22 މެއި 2017 - 06:20
ބޮލީވުޑް ތަރި އާމިރު ޚާންގެ "ދަންގަލް" ރިލިޒްކުރިތާ ދުވަސްތަކެއް ވިޔަސް އެ ފިލްމު އަދިވެސް އަންނަނީ އެކި ގައުމުތަކުގައި އާ ރެކޯޑްތައް ގާއިމުކުރަމުންނެވެ. އެގޮތުން ޗައިނާގެ ބޮކްސް އޮފީހުގައި މި ފިލްމު ވަނީ މިހާތަނަށް 100 މިލިއަން ޑޮލަރު ހޯދާފަ އެވެ.
ނިތޭޝް ތިވާރީ ޑައިރެކްޓްކޮށްފައިވާ މި ފިލްމު ޗައިނާގެ ކުދި ބޮޑު އެންމެންނަށް ވަނީ ވަރަށް ކަމުގޮސްފަ އެވެ.
"ދަންގަލް" އަކީ ޗައިނާގައި ހޮލީވުޑް ފިލްމަކަށް ފިޔަވައި ބޭރު ގައުމެއްގެ ފިލްމަކަށް އެންމެ ގިނަ ފައިސާ ލިބުނު ފިލްމަށް ވަނީ ވެފަ އެވެ.
ޓްރޭޑް އެނަލިސްޓް ތަރަން އާދާޝް ކޮށްފައިވާ ޓުވީޓެއްގައި ބުނީ ޗައިނާގައި މި ފިލްމު ރިލީޒްކުރި ފަހުން ތިން ވަނަ ހަފުތާ ކުރިޔަށް ދާއިރު އަދިވެސް ފިލްމަށް މަޑުޖެހުމެއް ނާންނަ ކަމަށެވެ. އެގޮތުން މިދިޔަ ހޮނިހިރު ދުވަހުގެ ނިޔަލަށް 100.69 މިލިއަން ޑޮލަރު ލިބިފައިވާކަން އޭނާ ފާހަގަކުރި އެވެ.
"ދަންގަލް" އަކީ ކުރީގެ މަޝްހޫރު ރެސްލިން ޗެމްޕިއަނެއް ކަމަށްވާ މަހާވީރު ޕޯގަޓް ހަޔާތުގެ މައްޗަށް ކުޅެފައިވާ ފިލްމެކެވެ. އޭނާއަށް ލިބިފައިވާ އަންހެން ދަރިން ރެސްލިން ޗެމްޕިއަނުންނަށް ހަދަން އޭނާ ކުރާ ބުރަ މަސައްކަތް މި ފިލްމުން ފެނިގެން ދެ އެވެ.
މި ފިލްމުގައި އާމިރު ޚާންގެ އިތުރުން އޭނާގެ ކެރެކްޓާގެ އަންހެނުންގެ ރޯލުން ސާކްޝީ ތާންވަރް ފެނިފައިވެ އެވެ. އަދި ދަރިންގެ ރޯލުތަކުން ފާތިމާ ސަނާ ޝޭޚް އާއި ސާންޔާ މަލްހޯތުރާ ފެނެ އެވެ.