24 މެއި 2017 - 15:45
ޗައިނާގައި ބޭއްވި ކެއްކުމުގެ މުބާރާތެއްގައި ތިން ދިވެއްސަކު ރަން ވަނަތަކެއް ހޯދައިފި އެވެ.
"ދަ ބެލްޓް އެންޑް ރޯޑް ގެސްޓްރޯޑިޕްލޮމެސީ ޔީޔިން ކަޕް" ނަމުގައި ބޭއްވި މި މުބާރާތުގައި ޕްރޮފެޝަނަލް އިންޑިވިޖުއަލް ކެޓަގަރީން ރަން ވަނަތަކެއް ހޯދީ ހުޅުލެ އައިލެންޑް ހޮޓެލްގެ ދެ ޝެފް، އިބްރާޙިމް ނައީމާއި މުހައްމަދު ނިޔާޒް އެވެ. އެމްބަސީ ކެޓަގަރީން ރަންވަނަ ތަކެއް ހޯދީ ބެއިޖިންގައި ހުންނަވާ ރާއްޖޭގެ ސަފީރު މުހައްމަދު ފައިސަލްގެ އަނބިކަނބަލުން ފާތުމަތު ޖީހާން ސަލީމް އެވެ.
ޗައިނާގައި ހުންނަ ރާއްޖޭގެ އެމްބަސީން ބުނި ގޮތުގައި ދިވެހި ރަހަތައް ތަމްސީލް ކުރި މުބާރާތުގައި ދެބައިން ވެސް ރާއްޖޭގެ ކެއްކުންތެރިން ވަނީ 90 ޕަސަންޓަށް ވުރެ ގިނަ މާކްސް ހޯދައި ގޯލްޑް އެވޯޑު ހާސިލްކޮށްފަ އެވެ.
ބެއިޖިންގައި ހުންނަ ޗައިނާގެ އޮލިމްޕިކް ސްޓޭޑިއަމްގައި ބޭއްވި މި މުބާރާތުގެ ނިންމުމުގެ ރަސްމިއްޔާތުގައި އެކިއެކި ވަނަތައް ހޯދި މީހުންނަށް ތައްޓާއި އިނާމު ހަވާލުކޮށްދެއްވީ ޗައިނާގެ މަޝްހޫރު ޝެފުންނެވެ. މި މުބާރާތުގައި ދުނިޔޭގެ 35 ގައުމަކުން 200 އަށް ވުރެ ގިނަ ކެއްކުންތެރިން ބައިވެރިވި އެވެ.
މިއީ ޗައިނާގެ ގަދީމީ ތާރީޚުގައި މަޝްހޫރު ކެއްކުންތެރިއެއް ކަމަށްވާ ޔީޔިންގެ ޝަރަފްގައި 2001 އިން ފެށިގެން ބާއްވަމުން އަންނަ މުބާރާތެކެވެ.
ޗައިނާ އާއި ރާއްޖެ އާއި ދެމެދު ސިޔާސީ ގުޅުން ގާއިމު ކުރެވުނުތާ މި އަހަރު 45 އަހަރު ފުރުން ފާހަގަ ކުރުމުގެ ގޮތުން އެމްބަސީން ޗައިނާގެ ރައްޔިތުންނަށް ރާއްޖޭގެ ކަންކަން ދައްކައިދީ، އެކިއެކި ރޮނގުތަކުން ރާއްޖެ ޕްރޮމޯޓް ކުރުމަށް ހިންގާ ހަރަކާތްތަކުގެ ތެރޭގައި ހިމެނިގެން ދިވެހި ކެއްކުންތެރިންނަށް ހޯދައި ދިން ފުރުސަތެއް ކަމަށް އެމްބަސީން ބުންޏެވެ.