23 ޖޫން 2024 - 06:38
ބަންގްލާދޭޝްގައި މީހުންގެ ގަޔަށް ހަރުފަ ވިހަލުން އާދަޔާ ހިލާފަށް އިތުރުވުމާ ގުޅިގެން ހުރިހާ ހެލްތު ސެންޓަރުތަކާއި ހޮސްޕިޓަލްތަކުގައި އެކަމަށް ފަރުވާ ދެވެ ގޮތަށް "އެންޓި-ވެނަމް" ބެހެއްޓުމަށް ހެލްތު މިނިސްޓްރީން އަންގައިފި އެވެ.
ހެލްތު މިނިސްޓަރު ޑރ. ސަމަންތާ ލާލް ސެން ވަނީ ހަރުފަ ވިހަލައިފި ނަމަ އަމިއްލައަށް ފަރުވާ ދޭން ނޫޅެ އެ މީހަކު ވީ އެންމެ އަވަހަށް ހޮސްޕިޓަލަށް ގެންދިއުމަށް ވެސް އެދިވަޑައިގެންފަ އެވެ.
ބަންގްލާދޭޝްގެ އެކަހެރި ހިސާބުތަކުގައި ހުންނަ ހޮސްޕިޓަލްތަކުން ބުނާ ގޮތުގައި ހަރުފަ ވިހަލައިގެން އެ ތަންތަނަށް ގެންދާ މީހުންގެ އަދަދު މި ފަހުން ވަނީ ވަރަށް ބޮޑަށް އިތުރުވެފަ އެވެ. އެންމެ ގިނައީ ދެކުނު އޭޝިއާ އިން އާންމުކޮށް ފެންނަ ރަސެލްސް ވައިޕާ ހަރުފަ ވިހަލައިގެން ގެންނަ މީހުން ކަމަށް ބުނެފައިވެ އެވެ.
ހަރުފަ ވިހަލުން އިތުރުވާތީ ބަންގްލާދޭޝްގެ ސޯޝަލް މީޑިއާގައި އެ ވާހަކަ ދެކެވޭތާ ހަފްތާތަކެއް ވެއްޖެ އެވެ.
ބަންގްލާދޭޝްގައި ހަރުފަ ވިހަލައިގެން އަހަރަކު 7،000 މީހުން މަރުވާ ކަމަށް 2023 ވަނަ އަހަރު ހެދި ދިރާސާއެއްގައި ބުނެފައިވެ އެވެ. އޭގައި ބުނެފައިވާ ގޮތުން މީގެ ތެރެއިން ގިނަ މީހުންނަކީ އަވަހަށް ފަރުވާ ދެވޭ ނަމަ ސަލާމަތްކުރެވޭނެ މީހުންނެވެ.
ރަސެލްސް ވައިޕާ އަކީ މީދާ ފަދަ ތަކެތި ކައި އުޅޭ އެއްޗަކަށް ވާތީ މިއީ މީހުން ދިރިއުޅޭ ހިސާބުތަކާއި ދަނޑުބިންތަކުގެ ކައިރިއަށް ގޮސް ކާނާ ހޯދާ އެއްޗެކެވެ. މީގެ ހަރުފަ ބަންގްލާދޭޝް އިން ހުސްވެފައިވާ ކަމަށް 2002 ވަނަ އަހަރު އިއުލާނުކުރި އެވެ. އެކަމަކު މިހާރު އަލުން ފެންނަން ފަށައި ވަރަށް ބޮޑަށް އިތުރުވީ އެވެ.
ދުނިޔޭގެ ސިއްހަތު ޖަމިއްޔާއިން ބުނާ ގޮތުގައި ހަރުފަ ވިހަލުމަކީ ޓްރޮޕިކަލް ބަލިތަކުގެ ތެރެއިން އެންމެ އިހުމާލުވެފައިވާ އެއް މައްސަލަ އެވެ.