26 ފެބުރުއަރީ 2017 - 06:18
މުރަނގަތޮޅިއެކޭ އެއްފަދައިން މުރަނގަ ފަތަކީ ވެސް ސިއްހީ ވަރަށް ގިނަ ފައިދާތައް އެކުލެވޭ އެއްޗެކެވެ. ތަފާތު ކާއެއްޗެހި ތައްޔާރުކުރުމަށް މުރަނގަފަތް ބޭނުންކުރެ އެވެ. ކެއުމަށް ނޫނަސް މުރަނގަ ފަތުގެ މުހިންމުކަން ބޮޑެވެ.
ހަކުރު ބައްޔާ ދެކޮޅަށް ވެސް މަސައްކަތްކުރާ މާއްދާތަކެއް ހުންނަ މުރަނގަފަތަކީ، މަސްގުޅަކާފައި ހުންނަ ތަންތަނަށް ފަރުވާ ދޭން ވެސް ބޭނުންކުރެވޭ އެއްޗެއްކަން އެނގެނީ މަދު ބަޔަކަށެވެ. ކުޅިވަރެއް ކުޅެނިކޮށް ލިބޭ އަނިޔާއަކަށް ވިޔަސް އަދި އިންފްލެމޭޝަނެއްގެ ސަބަބުން ދުޅަވިޔަސް މުރަނގަފަތް ފުނޑާފައި އެތަނެއްގައި އެޅުމުން ވަރަށް އަވަހަށް ފަސޭހަވެ އެވެ.
އެހެންކަމުން ދެން ފަހަރަކުން މިފަދަ ކަމެއް ދިމާވެއްޖެ ނަމަ މުރަނގަފަތުގެ އަޖުމަ ބަލާށެވެ.
މުރަނގަފަތަކީ ތަދުކަނޑުވާލުމުގެ ގާބިލްކަން ހުރި ފަތެކެވެ. އެހެންކަމުން، މި ފަތް ފުނޑާފައި ބޭރުފުށުގައި އުނގުޅުމުން ތަދު ކެނޑޭނެ އެވެ. މީގެ އިތުރުން ދުޅަޔާއި އިންފްލެމޭޝަނާ ދެކޮޅަށް މަސައްކަތްކުރާ ކަމްޕައުންޑެއް މި ފަތުގައި ހުރެ އެވެ. މީގެ ސަބަބުން ތަދާއި ދުޅަ ތިރިވުމުގެ އިތުރުން އަނިޔާ ލިބިފައިވާތަން އިތުރަށް ގޯސް ނުވެ ފަސޭހަ ވުމަށް ދިފާއީ ނިޒާމް ވެސް ހަރަކާތްތެރިކޮށްދެ އެވެ.
ތަނެއް ކަނޑައިގެން ގޮސް ފާރުގަނޑެއް ހުރި ނަމަ މި ފަތުގައި ހުންނަ އެންޓިމައިކްރޯބަޔަލް ޕްރޮޕަޓީގެ ސަބަބުން އެތަނަކަށް އިންފެކްޝަން ނުޖެހި ފަސޭހަ ކުރެވިދާނެ އެވެ.
ދަ ތެރަޕިއުޓިކް ޕޮޓޭންޝަލް އޮފް މެޑިސިނަލް ފުޑްސް ފޮތުގައިވާ ބުނެފައި ވަނީ ފަތްޕިލާވެލީގެ ބޭސްވެރިކަމުގައި މި ފަތް ވަރަށް ގިނައިން ބޭނުންކުރަނީ މީގައިވާ، އިންފްލެމޭޝަނާ ދެކޮޅަށް މަސައްކަތްކުރާ މާއްދާތަކުގެ ސަބަބުން ކަމަށެވެ.