20 އެޕްރީލް 2017 - 16:19
ހަރާރޭ (އެޕްރީލް 20) - ޒިމްބާބުވޭގެ ރައީސް ރޮބާޓް މުގާބެއާ ދެކޮޅަށް އެ ގައުމުގައި އިދިކޮޅު އިއްތިހާދެއް އުފައްދައިފި އެވެ.
އިއްތިހާދުގައި ހިމެނެނީ ޒަމާނުއްސުރެ މުގާބޭ އަށް ފާޑުކިޔަމުންދާ މޯގަން ސުވަންގިރާއީ އާއި ކުރީގެ ނައިބް ރައީސް ޖޮއިސް މުޖުރޫ އެވެ. ދެ ބޭފުޅުން ވެސް ވިދާޅުވެފައި ވަނީ ކުރިއަށް އޮތް އިންތިޚާބުގައި މަސައްކަތް ކުރާނީ މުގާބެއާ ދެކޮޅަށް ކަމަށެވެ. ނަމަވެސް މީގެ ތެރޭން ރިޔާސީ ކެންޑިޑޭޓަކީ ކޮން ބޭފުޅެއް ކަމެއް އަދި ނޭނގެ އެވެ.
"މިއީ މުގާބޭއާ ދެކޮޅަށް ފުޅާ ކޯލީޝަނެއް އުފެއްދުމުގެ ފެށުން،" ނޫސްވެރިންނާ ވާހަކަ ދައްކަވަމުން ސުވަންގިރާއީ ވިދާޅުވި އެވެ.
ސުވަންގިރާއީ ވަނީ މުގާބޭއާ ދެކޮޅަށް މީގެ ކުރިން އެތައް ފަހަރަކު ރިޔާސީ އިންތިޚާބުގައި ވާދަކޮށްފަ އެވެ. އެއިން ކޮންމެ ފަހަރަކު ވެސް އޭނާ ވިދާޅުވެފައި ވަނީ ވޯޓު އޮޅުވާލާފައިވާ ކަމަށެވެ. އެންމެ ފަހުން މުގާބޭއާ އެކު ކޯލީޝަނެއް އުފައްދާ ސުވަންގިރާއީ ވަނީ 2009 ވަނަ އަހަރު ބޮޑު ވަޒީރަކަށް ހަމަޖައްސައިފަ އެވެ. އޭނާ އަށް މަގާމުގައި ހުންނެވީ 2013 ވަނަ އަހަރާ ހަމައަށެވެ. މުޖުރޫ ވަނީ މުގާބޭގެ ނައިބްކަން 10 އަހަރު ކޮށްފަ އެވެ. އޭނާ 2014 ވަނަ އަހަރު މަގާމުން ދުރުކުރުމުން ވަނީ ނޭޝަނަލް ޕީޕަލްސް ޕާޓީ އުފައްދައިފަ އެވެ.
އިނގިރޭސިންގެ އަތުން ޒިމްބާބުވޭ އަށް 1980 އަށް އަހަރު މިނިވަންކަން ލިބުނު ފަހުން ވެރިކަން ކުރަނީ އުމުރުން މިހާރު 93 އަހަރުގެ މުގާބޭ އެވެ. އަންނަ އަހަރު އޮންނަ އިންތިޚާބުގައި ވެސް ވާދަކުރައްވާނެކަން މުގާބޭ މިހާރު ވަނީ އިއުލާން ކުރައްވައިފަ އެވެ. މުގާބޭގެ އަނބިކަނބަލުން ގްރޭސް މުގާބޭ ދާދި ފަހުން ވިދާޅުވެފައި ވަނީ މުގާބޭގެ ފުރާނަ ނެތް މަސްގަނޑު އިންތިޚާބުގައ ވާދަކުރި ނަމަވެސް ހޮވޭނެ ކަމަށާއި އެހާވެސް އޭނާގެ މަގްބޫލްކަން ބޮޑު ކަމަށެވެ.