12 މެއި 2017 - 07:40
ގިނަ ދުވަސްތަކެއް ވަންދެން ރައްޓެހިވެގެން އުޅުމަށްފަހު ކެޓުރީނާ ކައިފްއާ ރުޅިވުމަކީ ރަންބީރު ކަޕޫރަށް ވަރަށް އުނދަގޫވި ކަމެކެވެ. ނަމަވެސް ކެޓުރީނާ ހަނދާން ނައްތާލައި ދިރިއުޅުމައިގެން ކުރިޔަށް ދާން ރަންބީރު ވަނީ ނިންމާފަ އެވެ. ރަންބީރަށް މިކަމުގައި އެހީތެރިވެދެނީ އޭނާގެ މަންމަ ނީތޫ ކަޕޫރެވެ. އެގޮތުން ނީތޫ ވަނީ މަންމަ ދައްކާ މީހަކާ ކައިވެނިކުރަން ރަންބީރު ލައްވާ އެއްބަސް ކުރުވާފަ އެވެ.
ރަންބީރާ ކައިވެނިކުރަން ކަމުދާ މީހަކު ނީތޫ ހޯދީ ލަންޑަނުންނެވެ. އެއީ ލަންޑަންގައި ދިރިއުޅޭ އިންޑިއާ ވިޔަފާރިވެރިއެއްގެ ދަރިއެއް ކަމަށްވެ އެވެ. ލަންޑަންގައި ތިބި ނީތޫގެ އެކުވެރިން މެދުވެރިކޮށް އޭނާ ހޯދި މި އަންހެންކުއްޖާ ދައްކަން ދާދިފަހުން ނީތޫ ވަނީ ރަންބީރު ގޮވައިގެން ލަންޑަނަށް ދަތުރެއް ކޮށްފަ އެވެ.
ރަންބީރު، 34، މިހާތަނަށް ރައްޓެހިވެފައި ވަނީ މުޅިން ވެސް ފިލްމީ ބަތަލާއިންނާ އެވެ. މިއީ އޭނާގެ މަންމަ ނީތޫ ހިތްހަމަޖެހޭ ކަމެއް ނޫނެވެ. ނީތޫ ބޭނުންވަނީ އޭނާގެ ދަރިފުޅު ބޮލީވުޑާ އެއްވެސް ގުޅުމެއް ނެތް މީހަކާ ކައިވެނި ކުރުވާށެވެ.
އިންޑިއާގެ ނޫސްތަކުން ރިޕޯޓުކޮށްފައިވާ ގޮތުގައި ލަންޑަނުން ބައްދަލުކުރި އަންހެންކުއްޖާ ރަންބީރަށާއި ނީތޫ އަށް ވެސް ވަރަށް ކަމުދިޔަ އެވެ. މިހާރު އޮތީ ހުރިހާ ކަމެއް ނިންމުމުގެ މަރުހަލާ ކަމަށްވެ އެވެ.
ރަންބީރު އޭނާގެ ބައްޕަ ރިޝީ ކަޕޫރަށް ވުރެ އަބަދުވެސް މަންމައާ މާ ގާތެވެ. ނަމަވެސް މަންމަ ދައްކާ މީހަކާ އޭނާ ކައިވެނިކޮށްފާނެ ކަމަކަށް އެއްވެސް މީހަކު ހިއެއް ނުކުރެ އެވެ. ނަމަވެސް ޝާހިދު ކަޕޫރު ފަދަ އެކްޓަރުން އެރޭންޖް މެރިޖެއްގައި އުފާވެރި ދިރިއުޅުމެއް އުޅޭތަން ފެނުމަކީ ރަންބީރު ވެސް މަންމަ ދައްކާ މީހަކާ ކައިވެނިކުރަން އެއްބަސްވި ސަބަބަކަށް ވެދާނެ އެވެ.
ތަންކޮޅެއް ކުރިން ރަންބީރު ދީފައިވާ އިންޓަވިއުއެއްގައި އާ ލޯބިވެރިޔަކު ލިބިދާނެކަމަށް އުންމީދުކުރާ ކަމަށް ބުންޏެވެ. ނަމަވެސް އޭނާ އުންމީދުކުރި ގޮތަށް މިހާތަނަށް އެއްވެސް ފަހަރަކު ކަންތައް ވެފައި ނެތް ކަމަށް އެ އިންޓަވިއުގައި ރަންބީރު ބުންޏެވެ.
"އުމުރުން 28 އަހަރުގައި ކައިވެންޏެއްކޮށް 30 އަހަރުގައި ދަރިއަކު ހޯދުމަކީ އަހަރެން ފުރަތަމަ ރާވައިގެން ހުރި ގޮތް. އެކަމަކު އެގޮތަކަށް ކަންތަކެއް ނުވި. ނަމަވެސް އަހަރެންގެ އުންމީދުތައް އަދިވެސް ހުރީ އެފަދަ ގޮތަކަށް. މީހަކާ އިނދެގެން އަވަހަށް ކުއްޖެއް ހޯދަން. އަހަންނާ ޚިޔާލު އެއްގޮތް މީހަކު ލިބޭއިރަށް އެމީހަކު ދެކެ ލޯބިވެ އެހިސާބުން އޭނާއާއެކު ދިރިއުޅުމެއް އާރާސްތުކުރަން އަހަރެން މިހިރީ ތައްޔާރަށް،" ރަންބީރު ބުންޏެވެ.