30 މާޗް 2017 - 06:23
އިންޑިއާގެ ރާޖްގަރް ޑިސްޓްރިކްޓުގެ ހޮސްޕިޓަލެއްގައި އޮތް 80 އަހަރުގެ ބަލި މީހަކަށް ކުއްތާތަކެއް ހަމަލާދީ އެ މީހާ ކާލައިފި އެވެ.
ހަމަލާގައި މަރުވި އަންހެން މީހާގެ ހަށިގަނޑުން ނުކެވިފައި އޮތް ބައިތަކާއި ބޯ ފެނިފައިވަނީ ހޮސްޕިޓަލު ގޯތިތެރެއިންނެވެ. އޭރު އެ މީހާ ގެއްލިގެން ހޯދާތާ ދެތިން ދުވަސް ވެއްޖެ އެވެ.
ހޮސްޕިޓަލުގެ އޮފިޝަލުން ހޯމަ ދުވަހު ބުނި ގޮތުގައި ފެނިފައިވަނީ ގެއްލުނު އަންހެންމީހާގެ ހަށިގަނޑުގެ ބައިތަކެއްކަން ވަނީ ޔަގީންކުރެވިފަ އެވެ. އެމީހާ ގެއްލިފައި ވަނީ މި މަހުގެ 19 ވަނަ ދުވަހު އެވެ.
އެ މީހާ ހޮސްޕިޓަލުގެ އެނދުގައި ނެތްކަން އެނގުނީ ވެސް ވޯޑުތަކުގައި ތިބޭ ބަލި މީހުން ހޮސްޕިޓަލުގެ ބޭރުން ނުބައި ވަހެއް ދުވާތީ ޝަކުވާ ކުރަން ފެށުމުން އެތަން ހޯދުމުންނެވެ. ހޯދަމުން ދަނިކޮށް، އިންސާނެއްގެ ހަށިގަނޑުގެ ބައިތަކެއް ހޮސްޕިޓަލުގެ ވޯޑުތަކުގެ ބޭރުން ފެނުނީ ކަމަށް އެ ހޮސްޕިޓލުގެ ޗީފް މެޑިކަލް އެންޑް ހެލްތު އޮފިސަރު ޑރ. އެސް.އެސް. ގުޕްތާ ވިދާޅުވި އެވެ. އެ މީހާގެ ހަށިގަނޑުގެ ބައިތައް ފެނުނީ ފަސް ވަރަކަށް ދުވަސް ވެފައި ވަނިކޮށް ކަމަށް ވަނީ ބެލެވިފަ އެވެ.
ބެލެވޭ ގޮތުގައި މި އަންހެންމީހާ ކާލާފައިވަނީ މަގުމަތީގައި އުޅޭ ކުއްތާ ތަކެކެވެ. ހޮސްޕިޓަލުން ލަފާކުރަނީ އަންހެންމީހާ އަމިއްލައަށް ނުކުމެގެން އުޅެނިކޮށް ކުއްތާތަކަށް ފެނިގެން ހަމަލާ ދިނީ ކަމަށެވެ. ނަމަވެސް މި މައްސަލަ އިތުރަށް ބަލަމުންދާކަމަށް ހޮސްޕިޓަލުން ބުންޏެވެ.
މި އަންހެންމީހާ އަކީ މަގުމައްޗަށް ވެއްޓިފައި އޮއްވާ ފުލުހުންނަށް ފެނިގެން ގެންދިޔަ މީހެކެވެ.