01 ފެބުރުއަރީ 2025 - 13:35
ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ އާއި ޓޫރިޒަމް މިނިސްޓްރީ އެއްކޮށްލައި، އެ މިނިސްޓްރީގެ މިނިސްޓަރަކަށް ތޯރިގު އިބްރާހިމް ދެންމެ އައްޔަން ކުރައްވައިފި އެވެ.
ދެ މިނިސްޓްރީ އެއްކޮށްލުމުން، އެ މިނިސްޓްރީގެ ނަމަކީ މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް އެވެ.
ޓޫރިޒަމް އެންޑް އެންވަޔަރަންމަންޓުގެ މަގާމަށް ތޯރިގު އައްޔަން ކުރެއްވުމުގެ ގޮތުން އޭނާއާ ރައީސް ޑރ. މުހައްމަދު މުއިއްޒު ލިޔުން ހަވާލުކޮށްދެއްވީ ރައީސް އޮފީހުގައި ދެންމެ ބޭއްވި ރަސްމިއްޔާތެއްގަ އެވެ.
ތޯރިގު މި ސަރުކާރުގައި މިހާތަނަށް ހުންނެވީ އެންވަޔަރަންމަންޓް މިނިސްޓަރުކަމުގެ މަގާމުގަ އެވެ.
އެންވަޔަރަންމަންޓާއި ޓޫރިޒަމް މިނިސްޓްރީ އެއްކޮށްލައި، ޓޫރިޒަމް މިނިސްޓަރަކަށް ތޯރިގު މި އައްޔަން ކުރެއްވީ ކުރިން އެ މަގާމު ފުރުއްވި އިބްރާހިމް ފައިސަލް މިދިޔަ ޖެނުއަރީ މަހުގެ 28 ގައި މަގާމުން ވަކިކުރެއްވުމާ ގުޅިގެންނެވެ. ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުﷲ ގެ ދަރިކަލުން ފައިސަލް މަގާމުން ވަކިކުރެއްވި ސަބަބެއް ސަރުކާރުން މިހާތަނަކަށް ނުބުނެ އެވެ.
އެންވަޔަރަންމަންޓާއި ޓޫރިޒަމް މިނިސްޓްރީ އެއްކޮށްލުމުން މި ސަރުކާރުގެ މިނިސްޓްރީތަކުގެ އަދަދަކީ މިހާރު ވިއްސެވެ.