17 މެއި 2017 - 22:27
އިސްލާމިކް ސޮލިޑާރިޓީ ގޭމްސްގެ 200 މީޓަރު ދުވުމުން ވެސް ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު ފައިނަލުން ޖާގަ ހޯދައިފި އެވެ.
އަޒަރުބައިޖާނުގެ ބަކޫގައި ކުރިއަށްދާ ގޭމްސްގެ މި އިވެންޓުން އޭނާ ފައިނަލުން ފުރުސަތު ހޯދީ މިރޭ ސެމީ ފައިނަލުގެ ފުރަތަމަ ހީޓުގެ ތިން ވަނަ ހޯދައިގެންނެވެ. އޭނާ ރޭސް ނިންމީ 21:30 ސިކުންތުންނެވެ. މި ހީޓުގެ އެއް ވަނަ ހޯދީ 21:11 ސިކުންތުން ދުވި ބަހުރޭނުގެ ޔާގޫބް ސަލީމެވެ. ދެ ވަނަ އަކީ ސަރިނަމްގެ ވަނާން ޖެފްރީ އެވެ. އޭނާގެ ޓައިމިން އަކީ 21:30 ސިކުންތެވެ.
ސެމީ ފައިނަލުގެ ތިން ވަނަ ހީޓުގައި ރާއްޖޭގެ އަހުމަދު ސަރީސް ވާދަކުރި ނަމަވެސް ފައިނަލުން ފުރުސަތެއް ނުލިބެ އެވެ. އޭނާ ހީޓުގެ އަށް ވަނަ އަށް ދިޔައިރު ރޭސް ނިންމާފައިވަނީ 23:15 ސިކުންތުންނެވެ. ސެމީގައި ވާދަކުރުމަކީ ވެސް އުއްމީދީ ދުވުންތެރިޔާ ސަރީސަށް ބޮޑު ކާމިޔާބެވެ. އޭނާ ސެމީން ފުރުސަތު ހޯދީ މިއަދު ހެނދުނު ފުރަތަމަ ބުރުގެ ތިން ވަނަ ހީޓުގައި 22:95 ސިކުންތުން ދުވެ ހަތަރު ވަނަ ހޯދައިގެންނެވެ.
ގޭމްސްގެ 100 މީޓަރު ދުވުމުގެ ފައިނަލުގައި ރޭ ވާދަކޮށް ހަތަރު ވަނަ ލިބުނު ސާއިދު 200 މީޓަރުގެ ފައިނަލުގައި ވާދަކުރާނީ މާދަމާރޭ ރާއްޖެ ގަޑިން 19:55 ގަ އެވެ.
ސާއިދު އަންނަނީ އޭނާ ވާދަކުރާ ކޮންމެ މުބާރާތެއްގައި ވެސް ރަނގަޅު ކާމިޔާބީތަކެއް ހޯދަމުންނެވެ. އޭނާ ވަނީ 2015 ވަނަ އަހަރުގެ އިންޑިއަން އޯޝަން އައިލެންޑް ގޭމްސްގެ 100 މީޓަރު ދުވުމުން ރަން މެޑަލް ހޯދައި ރާއްޖެ އަށް ބައިނަލްއަގްވާމީ ކުޅިވަރު ގޭމްސް އަކުން ރާއްޖެ އަށް ރަން މެޑެއްޔެއް ގެނެސްދިސް ފުރަތަމަ އެތުލީޓުގެ ޝަރަފް ހޯދައިފަ އެވެ. އޭނާ ވަނީ އެ ގޭމްސްގެ 200 މީޓަރު ރޭހާއި މިދިޔަ އަހަރުގެ ސައުތު އޭޝިއަން ގޭމްސްގެ 100 މީޓަރާއި 200 މީޓަރު ދުވުމުން ރިހި މެޑަލް ހޯދައިފަ އެވެ. ރާއްޖޭގެ ކުޅިވަރު ތާރީހު ދުށް އެންމެ ކާމިޔާބު އެއް އެތުލީޓް ސާއިދުގެ ވަނީ މިދިޔަ އަހަރުގެ ރިއޯ އޮލިމްޕިކްސްގެ ޕްރިލިމިނަރީ ބުރުގެ އެއް ވަނަ ހޯދައި، އެ ޝަރަފް ހޯދި ފުރަތަމަ ދިވެހި ދުވުންތެރިޔާއަށް އަށް ވެސް ވެފަ އެވެ.