29 މާޗް 2017 - 12:44
އެމްސްޓެޑަމް، ނެދަލެންޑްސް (މާޗް 29) – އިޓަލީ ގައުމީ ފުޓްބޯޅަ ޓީމުގެ ފުރަތަމަ އެގާރައިގައި ހިމެނިގެން ކުޅުނު އެންމެ ޒުވާން ގޯލްކީޕަރުގެ ރެކޯޑް ޖިއަންލުއިޖީ ޑޮންނަރުއްމާ އަށް ލިބިއްޖެ އެވެ.
ބައިނަލްއަގްވާމީ އެކުވެރިކަމުގެ މެޗެއްގައި ރޭ ނެދަލެންޑްސް އަތުން 2-1 އިން އިޓަލީ މޮޅުވި މެޗުގައި ޑޮންނަރުއްމާ ގޯލް ބެލެހެއްޓި އިރު އުމުރަކީ 18 އަހަރާއި 1 މަހާއި 5 ދުވަހެވެ. މި ރެކޯޑް ކުރިން އޮތް އަދި ޖިއަންލުއިޖީ ބުފޮން އެންމެ ފުރަތަމަ ގޯލް ބެލެހެއްޓީ އުމުރުން 20 އަހަރުގަ އެވެ. ބުފޮން އިޓަލީ އަށް ކުޅެން ފެށީ ޑޮންނަރުއްމާ އުފަންވުމުގެ ދެ އަހަރު ކުރިން 1997 ގަ އެވެ.
"އަހަރެން ބުފޮން އަށް ޝުކުރުއަދާކުރަން އޭނާ ތަމްރީންތަކުގައި އަހަންނަށް ދޭ ނަސޭހަތްތަކަށް. އަހަރެން އެ ހުރިހާ އިރުޝާދެއްގެ ބޭނުން ހިފިން. ގައުމީ ޓީމުގެ ފުރަތަމަ އެގާރައިގައި ކުޅުމުގެ ފުރުސަތު ލިބުމުން ވަރަށް އުފާވެއްޖެ. އަހަރެން ފުރަތަމަ އެގާރައިގައި ކުޅުނަސް އަދި ވެސް ބުފޮން އެބަހުރި ޓީމުގައި. މި ހާއްސަ ރޭ ހަދިޔާކުރަނީ އާއިލާ އާއި ލޯބިވެރިޔާއަށް،" ޑޮންނަރުއްމާ ބުންޏެވެ.
އުމުރުން 16 އަހަރުގައި 2015 ވަނަ އަހަރު އޭސީ މިލާނުގެ ފުރަތަމަ އެގާރައިން ޖާގަ ހޯދަން ފެށި ފަހުން އޭނާގެ ޖާގަ ގެއްލިފައެއް ނުވެ އެވެ. ދުނިޔޭގައި މިވަގުތު ހުރި އެންމެ ހުނަރުވެރި އެއް ކުޅުންތެރިޔާއަކީ ބުފޮން ރިޓަޔާކުރުމުން އިޓަލީގެ އެއް ވަނަ ކީޕަރަށް ވާނެ ކުޅުންތެރިޔާ ކަމަށް ގިނަ ބަޔަކު އެއްބަސްވެ އެވެ.
ނެދަލެންޑްސްގެ ކޯޗު ޑެނީ ބްލިންޑް ވަކިކުރުމަށް ފަހު އެ ޓީމު ކުޅުނު ފުރަތަމަ މެޗުގައި ރޭ އެ ޓީމަށް ލީޑު ލިބުނީ އިޓަލީގެ ޒުވާން ޑިފެންޑަރު އަލެސިއޯ ރޮމަނޮލީ އަތުން ބައިކޮޅަށް ވަން ލަނޑުންނެވެ. އިޓަލީއަށް އެއްވަރުކޮށްދިނީ އެޑާ މާޓިންސް އެވެ. އަދި ފުރަތަމަ ހާފު ނިމުމުގެ ކުރިން މޮޅުކޮށްދިނީ ލިއޮނާޑޯ ބޮނޫޗީ އެވެ.