03 އެޕްރީލް 2017 - 13:20
ރޯމް (އެޕްރީލް 3) - ލީބިއާއާ ދިމާލުން މެޑިޓެރޭނިއަން ކަނޑުން ބެހެމުން ދިޔަ ރަބަރު ޑިންގީއެއްގައި ތިބި ބައެއްގެ ތެރޭގައި ހިމެނޭ ހަތަރު ދުވަސްވީ ކުޑަ ކުއްޖަކު ސަލާމަތްކޮށްފި އެވެ.
އިންސާނީ އެހީ ފޯރުކޮށްދޭ ބޯޓަކަށް ނެގި ކުޑަ ކުއްޖާއާ އެކު 480 މީހަކު ވަނީ މެޑިޓެރޭނިއަން ކަނޑުގައި ހިންގި އޮޕަރޭޝަނުގައި ސަލާމަތްކޮށްފަ އެވެ. ކުޑަ ކުއްޖާއާ އެކު ދަތުރުކުރި ޑިންގީގައި ސެންޓްރަލް އެފްރިކާ، ސްރީ ލަންކާ އަދި ޔަމަނު މީހުން ތިއްބެވެ. މި ބޯޓުން މީހުން ސަލާމަތް ކުރި އިރު އެ ބޯޓު އޮތީ ލީބިއާގެ އުތުރުން 22 މޭލު ބޭރުގަ އެވެ. މީހުން ސަލާމަތްކޮށްފައި ވަނީ ސްޕޭނުގެ އެންޖީއޯއެއް ކަމަށްވާ ޕްރޯއެކްޓިވާ އޯޕަން އިންނެވެ. މީހުން ސަލާމަތްކޮށްގެން ގެންދިޔައީ އިޓަލީގެ ޓައުނަކަށެވެ.
ހަތަރު ދުވަސްވީ ކުއްޖާގެ މަންމަ ނައިޖީރިއާގެ 29 އަހަރުގެ އަންހެން މީހާ އާއި އޭނާގެ ފިރިމީހާ 34 އަހަރުގެ ގާނާގެ މީހާ ވެސް ވަނީ ބޯޓުން ސަލާމަތްކޮށްފަ އެވެ. ލީބިއާގައި ދެ އަހަރު އުޅުމަށް ފަހު ދަރިއަކު ލިބުމާ އެކު އެ މީހުން ޔޫރަޕަށް ދިރިއުޅުން ބަދަލު ކުރުމަށް ބޭނުންވީ ކަމަށް ބުންޏެވެ.
"އަހަރެމެން ބޭނުންވީ ޖަރުމަން ނޫނީ ފްރާންްސްގައި ދިރިއުޅެން. އަހަރެމެންނަށް ކުރިމަގެއް އޮތީ ޔޫރަޕުގައި،" ކުޑަ ކުއްޖާގެ ބައްޕަ ރިޗަޑް އޮހީން ބުންޏެވެ.
ނޯތު އެފްރިކާ އިން އިޓަލީ އަށް ދަތުރު ކުރަނިކޮށް ކަނޑުވެގެން މި އަހަރުގެ މިހާތަނަށް 600 އަށް ވުރެ ގިނަ ރެފިއުޖީން މަރުވެފައިވާ ކަމަށް އިންޓަނޭޝަނަލް މައިގްރޭޝަން އޮގަނައިޒޭޝަން (އައިއޯއެމް) އިން ވަނީ ބުނެފަ އެވެ.