25 އެޕްރީލް 2017 - 06:33
ބައެއް ވައްތަރުގެ ކޮކާފަންޏަކީ ޕްލާސްޓިކް ކޮތަޅު ނައްތާލަން ބޭނުންކުރެވިދާނެ އެއްޗެއްކަން ސައިންސްވެރިޔަކަށް އޮޅުމަކުން އެނގިއްޖެ އެވެ.
ސްޕެނިޝް ނެޝަނަލް ރީސާޗް ކައުންސިލްގެ ސައިންޓިސްޓެއް ކަމަށްވާ ފެޑެރިކާ ބާޓޮޗީނީ އަށް މިކަން އެނގުނީ ހުސްވަގުތު ފުރާލުމުގެ ގޮތުން އޭނާ ގެންގުޅޭ މާމުއިކުޅަނދުރުތަކުގެ ހަތާގައި ކޮކާފަނި ހުރުމުން އެ އެއްޗެހި ނަގައި ޕްލާސްޓިކް ކޮތަޅަކަށް ލާފައި ހުއްޓާ ކޮތަޅު ކާލައިގެން އެ ސޫފިތައް ނިކުތުމުންނެވެ.
"އެ އެއްޗެހި ކޮތަޅަށް އަޅައި ބަންދުކޮށްފައި ބެހެއްޓީ ކޮޓަރި ތެރޭގައި. ފަހުން އައިސް ބެލި އިރު މުޅި ކޮޓަރި ތެރޭ އެ ފަނިތައް. ކޮތަޅުގައި ބައިވަރު ލޯވަޅުތައް ހަދާފައި ހުރި،" އޭނާ ބުންނެވެ.
މި ހާދިސާއާ އެކު ބާޓޮޗީނީ، އޭނާއާ އެކު މަސައްކަތްކުރާ ސައިންސްވެރިންނާއި ކޭމްބްރިިޖް ޔުނިވަސިޓީއާ ގުޅިގެން މިކަމުގައި އިތުރު ހޯދުންތައް ހޯދަން ފެށި އެވެ. އެގޮތުން، ކޮތަޅު ކާލި ވައްތަރުގެ، ގެލޭރިއާ މެލޯނެއްލާ ކޮކާފަނީގެ ކެއުމުގެ އާދަ ހުންނަ ގޮތް ބެލި އެވެ. ލެބޯޓަރީގައި ކުރި ތަހުލީލުން އެނގުނު ގޮތުގައި މީގެ 100 ކޮކާފަންޏަށް 12 ގަޑިއިރު ތެރޭ 92 މިލިގްރާމްގެ ޕްލާސްޓިކް ކެވެ އެވެ.
މީގެ ފަންޏަކީ ޕްލާސްޓިކް ކާން ވަރު ހުންނަ އެއްޗެއްކަން އެނގިފައި ވާއިރު މީގެ ބޭނުން ވަރަށް ރަނގަޅަށް ހިފިދާނެ ކަމަށް ސައިންސްވެރިން ގަބޫލުކުރެ އެވެ.
މި ވައްތަރުގެ ފަނި މާމުއިކުޅަނދުރުގެ ހަތަޔަށް ހަމަލާ ދެނީ އޭގައި ހުންނަ ވެކްސްތައް ކެއުމަށެވެ. ސައިންސްވެރިން ވަނީ ކޮކާފަނި ޕްލާސްޓިކް ކުދިކޮށް ކޮށައި އުކާލަނީތޯ ނުވަތަ ކަނީތޯ ޔަގީންކޮށްފަ އެވެ.
ސައިންސްވެރިން އުންމީދުކުރަނީ އުކާލާ ޕްލާސްޓިކް މަދުކުރުމަށް މި ފަނިތަކުގެ ބޭނުން ކުރެވިދާނެ ކަމަށެވެ. ޕްލާސްޓިކް ހަލާކުކޮށްލުމަށް މި ފަނިތަނުން އުފައްދަނީ ކޮން އެންޒައިމެއްތޯ ބަލައި ޕްލާސްޓިކާ ދެކޮޅު ހަނގުރާމާގައި ކުރިއެރުން ހޯދިދާނެ ކަމުގެ އުންމީދު މި ފަނިތަކުގެ ސަބަބުން ސައިންސްވެރިންނަށް ވަނީ ލިބިފަ އެވެ.
އެވްރެޖް ގޮތެއްގައި، ކޮންމެ މީހަކު އަހަރަކު 200 ޕްލާސްޓިކް ކޮތަޅު ބޭނުންކުރެ އެވެ. ޕްލާސްޓިކް ކޮތަޅެއް އެއްގަމުގައި އޮވެގެން ހަލާކުވެ ނެތި ދާން 100-400 އަހަރު ނަގަ އެވެ.