19 ޖޫން 2016 - 02:28
ޕެރިސް، ފްރާންސް (ޖޫން 19) - ޔޫރޯގެ ހަތަރު މުބާރާތެއްގައި ލަނޑު ޖެހި ފުރަތަމަ ކުޅުންތެރިޔާ އަށް ވުމަށާއި ޕޯޗުގަލް މޮޅުކޮށްދޭން އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ އަށް ލިބުނު ރަނުގެ ފުރުސަތު މިރޭ އޭނާ ނަގާލިއިރު، އޮސްޓްރިއާއާ 0-0 އިން އެއްވަރުވެ ޕޯޗުގަލް އަށް ހާސްކަމާ ކުރިމަތިލާން ޖެހިއްޖެ އެވެ.
މެޗުގެ ފަހުކޮޅު ޕޯޗުގަލަށް ލިބުނު ޕެނަލްޓީ ރޮނާލްޑޯ އަތުން ބޭކާރުވިއިރު، ޖެހިޖެހިގެން ދެ މެޗުން އެއްވަރުވެ ޕޯޗުގަލް އޮތީ ދެ ޕޮއިންޓާ އެކު ލަނޑުގެ ތަފާތުން ގްރޫޕް އެފް ގެ ތިން ވަނައިގަ އެވެ. އެއް ވަނައިގައި ހަތަރު ޕޮއިންޓާ އެކު ހަންގޭރީ އޮތްއިރު ދެ ޕޮއިންޓާ އެކު ދެ ވަނައިގައި އޮތީ ފުރަތަމަ މެޗުގައި ޕޯޗުގަލާ 1-1 އިން އެއްވަރުކުރި އައިސްލެންޑެވެ. ފުލުގައި އެއް ޕޮއިންޓާ އެކު އޮތީ އޮސްޓްރިއާ އެވެ.
ގްރޫޕުގެ ގަދަ ދެ ޓީމުގެ ތެރޭ ހިމެނިގެން ދެ ވަނަ ބުރަށް ދިއުމަށް ޕޯޗުގަލަށް ވަނީ ހަންގޭރީއާ ދެކޮޅަށް ކުޅޭ ފަހު މެޗުން މޮޅެއް ހޯދަން މަޖުބޫރުވެފަ އެވެ. ފަހު މެޗު އެއްވަރުކޮށްލައިގެން ވެސް ޕޯޗުގަލަށް ކިރިޔާ ވެސް ފުރުސަތެއް އޮންނާނީ އައިސްލެންޑާއި އޮސްޓްރިއާގެ މެޗު ވެސް އެއްވަރުވެގެންނެވެ. އެންމެ ފަސޭހަ ގްރޫޕް ކަމަށް ބެލެވުނު މި ގްރޫޕުގެ ހަތަރު ޓީމަށް ވެސް ދެ ވަނަ ބުރުގެ ފުރުސަތު އެއްކޮށް ނުގެއްލެ އެވެ.
ދެ ޓީމުގެ ފަރާތުން ވެސް ވަރަށް އަވަސް އަދި އެޓޭކިން ފުޓްބޯޅައެއް ފެނިގެން ދިޔަ މެޗުގެ ފުރަތަމަ ހާފުގައި ޕޯޗުގަލަށް ލީޑު ނަގަން ރަނގަޅު ދެ ފުރުސަތެއް ލިބުނެވެ. އެކަމަކު ތިން ވަނަ މިނެޓުގައި އޮސްޓްރިއާ އިން ލަނޑެއް ނުޖެހީ ކިރިޔާ އެވެ. އަރިމަތިން ނެގި ހުރަސް އޭރިއާ ތެރޭ، ގޯލް ބުޑުގައި ހުހަށް ހުރި މާޓިން ހަނިޗް ބޮލުން ޖެހުމުން ދިޔައީ ގޯލް ދަނޑި ކައިރިން ބޭރަށެވެ.
ފުރަތަމަ ހާފުގެ 12 ވަނަ މިނެޓުގައި ޕޯޗުގަލްގެ ނާނި ބޯޅަ ހިފައިގެން އޭރިއާ ތެރެއަށް ވަދެ އޮސްޓްރިއާ ޑިފެންޑަރެއް ކައިރިން ނައްޓާލުމަށް ފަހު އެކަނިމާއެކަނި ހުރެ ޖެހި ބޯޅަ އޮސްޓްރިއާ ގޯލްކީޕަރު ވަނީ ފައިން ޖައްސައި ބޭރުކޮށްފަ އެވެ. އޭގެ 10 މިނެޓު ފަހުން ނާނި ނެގި ހުރަހަކުން އޭރިއާ ތެރެއިން ރޮނާލްޑޯ ފޮނުވާލި ބޯޅަ ދިޔައީ ދަނޑި ކައިރިން ބޭރަށެވެ.
ފުރަތަމަ ހާފު ނިމެން ފަސް މިނެޓަށް ވެފައިވަނިކޮށް އޮސްޓްރިއާގެ ބަޔާން މިއުނިކުގެ ތަރި ޑޭވިޑް އަލަބާ ނެގި ހިލޭ ޖެހުމެއް ޕޯޗުގީސް ޑިފެންޑަރުން ވަނީ ގޯލް ރޮނގުމަތިން ސަލާމަތްކޮށްފަ އެވެ.
ދެ ވަނަ ހާފުގައި ފެނިގެން ދިޔައީ ރޮނާލްޑޯ ރަނުގެ ތިން ފުރުސަތެއް ބޭކާރުކުރި ތަނެވެ. އެގޮތުން އޭރިއާ ތެރެއިން ހުސްކޮށް ހުރެ ބޮލުން ފޮނުވާލި ދެ ބޯޅައެއް ބޭކާރުވި އިރު 77 ވަނަ މިނެޓުގައި އޭނާ ޖެހި ޕެނަލްޓީ އަމާޒުވީ ދަނޑިއަށެވެ. މިއީ އޭރިއާ ތެރެއިން އޮސްޓްރިއާ ޑިފެންޑަރަކު ރޮނާލްޑޯ ބިމާހަމަކޮށްލުމުން ރެފްރީ ދިން ޕެނަލްޓީއެކެވެ. ޔޫރޯ 2004، 2008 އަދި 2012 ވަނަ އަހަރު ވެސް ލަނޑު ޖެހި ފޯވާޑް އެ ޕެނަލްޓީ ކާމިޔާބުކުރި ނަމަ އޭނާ ވެގެންދާނީ ހަތަރު ޔޫރޯގައި ލަނޑު ޖެހި ފުރަތަމަ ކުޅުންތެރިޔާ އަށެވެ. ޕެނަލްޓީ ޖެހުމުގައި ކާމިޔާބު ރޮނާލްޑޯގެ ނަސީބު މިރޭ ވަރަށް ދެރަ އެވެ. އެކަމަކު އޭނާ މެޗަށް އެރީ އެހެން ރެކޯޑަކާ އެކު އެވެ. އެއީ ޕޯޗުގަލް ގައުމީ ޓީމަށް އެންމެ ގިނަ މެޗު ކުޅެދީގެން ލުއިސް ފީގޯ ހަދާފައިވާ ރެކޯޑް މުގުރާލައިގެންނެވެ. މިރޭގެ މެޗަކީ ރޮނާލްޑޯ ޕޯޗުގަލް ގައުމީ ޓީމަށް ކުޅުނު 128 ވަނަ މެޗެވެ.