30 މެއި 2017 - 07:46
މަންމަގެ ބަނޑުން ނުކުތް ގޮތަށް "ހިނގަން ފެށި" ތުއްތު ކުއްޖެއްގެ ވީޑިއޯއެއް ސޯޝަލް މީޑިއާގައި އާންމުވެއްޖެ އެވެ. މި ވީޑިއޯގައި ފެންނަނީ ކުއްޖާ ވިއްސުމަށްފަހު ނަރުހެއްގެ އަތްމަތީގައި ބޭއްވުމާއެކު އެ ދެ ފައިން ކޮއްޕަމުން ހިނގަން މަސައްކަތްކުރާ ތަނެވެ.
ލޯ ވެސް ނުހުޅުވޭ ހާލު އަދި ފައި މައްޗަށް ކޮޅަށް ވެސް ނުހުރެވޭ ހާލުގައި މި ކުއްޖާ ހިނގަން މަސައްކަތް ކުރާތަން ފެނުމުން މީހުންނަށް ލިބުނީ ހައިރާން ކަމެވެ.
ދަރިފުޅު ބިންމަތީގައި ފުރަތަމަ ފިޔަވަޅު އަޅާ ވަގުތަކީ ކޮންމެ މަންމަ އަކާއި ބައްޕަ އަކަށް ވެސް ވަރަށް ބޮޑު އުފަލެއް އިހްސާސް ކުރެވޭ ޚާއްސަ ވަގުތުކޮޅެކެވެ. މި ވަގުތުކޮޅަށް ގިނަ މައިންބަފައިން ކެތްތެރިކަމެއް ނެތި އިންތިޒާރުކުރެ އެވެ. ނަމަވެސް މިފަހަރު މި ތުއްތު ކުއްޖާގެ މަންމަ އާއި އޭނާ ވިއްސި ޑޮކްޓަރުންނާއި ނަރުހުންނަށް ލިބުނީ ވަރަށް ބޮޑު ހައިރާން ކަމެކެވެ. ވިއްސާފައި ނަގައި އަތްތިލަ މަތީގައި ބޭއްވުމާއެކު ކުއްޖާ އުޅުނީ ހިނގާށެވެ.
ފޭސްބުކްގައި، އާލީޓް އާރެންޓެސް ކިޔާ މީހަކު ޕޯސްޓްކޮށްފައިވާ މި ވީޑިއޯ އަކީ ސައްހަ ވީޑިއޯ އެކެވެ. އާއްމުކޮށް ކުދިން ހިނގަން ފަށަނީ އެކުދިންގެ އުމުރުން އެތައް މަހެއް ވާ ފަހުން ނަމަވެސް މި ތުއްތު ކުއްޖާ ތަފާތެވެ.
މި ވީޑިއޯ މިހާތަނަށް 70 މިލިއަން ފަހަރު ބަލާފައިވާއިރު މިލިއަނަކަށް ވުރެ ގިނަ މީހުން ވަނީ ޝެއާ ކޮށްފަ އެވެ.