23 މެއި 2017 - 05:59
ބޮލީވުޑްގެ "މަންމަ"ގެ ނަމުން މަޝްހޫރު ވެފައިވާ ބަތަލާ ރީމާ ލާގޫ މިދިޔަ ހަފުތާގައި މަރުވުމާ އެކު އޭނާގެ ހަނދާން އާކުރަމުން އަންނައިރު ފިލްމީ ކެރިއަރުގައި ފިލްމު އިންޑަސްޓްރީން އޭނާގެ ހުނަރު އިންސާފުވެރިކަމާ އެކު ބަލައިގެންފައެއް ނުވެ އެވެ.
ރީމާ އަކީ ކޮންމެ ރޯލެއް ދިނަސް އެ ރޯލަކަށް ވަރަށް ހުނަރުވެރިކަމާއި ފަސޭހަ ކަމާއެކު އިންސާފުކޮށްލި ރީތި ބަތަލާ އެކެވެ. ނަމަވެސް ރީމާއަށް ގިނައިން ކުޅެން ލިބިފައި ހުރީ އޭނާއަށް ވުރެ ދޮށީ ނުވަތަ އެއް އުމުރެއްގެ އަދި އޭނާ އަށް ވުރެ ހައެއްކަ އަހަރު ހައްގު އެކްޓަރުންގެ މަންމަގެ ރޯލެވެ. އޭނާގެ އުމުރާ ގުޅޭ، ހުނަރު ދައްކާލެވޭ ކަހަލަ ރޯލުތައް އެއްގޮތަކަށް ވެސް ނުލިބެ އެވެ.
ރީމާ މަންމަ ރޯލު ކުޅެދިން ތަރިންގެ ތެރޭގައި ސަންޖޭ ދަތާއި ރިޝީކަޕޫރު ހިމެނެ އެވެ. މީގެ ތެރެއިން ސަންޖޭ ދަތާއި ރީމާގެ އުމުރު ވަރަށް އެއްވަރެވެ. ރިޝީ ކަޕޫރު މާ ދޮއްޓެވެ.
ރީމާ ހިންދީ ފިލްމުތަކުގައި މަންމަގެ ރޯލުތައް އަދާކުރަން ފެށިއިރު އޭނާގެ އުމުރުން އެންމެ 30 އަހަރެވެ. އެއީ މިހާރު ފިލްމު ކުޅޭ ބަތަލާއިންނަށް ބަލާ ނަމަ ދީޕިކާ ޕަދުކޯން، ޕްރިޔަންކާ ޗޯޕްރާ އަދި ކެޓުރީނާ ކައިފް ފަދަ ބަތަލާއިންގެ އުމުރަށް ވުރެ ވެސް މާ ހަގު އުމުރެކެވެ. ރީމާ ވަނީ ސަލްމާން ޚާން، ޝާހްރުކް ޚާން، މާދުރީ ޑިކްޝިޓް އަދި ސަންޖޭ ދަތު ފަދަ ތަރިންގެ މަންމަގެ ރޯލު ވެސް ކުޅެފަ އެވެ.
ރީމާ މަރުވިއިރު 59 އަހަރެވެ. ސަންޖޭ ދަތުގެ އުމުރުން މިހާރު 57 އަހަރެވެ. އަދި ޝާހްރުކް، މާދުރީ، ސަލްމާން ފަދަ އެކްޓަރުންނަކީ ވެސް ރީމާ އަށް ވުރެ ކުޑަ ތަންކޮޅެއް ހަގު މީހުންނެވެ.
ފިލްމުގެ ވާހަކަ ލިޔުންތެރިއެއް ކަމަށްވާ އަޕޫރްވާ އާސްރާނީ ބުނި ގޮތުގައި ރީމާ ފަދަ ހުނަރުވެރި ބަތަލާއަކަށް އެކަށީގެންވާ ރަނގަޅު ރޯލެއް ލިޔެވުނު ނަމައޭ މިހާރު އޭނާގެ ހިތަށް އަރަ އެވެ. ނަމަވެސް އުމުރުން އެންމެ 30 އަހަރުއްސުރެ އޭނާއާ އެއް އުމުރުގެ އެކްޓަރުންގެ މަންމަގެ ރޯލު ކުޅެން ރީމާ އަށް ހުރީ މަޖްބޫރުވެފައި ކަމަށް އޭނާ ވެސް ގަބޫލު ކުރެ އެވެ.
"މައިނޭ ޕިޔާރް ކިޔާ" ގައި ސަލްމާންގެ މަންމަގެ ރޯލު އަދާކުރިއިރު ރީމާއަށް 30 އަހަރެވެ. އޭގެ ފަހުން "ސާޖަން"، "ހަމް ސާތު ސާތު ހޭ"، ފަދަ ފިލްމުތަކުގައި ވެސް ރީމާ ވަނީ ސަލްމާންގެ މަންމަގެ ރޯލު ކުޅެފަ އެވެ. ނަމަވެސް އެއްވެސް މީހަކަށް ސަލްމާނާއި ރީމާގެ މެދުގައި ހުރި އުމުރުގެ ފަރަގު އެނގުނު ކަމަށް ނުވެ އެވެ. އެ ދެ އެކްޓަރުންގެ ދެމެދުގައި ހުރީ ގާތްގަނޑަކަށް އަށް އަހަރުގެ ފަރަގެކެވެ.
"ޝްރީމާން އާޝިގް"ގައި ރީމާ ކުޅުނީ ރިޝީ ކަޕޫރުގެ މަންމަގެ ރޯލެވެ. ނަމަވެސް ރީމާ އަށް ވުރެ ރިޝީ ފަސް އަހަރު ދޮއްޓެވެ.
ފިލްމު "ހަމް އާޕްކޭ ހޭ ކޯން"ގައި ރީމާގެ ދޮށީ އަންހެންދަރިފުޅުގެ ރޯލު އަދާކުރި ރޭނުކާ ޝަހާނޭ ލިޔެފައިވާ އަސަރުގަދަ މެސެޖުގައި ރީމާއަށް ފިލްމުތަކުން އެކަށީގެންވާ ރަނގަޅު ރޯލުތައް ނުލިބުނު ގޮތަކާ މެދު ސުވާލު އުފައްދާފައިވެ އެވެ.
އޭނާ ބުނި ގޮތުގައި ރީމާ އަށް ރަނގަޅު ރޯލުތައް ނުލިބުމުގެ އެއް ސަބަބަކީ އެ ރޯލުތަކަށް އޭނާ ކުފޫ ހަމަވާ ކަމަށް ރީމާ ގަބޫލު ކުރުމެވެ. މަރާޓީ ފިލްމުތަކުގައި ބަތަލާގެ ރޯލު ކުޅެ މަޝްހޫރުކަން ހޯދާފައިވާ ރީމާ އަކީ ތިއޭޓަރުގައި ކުޅޭ ތަމްސީލުތަކުގައި ވެސް ވަރަށް މުހިއްމު ރޯލުތައް ކުޅެފައިވާ ކުޅަދާނަ މީހެކެވެ.
އެހެންކަމުން ހިންދީ ފިލްމު ކުޅުމުގެ ފުރުސަތު ލިބެން ފެށުމުން ކޮންމެހެން ބަތަލާގެ ރޯލު ރީމާއަކަށް މުހިއްމެއް ނުވި އެވެ.
ބޮލީވުޑް އެންމެންގެ މަންމަ މަރުވީ އެވެ. އަގު ވަޒަން ނުކުރެވި ހުރިކަން އެނގުނީ އަދި ކިރިޔާ އެވެ. މިވަރުގެ މަންމައެއް ބޮލީވުޑަށް ދެން ލިބޭނެ ކަމެއް ނޭނގެ އެވެ.