ކުޑަކުދިންނަށް ޖިންސީ ގޯނާކުރުމާއި ކުޑަކުދިންގެ ބަރަހަނާ މަންޒަރު ވީޑިއޯކޮށް، އެ ކުދިންނާއި އެތައް ބަޔަކު ބްލެކްމެއިލްކުރި ޖެފްރީ އެޕްސްޓީންއާ އެކު، ކުރީގެ ރައީސް ޑރ. މުހައްމަދު ވަހީދު ބޭއްވެވި ގުޅުމުގެ މައްސަލައާ ގުޅިގެން ޖިނާއީ ތަހުގީގެއް މިހާތަނަށް ހިނގަމުން ނުދާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
އެޕްސްޓީންގެ މައްސަލަ ހޫނުވެފައިވަނިކޮށް ވަހީދު ވަނީ ރައީސް ޑރ. މުހައްމަދު މުއިއްޒުގެ ސްޕެޝަލް އެންވޯއިގެ މަގާމުން އިސްތިއުފާ ވެސް ދައްވައިފަ އެވެ. އެންވޯއިގެ މަގާމުން ވަހީދު މި އިސްތިއުފާ ދެއްވީ ނައިބު ރައީސްކަމުގައި ހުންނެވި ދުވަސްވަރާއި ރައީސްކަމުގައި ހުންނެވި ދުވަސްވަރު ވެސް އަދި ވެރިކަން ނިިމުނު ފަހުން ވެސް ރާއްޖޭގެ ވަރަށް ތަފްސީލު އަދި ހައްސާސް މައުލޫމާތުތައް ވެސް އެޕްސްޓީންއާ ހިއްސާކުރައްވައި ވަރަށް ގާތް ގުޅުމެއް ބޭއްވި މައްސަލަ ފަޅާއެރުމުން އޭނާގެ އިސްތިއުފާއަށް ގިނަ ބަޔަކު ގޮވަމުން ދަނިކޮށެވެ.
މި ހަފްތާގައި ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި ވަހީދު އިސްތިއުފާ ދެއްވީ ރައީސް އެކަމަށް އެންގެވުމުންނެވެ.
ވަހީދުގެ މައްސަލައާ ގުޅޭ ގޮތުން ނޫސްވެރިޔަކު ހޯމް މިނިސްޓަރު އަލީ އިހުސާންއާ ސުވާލުކުރުމުން ވިދާޅުވީ އެޕްސްޓީން ފައިލްސްއާ ގުޅޭ އެއްވެސް މައްސަލައެއް ފުލުހުންނަށް ހުށަހަޅާފައިނުވާ ކަމަށެވެ. އަދި އަމިއްލައަށް ފެނިގެން ވެސް އެފަދަ މައްސަލައެއް ބަލަމުން ނުދާ ކަމަށް ވިދާޅުވި އެވެ.
"ނަމަވެސް އެއްވެސް މީހަކު އިސްތިސްނާނުކޮށް ޖިނާއީ ތުހުމަތެއް އޮތް ކަމަށް ގަބޫލު ކުރެވޭ ހާލަތުގައި އަދި ހުށަހެޅޭ ހާލަތުގައި އެ މައްސަލަަތައް ބަލަމުން ގެންދާނަން،" މިނިސްޓަރު ވިދާޅުވި އެވެ.
އެޕްސްޓީން ފައިލްސްގެ މުއާމަލާތްތަކުން އެނގޭ ގޮތުގައި ވަހީދާއި އެޕްސްޓެއިންގެ ގުޅުން 2012 ވަނަ އަހަރުން ފެށިގެން 2015 ވަނަ އަހަރާ ހަމައަށް ކުރިއަށް ގެންދިޔަ އެވެ. އެހެންވެ، މިއީ އެޕްސްޓީންގެ މައްޗަށް 2008 ވަނަ އަހަރު ޖިންސީ ކުށުގެ ތުހުމަތުކޮށް، ޖަލަށް ލައި އެތައް މަހެއް ވަންދެން ބަންދުގައި ހުރުމަށް ފަހު ދޫކޮށްލި ފަހުން ބޭއްވި ގުޅުމެކެވެ.
ރާއްޖޭގެ ސިޔާސީ މަސްރަހާ ގުޅޭ ގޮތުން ވަހީދު އެތައް މެއިލްއެއް ފޮނުއްވާފައި ވާއިރު، އެޕްސްޓެއިން އެންމެ ފާހަގަކޮށްލެވޭ އެއް އީމެއިލަކީ 2013 ވަނަ އަހަރުގެ ރިޔާސީ އިންތިހާބަށް އިންޑިއާއިން ނުފޫޒު ފޯރުވި ކަމަށް ވިދާޅުވެ ފޮނުއްވި މެއިލް އެކެވެ.
މެއިލްތަކުން އެނގޭ ގޮތުގައި ޕްރައިވެޓް އައިލެންޑެއްގެ ގޮތުގައި ރާއްޖޭގެ ރަށެއް ތަރައްގީ ކުރުމުގެ މަސައްކަތް އެޕްސްޓީންއާ ގުޅިގެން ކުރިއަށް ގެންދަވަން ވަހީދު އުޅުއްވި އެވެ. އަދި އެކަމާ ގުޅޭ ފީޒިބިލިޓީ ރިޕޯޓެއް ހަދައި ހިއްސާކުރެއްވި އެވެ.
އެމެރިކާގެ ޖަސްޓިސް ޑިޕާޓްމަންޓުން އާއްމުކޮށްފައިވާ އީމެއިލް މުއާމަލާތްތަކުން އެނގޭ ގޮތުގައި ވަހީދު ވަނީ އެޕްސްޓީންއާ އެކު ގާތްގުޅުމެއް ބާއްވަވައި، އޭނާ އަކީ ބޮޑެތި ކަންކަމުގައި އިރުޝާދު ހޯއްދަވާ ވަރުގެ ގާތް މީހެއްގެ ގޮތުގައި ގެންގުޅުއްވައިފަ އެވެ.
އެ މުއާމަލާތްތަކުގައިވާ ގޮތުން ވަހީދު، އެޕްސްޓީންގެ އިރުޝާދު ހޯއްދެވި ބޮޑެތި ކަންްތައްތަކުގެ ތެރޭގައި ރާއްޖޭގެ މާލީ ކަންކަމާއި 2013 ވަނަ އަހަރުގެ ރިޔާސީ އިންތިހާބުގެ ކެމްޕެއިން ސްޓެރެޓެޖީ ހިމެނެ އެވެ.
ވަހީދު ވަނީ އޭނާ އެޕްސްޓީންއާ ބައްދަލުކުރެއްވީ އެޕްސްޓީން އަށް އެ ތުހުމަތުތަައްކޮށް ހައްޔަރުކުރިކަން އެނގިވަޑައިނުގަންނަވާ ކަމަށާއި ޕްސްޓީންއާ ބައްދަލުކުރެއްވީ ނިއު ޔޯކްގެ އެންމެ ނުފޫޒު ގަދަ އެއް ފަންޑް މެނޭޖަރު އަދި ފައިނޭންޝަލް އެޑްވައިޒަރުގެ ހައިސިއްޔަތުން ކަމަށެވެ.