މޯލްޑިވްސް އިސްލާމިކް ބޭންކް (އެމްއައިބީ) އިން ރާއްޖޭގައި އިސްލާމިކް ބޭންކިން ނިޒާމު މުޅިން އަލަށް ތައާރަފުކޮށް، ޒަމާނީ ޓެކްނޮލޮޖީއާ އެއް ހަމައެއްގައި އެ ހިދުމަތްތައް ތަރައްގީކޮށް ކުރިއަރުވަމުން ގެންދާތާ 15 އަހަރުވީއިރު ރާއްޖޭގައި އެންމެ ހަލުވި ސްޕީޑުގައި ކުރިއެރުން އައި އެއް ބޭންކެވެ.
ރާއްޖޭގައި ފުރަތަމަ އަދި ހަމައެކަނި ފުލީފްލެޖް އިސްލާމިކް ބޭންކުގެ ގޮތުގައި އެމްއައިބީ އިން 2011 ވަނަ އަހަރު ދަތުރު ފެށީ ސާފު އަމާޒަކާ އެކުގަ އެވެ.
އެއީ، އިސްލާމީ ރިވެތި އުސޫލުތަކާ އެއްގޮތައް ބޭންކިން ހައްލުތަކެއް ތައާރަފުކޮށް، އެ ހިދުމަތްތައް ރައްޔިތުންނަށް ފޯރުކޮށްދިނުމަށެވެ. އެމްއައިބީ އަށް ކަސްޓަމަރުން ކުރި އިތުބާރާއި ބޭންކުން ކަސްޓަމަރުންގެ އަޑު އަހައި، އެއާ އެއްގޮތައް އެ ކުރި މަސައްކަތުގެ ނަތީޖާ ވަރަށް ފޮންޏެވެ.
މިދިޔަ 15 އަހަރު ދުވަހު އެމްއައިބީ ވަނީ ރައްޖޭގެ އެކި ސަރަހައްދުތަކުގައި ދިރިއުޅޭ ވަކިވަކި ފަރުދުންނާއި އާއިލާތަކާއި ވިޔަފާރިވެރިން އަދި ވިޔަފާރިތަކަށް އިތުބާރު ހިފޭ މާލީ ބައިވެރިއަކަށް ވެފަ އެވެ.
އެމްއައިބީގެ ވިސާ ކާޑުތައް.
ފައިސާ އޭޓީއެމާއި ފައިސާ ކާޑު އަދި ޕީއޯއެސްގެ ހިދުމަތްތަކާ އެކު، އެމްއައިބީ އިން ފެށި ދަތުރު އިތުރަށް ފުރިހަމަވީ، އިންޓަނެޓް ބޭންކިން (ފައިސާނެޓް) އަދި މޮބައިލް ބޭންކިން (ފައިސާމޮބައިލް) ފަދަ ހިދުމަތްތައް ރާއްޖެ އަށް ތައާރަފުކޮށް، އެ ހިދުމަތްތައް ޒަމާނާ އެއްހަމަ ކުރުމަށް ފެށި މަސައްކަތުންނެވެ.
އެމްއައިބީ ހުޅުވިތާ މަދު އަހަރުތަކެއްގެ ތެރޭގައި ބޮޑެތި އާބާދީ އޮންނަ ތަންތަނުގައި އެ ބޭންކުގެ ބްރާންޗުތައް ހުޅުވައި ހިދުމަތްތައް ދޭން ފެށުން ވީ، އަތޮޅުތެރޭގައި މާލީ ގޮތުން ލިބޭ ފުރުސަތުތައް ހަރުދަނާވި ކަމަކަށެވެ. ރައްޔިތުންނާ ގާތުން އެ ހިދުމަތްތައް ލިބުން ފަހިވި އެވެ.
މީގެ އިތުރުން ވެސް 2019 ވަނަ އަހަރު އެމްއައިބީ އިން ވަނީ ކާމިޔާބު އައިޕީއޯއަކަށް ފަހު، މޯލްޑިވްސް ސްޓޮކް އެކްސްޗޭންޖުގައި ޕަބްލިކް ލިމިޓެޑް ކުންފުންޏެއްގެ ގޮތުގައި ލިސްޓުކޮށް، ތާރީހީ އިތުރު ހަރުފަތެއް ގިރާކޮށްފަ އެވެ.
ކުރީގެ ރައީސް މުހައްމަދު ނަޝީދު މޯލްޑިވްސް އިސްލާމިކް ބެންކު އިފްތިތާހު ކޮށްދެއްވަނީ.
މިދިޔަ އަހަރުތަކުގައި އެމްއައިބީގެ ޑިޖިޓަލް ޓްރާންސްފޯމޭޝަން އެޖެންޑާ ހަރުދަނާކޮށް، އެ ކަންކަން ހާސިލުކުރާ ދުވެލި ވަނީ އެތައް ގުނައަކުން ހަލުވިކޮށްފަ އެވެ. ވަގުތުން އެމްއައިބީ އެކައުންޓް ހުޅުވުމުން ފެށިގެން ވިޔަފާރިތަކުން މުވައްޒަފުންގެ މުސާރަ ޖަމާކުރުމާ ހަމަޔައް ވެސް ގޭގައި ތިބެގެން އެމްއައިބީގެ ހިދުމަތްތައް ހޯދާލެވޭ ވަރަށް އެ ބޭންކުގެ ހިދުމަތްތައް ވަނީ ކުރިއަރައިފަ އެވެ. މީގެ ތެރޭގައި އިންސްޓަންޓް އެކައުންޓް އޯޕަނިންް އާއި ފުލީ ޑިޖިޓަލް ބިޒްނަސް އެކައުންޓް އޯޕަނިން އާއި ފައިސާ މޯބައިލް އެކްސް އާއި އެޕްލައި ނައު އަދި އުޖާލާނައު ޕޯޓަލް ހިމެނެ އެވެ.
އެމްއައިބީގެ ސޭލްސް ސެންޓަރު އުނގޫފާރުގައި ހުޅުވުމަށް ބޭއްވި ރަސްމިއްޔާތު: އެ ބޭންކުން ވަނީ ރ. އަތޮޅާއި ހއ. އަތޮޅަށް ހިދުމަތްތައް ފުޅާ ކޮށްފައި --- ފޮޓޯ/އެމްއައިބީ
އެމްއައިބީގެ އިތުރު ކާމިޔާބީތަކަށް ބަލާއިރު އެ ބޭންކުން ވަނީ ވިސާ ޑެބިޓް، ވިސާ ޕްލެޓިނަމް، ވިސާ ބިޒްނަސް ޑެބިޓް އަދި ސަޕްލިމެންޓަރީ ކާޑުގެ ހިދުމަތް ތައާރަފުކޮށް، އެމްއައިބީ ގްލޯބަލް ޕޭ މެދުވެރިކޮށް އީ-ކޮމާސް ކުރިއަރުވައި، ދުނިޔޭގެ ކޮންމެ ތަނަކުން ވެސް ހިދުމަތް ލިބިގަތުމުގެ މަގު ކަސްޓަމަރުންނަށް ފަހި ކޮށްދީފަ އެވެ.
އިންކްލޫސިވް އަދި ސަސްޓެއިނަބަލް ފައިނޭންސްގެ އެންމެ ކުރީސަފުގައި ފައިތިލަ ސާބިތުކޮށްލުމާ އެކު، އެމްއައިބީ އިން ވަނީ ހަކަތަރި ލޭބަލް ޖަހާފައިވާ އުފެއްދުންތަކަށް ކުޑަ އަގެއްގައި ފައިނޭންސިން ތައާރަފުކޮށްފަ އެވެ. އަދި ހައްޖު ސޭވިންސް އެކައުންޓާއި އުމުރުން 18 އަހަރުން ދަށުގެ ކުދިންނަށް ބީންގާ އެކައުންޓް ޕޯޓްފޯލިއޯ ތައާރަފުކުރުމަކީ އެ ބޭންކުގެ ބޮޑު ކާމިޔާބީއެކެވެ.
މީގެ އިތުރުން ވެސް އެމްއައިބީ އެކައުންޓަށް މުސާރާ ޖަމާކޮށްގެން މިބް9 ކްލަބްގެ މެންބަރަކަށްވެ، ޑިސްކައުންޓުތަކާއި އެކްސްލޫސިވް އޮފާތަށް ލިބުމުގެ ފުރުސަތު އެމްއައިބީ އިން ފަހިކޮށްދީފައި ވެ އެވެ.
އިސްލާމިކް ބެންކުން ތައާރަފްކުރި "ފައިސާ ވެއާ" އަނގޮޓި.
އެމްއައިބީ އިން ތައާރަފުކޮށްފައިވާ މަގުބޫލު ބައެއް އިތުރު ޕްރޮޑަކްޓްތަކަށް ބަލާއިރު ފައިސާ ވެއާ ރިންގާއި ޓެގާއި އުޖާލާ ފައިނޭންސިންގެ އިތުރުން ބިންގާ ކާޑު މިއީ ވަރަށް ފާހަގަކޮށްލެވޭ ޕްރޮޑަކްޓްތަކެވެ. މިއިން ކޮންމެ ޕްރޮޑަކްޓެއް ވެސް އޭގެ ޒާތުގައި ވަރަށް ތަފާތެވެ. ހާއްސަކޮށް ފައިސާ ވެއާ ޕްރޮޑަކްޓްތަކަކީ ކޮންވީނިއެންޓް އަދި ބޭނުންކޮށްލަން ފަސޭހަ ޕްރޮޑަކްޓްތަކެކެވެ.
އެމްއައިބީ އިން ބުނީ މިދިޔަ 15 އަހަރެކޭ އެއްގޮތަށް ކުރިމަގުގައި ވެސް އެ ބޭންކުން މަސައްކަތް ކުރާނީ ކަސްޓަމަރުންގެ އަޑު އަހައި، އެއާ އެއްގޮތައް ހިދުމަތް ބައްޓަންކޮއްގެން ކުރިޔަށް ދިއުމަށް ކަމަށެވެ. އެމްއައިބީގެ ކާމިޔާބީގެ އަސްލަކީ އެ ބޭންކުގެ ކަސްޓަމަރުންް ކަމަށް ގަބޫލުކުރެ އެވެ.
އެންމެ 10 މިލިއަން ޑޮލަރުން ފަށައި އެއް ބިލިއަން ޑޮލަރަށް 15 އަހަރުގެ ތެރޭގައި އެމްއައިބީ ފުޅާވުމަކީ އެ ބެންކަށް ކަސްޓަމަރުން ކުރާ އިތުބާރާ އެކު ލިބުނު ކާމިޔާބީއެކެވެ.