29 މާޗް 2017 - 06:13
އަންނަ އޮގަސްޓް މަހަކީ ހިންދީ ފިލްމު ބަލާ މީހުންނަށް އަނެއްކާވެސް ބޮޑު މަހެކެވެ. މަޝްހޫރު އެ އެކްޓަރެއްގެ ދެ ފިލްމު ބޮކްސް އޮފީހުގައި ކުރިމަތިލުމަކަށް ދާން ޖެހޭ މަހަކަށް ވާތީ އެވެ.
ޝާހްރުކް ޚާނާއި އަނުޝްކާ ޝަރުމާގެ، އަދި ނަމެއް ދީފައި ނުވާ ފިލްމާއި އަކްޝޭ ކުމާރާއި ބޫމީ ޕަޑްނޭކަރްގެ "ޓޮއިލެޓް: އޭކް ޕްރޭމް ކަތާ" ރިލީޒްކުރަން ހަމަޖެހިފައިވަނީ ހަމަ އެއް ދުވަހެއްގަ އެވެ.
ޓްރޭޑް އެނަލިސްޓް އަދި ފިލްމު ކްރިޓިކް ތަރަން އާދާޝް ބުނި ގޮތުގައި އިމްތިޔާޒު އަލީ ޑައިރެކްޓްކޮށްފައިވާ ޝާހްރުކްގެ ފިލްމު ރިލީޒްކުރަން ހަމަޖެހިފައި ވަނީ އަންނަ އޮގަސްޓް 11 ވަނަ ދުވަހު އެވެ. އަދި އަކްޝޭ ކުމާރުގެ ފިލްމު ވެސް ރިލީޒްކުރަން ކަނޑައަޅާފައިވަނީ ހަމަ އެ ދުވަހު އެވެ.
ޝާހްރުކްގެ ފިލްމު ރިލީޒްކުރާ ތާރީޚު އިއުލާންކުރީ މީގެ ދުވަސްކޮޅެއް ކުރިން ސަލްމާން ޚާނެވެ. އަދި އަކްޝޭގެ ފިލްމު ވެސް ރިލީޒްކުރާނީ ހަމަ އެ ދުވަހުކަން މިހާރު ވަނީ ޔަގީންވެފަ އެވެ.
އެހެންކަމުން މިއީ އަނެއްކާވެސް ބޮލީވުޑް ބޮކްސް އޮފީހަށް ވަރަށް ބޮޑު ދުވަހަކަށް ވާނެ އެވެ. އަކްޝޭ އަކީ ކުޅޭ ހުރިހާ ފިލްމެއް ކަހަލަ ގޮތަކަށް ކާމިޔާބުކުރަމުންދާ އެކްޓަރެކެވެ. އަނެއްކޮޅުން ޝާހްރުކްގެ ނަން ބުނެލިޔަސް އޭނާގެ ސަޕޯޓަރުންތައް ވަދެ ސިނަމާ ހޯލްތައް ފުރާލާނެ އެވެ.