15 އެޕްރީލް 2017 - 00:18
ތެހެރާން (އެޕްރީލް 14) - އީރާނުގެ ރައީސްކަމުގެ ހަތަރު އަހަރުގެ ދެ ވަނަ ދައުރަކަށް ވާދަކުރެއްވުމަށް ހަސަން ރޫހާނީ މިއަދު ރަޖިސްޓްރީ ކުރައްވައިފި އެވެ.
އީރާނުގެ ރިޔާސީ އިންތިޚާބު އޮންނާނީ އަންނަ މަހު އެވެ. ކުރީގެ ރައީސް މަހްމޫދު އަހުމަދީނިޖާދު ވެސް ވަނީ ރިޔާސީ އިންތިޚާބުގައި ވާދަކުރެއްވުމަށް ރަޖިސްޓްރީ ކުރައްވައިފަ އެވެ.
"އަނެއްކާވެސް އަޅުގަނޑު ރައްޔިތުންގެ ކުރިމައްޗަށް މިއައީ އީރާނަށްޓަކައި، އިސްލާމް ދީނަށް ޓަކައި، މިނިވަން ކަމަށް ޓަކައި އަދި ގައުމުގެ ހަމަޖެހުމަށް ޓަކައި. އަޅުގަނޑު މި އެދެނީ އީރާނަށް ޓަކައި، އިސްލާމް ދީނަށް ޓަކައި ވޯޓު ދިނުމަށް،" ނޫސްވެރިންނާ ވާހަކަ ދައްކަވަމުން ރޫހާނީ ވިދާޅުވި އެވެ.
އީރާނުގެ ރައީސް ކަމަށް ރޫހާނީ ވަޑައިގެންނެވީ 2013 ވަނަ އަހަރު އެވެ.
މެއި މަހު 19 ވަނަ ދުވަހު އޮންނަ އިންތިޚާބަށް ރަޖިސްޓްރީ ކުރަން ހުޅުވާލީ އަންގާރަ ދުވަހު އެވެ. ފަސް ދުވަހުގެ މުއްދަތު ހަމަވާނީ ހޮނިހިރު ދުވަހު އެވެ. މިހާތަނަށް ވަނީ 950 ކެންޑިޑޭޓުން ރަޖިސްޓްރީ ކޮށްފަ އެވެ. ގާޑިއަން ކައުންސިލުން ކެންޑިޑޭޓުން ސްކްރީން ކުރުމަށް ފަހު ކެންޑިޑޭޓުންގެ ލިސްޓް އިއުލާން ކުރާނީ މި މަހު 27 ވަނަ ދުވަހު އެވެ.