21 އޮކްޓޯބަރ 2024 - 12:49
ލިވަޕޫލް (އޮކްޓޯބަރު 21) – ޗެލްސީއާ ދެކޮޅަށް އެންފީލްޑްގައި ލިވަޕޫލުން ރޭ ކުޅުނު މެޗުގައި ރެފްރީ ބޭނުންވީ އެ ކްލަބްގެ ސަޕޯޓަރުންގެ އަޑަށް ގުޑުވާނުލެވޭނެކަން ދައްކަން ކަމަށް ކޯޗު އާން ސްލޮޓް ބުނެފި އެވެ.
ޗެލްސީއާ ދެކޮޅަށް ކުޅުނު މެޗު ލިވަޕޫލުން ކާމިޔާބު ކުރީ 2-1 ންނެވެ. މެޗުން މޮޅުވިޔަސް ރެފްރީގެ ނިންމުންތަކާ މެދު ސްލޮޓް ހުރީ ހިތްހަމަ ނުޖެހިފަ އެވެ.
އޭނާ ބުނީ އާންމުގޮތެއްގައި ރެފްރީންގެ ނިންމުންތައް އަމިއްލަ ސަޕޯޓަރުންގެ ކުރިމަތީގައި ކުޅޭ ކްލަބަށް ބަރޯސާވާ ކަމަށެވެ. އެކަމަކު ރޭގެ މެޗުގައި ރެފްރީ ބޭނުންވީ އޭނާ އަށް އެހެން ނުވާނެކަން ދައްކަންކަން ކަމަށެވެ. އެހެންވެ ލިވަޕޫލާ ދެކޮޅަށް ނުރަނގަޅު ނިންމުންތައް އޭނާ ނިންމި ކަމަށް ސްލޮޓް ބުންޏެވެ.
"ސަޕޯޓަރުން ކިތަންމެ އަޑުގަދަ ވިޔަސް ރެފްރީ ބޭނުންވީ އޭނާގެ ނިންމުންތައް ނިމޭނެކަން ދައްކަން. އެހެންވެ އެކަމުގެ ސަބަބުން އަހަރެމެންނަށް އެހީއަކަށް ނުވި. އެކަމަކު އަހަރެމެންގެ ކުޅުންތެރިންނަށް އެކަމުން އެހީއަކަށްވީ. ސަބަބަކީ އެ ކުޅުންތެރިންނަށް އެނގުނު ބުރަކޮށް މަސައްކަތް ކުރަން ޖެހޭނެކަން... ނަފުސާނީ ގޮތުން ކުޅުންތެރިން އިތުރަށް ވަރުގަދަ ވި،" ސްލޮޓް ބުންޏެވެ.
މެޗުގައި ޗެލްސީއަށް ލިޑް ނަގައިދިނީ ޕެނަލްޓީއަކުން މުހައްމަދު ސަލާހް އެވެ. ދެވަނަ ހާފު ފެށިގޮތަށް ނިކޮލަސް ޖެކްސަން ޗެލްސީ އަށް ނަތީޖާ ހަމަހަމަކޮށް ދިނެވެ. ލިވަޕޫލް މޮޅުކޮށްދިން ލަނޑު ޖެހީ ކާޓިސް ޖޯންސް އެވެ.
ސްލޮޓް ބުނީ ޗެލްސީއާ ދެކޮޅަށް ކުޅުނު މެޗަކީ ލިވަޕޫލްގެ ކޯޗުކަމާ ހަވާލުވި ފަހުން މިހަތަނަށް އޭނާ ކުރިމަތިލި އެންމެ އުނދަގޫ މެޗު ކަމަށެވެ.