05 އޯގަސްޓް 2024 - 19:03
ތައިލެންޑްގެ ވެރި ރަށް ބެންކޮކްގެ ހޮޓެލެއްގެ ތެރޭގައި ދިވެއްސަކު މަރުވެފައި އޮއްވައި ފެނިއްޖެ އެވެ.
އާންމުކޮށް ދިވެހިން ދަތުރުކޮށް އުޅޭ ބެންކޮކުގައި މަރުވެފައި އޮއްވައި ފެނުނީ ދިވެހި ފިރިހެނެކެވެ. އޭނާ މަރުވެފައި އޮއްވައި ފެނުނުކަން މިހާތަނަށް ރަސްމީކޮށް އެއްވެސް އިދާރާއަކުން އާއްމެއް ނުކުރެ އެވެ.
އެކަމަކު "މިހާރު" އަށް ޔަގީން ކުރެވިފައިވާ ގޮތުގައި، މަރުވީ ތ. ތިމަރަފުށީ، މުއާވިޔަތު މޫސާ އެވެ. އޭނާ މަރުވިކަން ފޮރިން މިނިސްޓްރީ މެދުވެރިކޮށް އޭނާގެ އާއިލާއަށް އަންގާފައިވާ ކަން ވެސް އެނގިފައިވެ އެވެ.
އެ ގައުމުގެ ފުލުހުން އަންނަނީ މި މައްސަލަ ތަހުގީގު ކުރަމުންނެވެ.
މިފަދަ ހާދިސާތަކުގައި މީގެ ކުރިން ތައިލޭންޑުން އަމަލު ކޮށްފައިވާ ގޮތަށް ބަލާއިރު، މަރުވި ސަބަބު ދެނެގަތުމަށް ހަށިގަނޑުގެ ޕޯސްޓްމޯޓަމް ހަދާނެ ކަމަށް ބެލެވެ އެވެ.
މި މައްސަލައާ ގުޅިގެން މިހާތަނަށް ރާއްޖޭގެ ފޮރިން މިނިސްޓްރީން އެއްވެސް އެއްޗެއްް ނުބުނެ އެވެ.