އެންމެ ފަހުގެ ޗެމްޕިއަން ޕީއެސްޖީ، އެންމެ
ފަހުގެ ރަނަރަޕް އާސެނަލް މި ސީޒަނުގެ ޔުއެފާ ޗެމްޕިއަންސް ލީގުގައި ކުޅުނު
ފުރަތަމަ މެޗުތަކުން މޮޅުވެއްޖެ އެވެ.
ޕީއެސްޖީ އަމިއްލަ ދަނޑުގައި މޮޅުވީ
ސްލޮވާކިއާގެ ސްލޮވަން ބްރަޓިސްލާވާ އަތުން 6-1 އިންނެވެ. އާސެނަލް މޮޅުވީ
އިޓަލީގެ ނަޕޯލީ އަތުން ރަށުން ބޭރުގައި 1-0 އިންނެވެ.
ފްރާންސް ލީގުގައި ކުޅުނު ފުރަތަމަ ތިން
މެޗުން ވެސް މޮޅެއް ނުލިބި އޮތް ޕީއެސްޖީން ޖެހިޖެހިގެން ތިން ވަނަ ފަހަރަށް
ޔޫރަޕުގެ ޗެމްޕިއަންކަން ހޯދުމުގެ އަޒުމުގައި ފެށި ދަތުރު ފެށީ ފަސޭހަކަމާ އެކު
އެވެ.
ޕީއެސްޖީއާ އަލަށް ގުޅުނު ސްޕެއިން
ފޯވާޑް ފެރަން ޓޮރޭސް މި މެޗުގައި ހެޓްރިކެއް ހެދި އެވެ. އޮސްމާނޭ ޑެމްބެލޭ ދެ
ގޯލު ޖެހިއިރު ފަހު ގޯލު ވައްދާލީ ފަބިއަން ރުއިޒް އެވެ.
ނަޕޯލީ އަތުން އާސެނަލް މޮޅުވި
މެޗުގައި އެ ޓީމުގެ ހަމައެކަނި ލަނޑު 75 ވަނަ މިނެޓުގައި ޖެހީ މި ސީޒަނުގައި
ވަރަށް ރަނގަޅު ފޯމެއްގައި ކުޅެމުން އަންނަ ކެޕްޓަން މާޓިން އޮޑެގާޑެވެ. އެންމެ
ގޯލެއް ޖެހުނު ނަމަވެސް އާސެނަލުން މި މެޗުގައި 26 ޝޮޓު ފޮނުވާލި އެވެ. މިއީ
ޗެމްޕިއަންސް ލީގުގައި އާސެނަލުން ރަށުން ބޭރުގައި އެންމެ ގިނަ ޝޮޓު އުފެއްދި
މެޗެވެ.
އާސެނަލްގެ ކޯޗު މިކޭލް އާޓެޓާ ބުނީ
ފުރަތަމަ މިނެޓުން ފެށިގެން އޭނާގެ ޓީމުން ކުޅުނީ ވަރަށް އެޓޭކިން، އުފެއްދުންތެރި
ފުޓްބޯޅައެއް ކަމަށާއި، އެކަމަކު އެކަން ސްކޯ ބޯޑުން ނުފެނުނު ކަމަށެވެ.
"މިއަށް ވުރެ ނިންމާލުން ތަންކޮޅެއް
ރަނގަޅުވި ނަމަ ތަފާތު ބޮޑު ނަތީޖާއެއް ފެނުނީސް. އެ ހިސާބަށް އަދި ދެވޭނެ،"
އާސެނަލް އާއި ނަޕޯލީ ކުޅުނު މެޗުގެ ތެރެއިން: އާސެނަލް މޮޅުވީ 1-0 އިން. -- ފޮޓޯ: އޭއެފްޕީ
އާސެނަލުން މި ވަނީ މި ސީޒަނުގައި
މިހާތަނަށް ކުޅުނު ހަތަރު މެޗު ވެސް ކާމިޔާބުކޮށްފަ އެވެ. ޕްރިމިއާ ލީގުގެ
ފުރަތަމަ ތިން މެޗުން މޮޅުވެ އެ ޓީމު އޮތީ އެއް ވަނައިގަ އެވެެ.
މުބާރާތުގައި ރޭ ސްޕެއިނުގެ ގަދަބާރު
ބާސެލޯނާ އިން ވަނީ އަމިއްލަ ދަނޑުގައި ނެދަލެންޑްސްގެ ފެޔަނޫޑް އަތުން 5-1 އިން
މޮޅުވެފަ އެވެ. މި މެޗުގައި އެ ޓީމުގެ ކެޕްޓަން ރަފީނިއާ ދެ ގޯލު ޖެހި އެވެ.
އަނެއް ތިން ގޯލް ޖެހީ އަލަށް ގުޅުނު ކަރީމް އަޑެޔެމީ އާއި ގެބްރިއަލް ޖީސުސް
އަދި، ލަމީން ޔަމާލެވެ.
ބާސެލޯނާ ވަނީ މި ސީޒަނުގައި
މިހާތަނަށް ކުޅުނު ފަސް މެޗުން ވެސް މޮޅުވެފަ އެވެ. އޭގެ ތެރެއިން ހަތަރު މެޗުގައި
ފަސް ގޯލު ޖެއްސެވެ. އެ ޓީމުގެ ކޯޗު ހަންސީ ފްލިކް ބުނީ މިއީ ބާސެލޯނާގެ ސްޓައިލް
ކަމަށެވެ.
"އަހަރެމެން މެޗު ކޮންޓްރޯލްކުރިން.
އެޓޭކް ޑޮމިނޭޓްކުރިން. މިގޮތަށް އަބަދުވެސް ކުޅެން ބޭނުންވަނީ،"
އިނގިރޭސި ގަދަބާރު ލިވަޕޫލް ވަނީ ރޭ
އަމިއްލަ ދަނޑުގައި ސްޕެއިނުގެ އެތުލެޓިކޯ މެޑްރިޑް އަތުން މޮޅުވެފަ އެވެ. މި
މެޗުގެ 17 ވަނަ މިނެޓުގައި މާކޯސް ލޮރެންޓޭގެ ގޯލުން އެތުލެޓިކޯ ކުރި ހޯދި އެވެ. ލިވަޕޫލް
މޮޅުވީ ޑޮމިނިކް ޒޮބޮސްލައި އާއި އެލެކްސިސް މެކްއެލިސްޓާ ޖަހައިދިން ގޯލުތަކުންނެވެ.
މިއީ ލިވަޕޫލުގެ އާ ކޯޗު އެންޑޯނީ އިރައޯލާ،
ޗެމްޕިއަންސް ލީގުގައި ކޯޗުކޮށްދިން ފުރަތަމަ މެޗެވެ. އޭނާ ބުނީ އުނދަގޫ
ފެށުމަކަށް ފަހު ދެ ވަނަ ހާފުގައި ކުޅުންތެރިން ދެއްކި ކުޅުމާ މެދު ހިތްހަމަޖެހޭ
ކަމަށެވެ.