09 ޖޫން 2024 - 18:58
އުންމީދުކުރި ވަރަށްވުރެ މާ ދަށް ނަތީޖާއަކާ އެކު އިންޑިއާގެ އާންމު އިންތިހާބުން ކުރި ލިބުނު ނަރެންދުރަ މޯދީ ކޯލިޝަން ސަރުކާރެއްގެ ވެރިއެއްގެ ގޮތުގައި މިއަދު ތިން ވަނަ ދައުރަކަށް ބޮޑުވަޒީރު ކަމުގެ ހުވާކުރައްވައިފި އެވެ.
ރިޔާސީ ގަނޑުވަރުގައި މިއަދު ހަވީރު ބޭއްވި ރަސްމިއްޔާތުގައި މޯދީ ހުވާކުރައްވާފައި ވާއިރު ކެބިނެޓް ވެސް ވަނީ އެކުލަވާލައްވައިފަ އެވެ.
ހުވާކުރެއްވުމުގެ ރަސްމިއްޔާތަށް ވެރިރަށް ނިއު ދިއްލީގައި ސަލާމަތީ ފިޔަވަޅުތައް އޮތީ ވަރަށް ވަރުގަދަކޮށްފަ އެވެ. މި ރަސްމިއްޔާތަށް ދައުވަތު ދެއްވައިގެން ރާއްޖޭގެ ރައީސް ޑރ. މުހައްމަދު މުއިއްޒު، ބަންގްލާދޭޝްގެ ބޮޑުވަޒީރު ޝައިޚް ހަސީނާ އަދި ސްރީ ލަންކާގެ ރައީސް ރަނިލް ވިކްރެމަސިންހާ ވަޑައިގެންފައި ވާއިރު ބޫޓާނާއި ނޭޕާލުގެ ވެރިން ވެސް ވަޑައިގަތެވެ.
އިންޑިއާއާ ވާދަވެރި ޗައިނާ އާއި ޕާކިސްތާނުގެ އިސް ވެރިން މި ރަސްމިއްޔާތުގައި ބައިވެރިވެ ވަޑައެއް ނުގަންނަވަ އެވެ.
މިދިޔަ 10 އަހަރު މެދުކެނޑުމެއް ނެތި އިންޑިއާގައި ވެރިކަންކުރި ބާރަތިޔާ ޖަނަތާ ޕާޓީ (ބީޖޭޕީ) އަށް މިފަހަރު އާންމު އިންތިހާބުގައި ސަރުކާރު އެކުލަވައިލެވޭ ވަރަށް ގޮނޑިއެއް ނުލިބުނެވެ. ދިރާސާކުރާ މީހުންގެ ލަފާކުރުންތަކާ ދިމާ އިދިކޮޅަށް ނުކުތް މި ނަތީޖާއާ އެކު މޯދީއަށް ޖެހިވަޑައިގަތީ ބީޖޭޕީއާ އެކު މަސައްކަތްކުރި 15 ޕާޓީގެ ބައިވެރިވުމާ އެކު ކޯލިޝަން ސަރުކާރެއް އެކުލަވާލައި ކޯލިޝަނަކަށް ބަރޯސާވެގެން ވެރިކަން ކުރައްވާށެވެ.
މޯދީގެ ނެޝަނަލް ޑިމޮކްރެޓިކް އެލަޔަންސް (އެންޑީއޭ) ގައި ހިމެނޭ ބޮޑެތި ޕާޓީތަކުން ސަރުކާރު އެކުލަވާލުމުގައި މޯދީއަށް ބޮޑެތި ޑިމާންޑްތަކެއް ކުރި ކަމަށާއި ވަރަށް ގިނަ މަޝްވަރާތައް ކުރަންޖެހުނު ކަމަށް ހިންދުސްތާން ޓައިމްސް އިން ބުނެފައިވެ އެވެ. ޓައިމްސް އޮފް އިންޑިއާ އިން ބުނި ގޮތުގައި މޯދީ ވަނީ ސަރުކާރު އެކުލަވާލުމުގެ ބޭނުމަށް އެހެން ޕާޓީތަކުގެ އެދުމަށް އެތައް ކަމެއްގައި ދޫދެއްވައިފަ އެވެ.
އިންޑިއާގެ މީޑިއާގައި ރިޕޯޓްކޮށްފައިވާ ގޮތުގައި އެންޑީއޭގައި ހިމެނޭ އެންމެ ބޮޑު ޕާޓީ ކަމަށްވާ ޓެލްގޫ ދެސަމް ޕާޓީ (ޓީޑީޕީ) އިން 16 ގޮނޑި ކާމިޔާބުކޮށްފައި ވާއިރު ކެބިނެޓުން އެ ޕާޓީއަށް ހަތަރު މަގާމު ދޭން ޖެހިފައިވެ އެވެ. ދެން 12 ގޮނޑިއާ އެކު ދެ ވަނަ އަށް އެންމެ ގިނަ ގޮނޑި ލިބުނު ޖަނަތާ ދަލް (ޔުނައިޓެޑް) އިން ވަނީ ކެބިނެޓުން ދެ މަގާމު ދިނުމަށް އެދިފަ އެވެ.
އެކަމަކު އެންމެ ބާރުގަދަ ހަތަރު މަގާމު ކަމަށްވާ އިންޓީރިއާ، ފޮރިން، ފިނޭންސް އަދި ޑިފެންސް މިިނިސްޓްރީ ބީޖޭޕީއަށް ނޫނީ ނުދޭން ކަނޑައަޅާފައިވާ ކަމަށް އިންޑިއާގެ މީޑިއާގައި ރިޕޯޓްކޮށްފައިވެ އެވެ.
މޯދީގެ އެންމެ ފަހުގެ ކެބިނެޓްގައި 81 ވަޒީރުން ތިއްބެވި އެވެ. -- އޭއެފްޕީ