12 ޖޫން 2017 - 12:55
ޖަލުގައި ހުކުމް ތަންފީޒު ކުރަމުންދާ ކުރީގެ ނައިބު ރައީސް އަހުމަދު އަދީބު މި ރޯދަ މަހު ގޭ ބަންދަށް ބަދަލުކުރެވެން ނެތް ކަމަށް މޯލްޑިވްސް ކަރެކްޝަނަލް ސާވިސް އިން މިއަދު އަންގައިފި އެވެ.
އަދީބުގެ ވަކީލު މޫސާ ސިރާޖަށް ކަރެކްޝަންސް އިން ފޮނުއްވި ސިޓީގައި ބުނެފައިވަނީ އަދީބުގެ ފަރާތުން މިިދިޔަ މަހުގެ 29 ވަނަ ދުވަހު އެ އިދާރާ އަށް ފޮނުވި ސިޓީގައި ބަޔާންކޮށްފައިވާ ގޮތަށް އަދީބު ގޭ ބަންދަށް ބަދަލުކުރެވެން ނެތް ކަމަށެވެ. ނަމަވެސް އޭގެ ސަބަބެއް ނުބުނެ އެވެ.
އަދީބުގެ ވަކީލު ސިރާޖު ކޮމިޝަނާ އޮފް ޕްރިޒަންސް އަހުމަދު ޝިހާނަށް ފޮނުއްވި ސިޓީގައި ފާހަގަކޮށްފައިވަނީ ރޯދައާ ދިމާކޮށް ސަރުކާރުން ގައިދީންނަށް ލުއިތަކެއް ދެމުން އަންނަ ކަމެވެ. އޭގެ ތެރޭގައި ޓެރަރިޒަމްގެ ކުށް ސާބިތުވެފައިވާ އަދާލަތު ޕާޓީގެ ރައީސް އިމްރާން އަބްދުﷲ އާއި ކުރީގެ ޑިފެންސް މިނިސްޓަރު މުހައްމަދު ނާޒިމް ވެސް ވަނީ ރޯދަ މަހުގެ ކުރީ ދުވަހު ގޭ ބަންދަށް ބަދަލުކޮށްފަ އެވެ. އެހެންކަމުން އަދީބު ވެސް ގޭ ބަންދަށް ބަދަލުކޮށްދިނުމަށް ވަނީ އެދިފަ އެވެ.
އަދީބު ގޭ ބަންދަށް ބަދަލުކޮށްދޭން އެދިފައިވާ އިރު، އެ މަނިކުފާނަށް ސިއްހީ އެކި މައްސަލަތައް ދިމާވަމުންދާ ކަން ފާހަގަކުރި އެވެ. އޭގެ ތެރޭގައި ލޮލުގެ ނުރައްކާތެރި ބައްޔެއްކަމަށްވާ "ގްލޮކޮމާ" ޖެހިފައިވުމާއި އެތެރެ ހަށީގައި ސިސްޓެއް އުފެދިފައިވުމާއި ކިޑްނީގައި ހިލަ އުފެދިފައިވުން ހިމެނެ އެވެ. އެހެންކަމުން އަދީބުގެ އާއިލާ އިން ވަނީ ބޭސްފަރުވާ އަށް ރާއްޖެ އިން ބޭރަށް ދިއުމުގެ ހުއްދަ އަށް އެދިފަ އެވެ. ނަމަވެސް އަދިވެސް އެ ހުއްދައެއް ނުދެ އެވެ.
އަދީބު ގެންދަވަނީ ޓެރަރިޒަމާއި ކޮރަޕްޝަންގެ ތިން މައްސަލައެއްގައި 33 އަހަރުގެ ހުކުމެއް ތަންފީޒު ކުރައްވަމުންނެވެ. އަދި ވެސް އެ މަނިކުފާނަށް ތުހުމަތު ކުރެވޭ ކޮރަޕްޝަންގެ މައްސަލަތައް ދަނީ ތަހުގީގު ކުރަމުންނެވެ. ބައެއް މައްސަލަތަކުގެ އަޑުއެހުންތައް ވެސް ކްރިމިނަލް ކޯޓުގައި ކުރިއަށް އެބަ ގެންދެ އެވެ.