަބަބެވެ.
ޕާކިސްތާނުގެ ލާހޫރަށް 2015 ވަނަ އަހަރު މޯދީ ކުރެއްވި ކުއްލި ދަތުރުފުޅަށް ފަހު ގުޅުން ރަނގަޅުވާނެ ކަމަށް އުއްމީދު ކުރެވުނަސް، 2019 ވަނަ އަހަރުން ފެށިގެން ދެ ގައުމު ގުޅުން ވަނީ ވަރަށް ބޮޑަށް ގޯސްވެފަ އެވެ.