ފޭދޫ ބަނދަރު ބޭރުގައި އަޅާފައި އޮތް ޑައިވިން ދޯންޏެއްގައި މިއަދު އަލިފާން ރޯވެ، ބޭނުން ނުކުރެވޭ ވަރަށް އަނދައިފި އެވެ.
އެމްއެންޑީއެފުން ބުނީ ޑައިވިން ދޯނީގައި ރޯވެގެން ސަދަން އޭރިޔާގެ ފަޔަ ސްޓޭޝަނުން ހަރަކާތްތެރިވަމުންދާ ކަމަށެވެ. އެކަމަކު، އޭގެ އިތުރު ތަފްސީލެއް އަދި ނުލިބެ އެވެ.
ފޭދޫގެ ކައުންސިލް މެމްބަރަކު "މިހާރު"އަށް ވިދާޅުވީ އަލިފާން ރޯވީ މައިނާ ސަފާރީގެ ޑައިވިން ދޯނީގައި ކަމަށެވެ. އެ ހާދިސާގައި އެއްވެސް މީހަކަށް އަނިޔާއެއް ލިބުނު ކަމަށް މައުލޫމާތު ލިބިފައިނުވާ ކަމަށް އޭނާ ވިދާޅުވި އެވެ.
ރަށު ތެރޭގައި ދެކެވޭ ވާހަކަތަކާ ހަވާލައިދީ، އެ ކައުންސިލަރު ވިދާޅުވީ ދޯނީގައި އަލިފާންގަނޑު އިތުރަށް ފެތުރުނީ ގޭސް ފުޅިއެއް ގޮވައިގެންނެވެ.
"މަންޒަރު ފެންނައިރު ލަފާކުރަނީ އެހެން،" އޭނާ ވިދާޅުވި އެވެ.
އެ އަލިފާންގަނޑު އަދިވެސް އެއްކޮށް ނިއްވައެއްނުލެވެ އެވެ. އެކަމަކު، މިހާރު ވެސް ދޯނި ބޭނުން ނުކުރެވޭ ވަރަށް ވަނީ އަނދައިފަ އެވެ.