14 މާޗް 2017 - 16:02
ކުއާލަ ލަމްޕޫރު (މާޗް 14) - ނޯތު ކޮރެއާ މީހުން މެލޭޝިއާ އިން ފުރުން މަނާކޮށްފައިވީ ނަމަވެސް ވިސާގައިވާ މުއްދަތަށް ވުރެ އިތުރަށް އެ ގައުމުގައި ތިބި ނޯތު ކޮރެއާގެ 50 މީހުން ޑިޕޯޓްކޮށްލާނެ ކަމަށް މެލޭޝިއާ އިން ބުނެފި އެވެ.
މެލޭޝިއާ އާއި ނޯތު ކޮރެއާގެ ގުޅުން ހީނަރުވެފައި މި ވަނީ ނޯތު ކޮރެއާގެ ލީޑަރު ކިމް ޖޮން-އުންގެ ބޭބެ ކިމް ޖޮން-ނަމް ކުއާލަ ލަމްޕޫރު އެއާޕޯޓުގައި މަރާލި މައްސަލައާ ގުޅިގެންނެވެ. ކިމްގެ މަރުގެ ތަހުގީގު ކުރިއަށް ގެންދާ ގޮތާ މެދު ހިތްހަމަނުޖެހިގެން ނޯތު ކޮރެއާ އިން ދަނީ މެލޭޝިއާ އަށް ފާޑު ކިޔަމުންނެވެ. ކިމްގެ ހަށިގަނޑު ހަވާލު ކުރުމަށް ވެސް ނޯތު ކޮރެއާ އިން ވަނީ އެދިފަ އެވެ. އަދި ނޯތު ކޮރެއާގައި ތިބި މެލޭޝިއާ މީހުން ފުރުން ވަނީ މަނާކޮށްފަ އެވެ. ރައްދުގައި މެލޭޝިއާ އިން ވެސް ވަނީ ނޯތު ކޮރެއާ މީހުން ފުރުން މަނާކޮށްފަ އެވެ. ނޯތު ކޮރެއާގެ ހާހެއްހާ މީހުން މެލޭޝިއާގައި ދިރިއުޅޭ ކަމަށްވެ އެވެ.
ނޯތު ކޮރެއާ މީހުން ފުރުން މަނާކޮށްފައި ވަނިކޮށް ވަކި ބަޔަކު ޑިޕޯޓްކޮށްލަން ނިންމީ ކީއްވެ ކަމެއް ނޭނގެ އެވެ. މެލޭޝިއާގެ ބޮޑު ވަޒީރުގެ ނައިބް އަހުމަދު ޒާހިދު ހާމިދީ ވިދާޅުވީ ސަރަވަކްގައި ވިސާ އަށް ވުރެ އިތުރަށް ތިބި ނޯތު ކޮރެއާ މީހުން ވަރަށް އަވަހަށް ފޮނުވާލާނެ ކަމަށެވެ.
މެލޭޝިއާ އިން ބުނެފައި ވަނީ ކިމްގެ މަރުގެ ތުހުމަތު ކުރެވޭ ބައެއް މީހުން ވަނީ ކުއާލަ ލަމްޕޫރުގައި ހުންނަ ނޯތު ކޮރެއާ އެމްބަސީ އަށް ވަދެ ހިމާޔަތް ހޯދައިފައި ކަމަށެވެ.
ކިމް މަރާލުމަށް މޫނުގައި ވިހަ ފޮތިގަނޑެއް އެޅި ދެ އަންހެނުން މިހާރު ވަނީ ހައްޔަރުކޮށްފަ އެވެ. ކިމް މަރާލަން ބޭނުންކޮށްފައި ވަނީ ވިހަގަދަ ބާވަތެއް ކަމަށްވާ ވީއެކްސް ނާވް އެޖެންޓެކެވެ.