15 ޖޫން 2017 - 17:13
ބޮކްސިން ތެޅުމުން ރިޓަޔަކޮށްފައި ހުރި އެމެރިކާގެ ފްލޮއިޑް މޭވެދާ 100 މިލިއަން ޑޮލަރުގެ ތެޅުމެއްގައި ކޯނޯ މެކްގްރެގާއާ ވާދަކުރަން ތައްޔާރުވެ، އެކަން ރޭ އިއުލާންކޮށްފި އެވެ.
މިހާތަނަށް ޕްރޮފެޝަނަލް ބޮކްސިން ތަޅާފައިނުވާ މެކްގްރެގާ އާއި މި ޖީލުގެ ބޮކްސިންގެ އެންމެ ކާމިޔާބު ތެޅުންތެރިޔާ މޭވެދާގެ މެޗު އޮންނާނީ އޮގަސްޓް 27 ގައި ލެސް ވެގަސްގަ އެވެ.
"އެކަން ރަސްމީކޮށް ހަމަޖެހިއްޖެ." ވީޑިއޯއާ އެކު މޭވެދާ ކުރި ޓްވީޓެއްގައި ބުންޏެވެ.
އުމުރުން 40 އަހަރުގެ މޭވެދާ މިހާތަނަށް ތެޅި 49 ތެޅުމުން ވެސް އޭނާ މޮޅުވި އެވެ. ބޮކްސިން އިން ރިޓަޔަވެގެން އޭނާ ހުރީ 2015 ގައި ފިލިޕީންސްގެ މެނީ ޕެކުއޭ އާއި އޭގެ ފަހުން އެމެރިކާގެ އެންޑްރޭ ބާޓޯއާ ވާދަކޮށް މޮޅުވުމަށް ފަހު އެވެ.
މެކްގްރެގާ، 28، މީގެ ކުރިން މަޝްހޫރުވެފައި ވަނީ މިކްސްޑް މާޝަލް އާޓްސް (އެމްއެމްއޭ) ގަ އެވެ. އޭނާ ވާދަކުރަމުން އައީ އަލްޓިމޭޓް ފައިޓިން ޗެމްޕިއަންޝިޕް (ޔޫއެފްސީ) ގަ އެވެ. އެންމެ ފަހުން އޭނާ ޗެމްޕިއަންކަން ހޯދީ ޔޫއެފްސީގެ ލައިޓްވެއިޓް ބައިންނެވެ.
މެކްގްރެގާ އަކީ އެމްއެމްއޭގައި މިހާތަނަށް އެންމެ ބޮޑު އާމްދަނީއެއް ހޯދި ތެޅުންތެރިޔާ އެވެ. މި އަހަރުގެ އެންމެ މުއްސަނދި ކުޅިވަރު ޝަހުސިއްޔަތުން ހިމެނޭ ލިސްޓްގެ 24 ވަނާގައި އޭނާ އޮތީ 34 މިލިއަން ޑޮލަރުގެ އާމްދަނީއަކާ އެކުގަ އެވެ.
ދުނިޔޭގެ އެންމެ މުއްސަނދި ކުޅިވަރު ޝަހުސިއްޔަތުގެ ލިސްޓްގެ އެއް ވަނާގައި ކުރިން އޮތް މޭވެދާ އާއި މެކްގްރެގާގެ ތެޅުމުން ކޮންމެ މީހަކަށް 100 މިލިއަން ޑޮލަރު ލިބޭނެ ކަމަށް އަންދާޒާކުރެވެ އެވެ. އެހެންކަމުން މިއީ ބޮކްސިންގެ ތާރީޚުގެ އެންމެ އަގުބޮޑު އެއް މެޗަށް ވާނެކަން މިހާރު ވެސް ކަށަވަރެވެ.
މުޅިން ތަފާތު ދެ ވައްތަރެއްގެ ތެޅުމުގެ ހުނަރު ލިބިފައިވާ މި ދެ އެތުލީޓުން ވާދަވެރި މެޗަކަށް ގެންނަން ވާހަކަ ދައްކާތާ ދުވަސްތަކެއް ވެއްޖެ އެވެ.
ޔޫއެފްސީގެ ރައީސް ޑާނާ ވައިޓް ވިދާޅުވި ގޮތުގައި ކޮންމެ ކަހަލަ ތެޅުންތެރިޔަކާ ވެސް ކުރިމަތިލާން މެކްގްރެގާ ހުރީ ތައްޔާރަށެވެ.
"ފްލޮއިޑް މޭވެދާއާ ތަޅާކަށް އޭނާ ޖެހިލުމެއް ނުވާނެ،" ވައިޓް ވިދާޅުވި އެވެ.
މި ތެޅުން ރާވާ ފަރާތްތަކުން ލަފާކުރާ ގޮތުގައި މީގެ ކުރިން ފައިސާ ދައްކައިގެން ވަގުތުން ޓީވީން ބަލާފައިނުވާހާ ގިނަ އަދަދެއްގެ ބަޔަކު މި ތެޅުން ބަލާނެ އެވެ. އެ ރެކޯޑް މިހާރު އޮތީ 4.6 މިލިއަންއާ އެކު މޭވެދާ އާއި ޕެކްއޭ ތެޅުމަށެވެ.
"މިއީ ތެޅުމުގެ ކުޅިވަރުގެ ތާރީޚުގައި އެންމެ ބޮޑު މެޗަށް ވާނެކަމާ މެދު ޝައްކެއް ނެތް،" ވައިޓް ވިދާޅުވި އެވެ.
މޭވެދާ ޕްރޮމޯޝަންސްގެ ޗީފް އެގްޒަކަޓިވް ލިއޮނާޑް އެލަބީ ވިދާޅުވީ މޭވެދާ އާއި މެކްގްރެގާގެ މެޗަށް ވަރަށް ގިނަ ބަޔަކު ޝައުގުވެރިކަން ހުރި ކަމަށެވެ.
"މޭވެދާ ދާ ކޮންމެ ތަނެއްގައި މީހުން އަހާ ކޮން އިރަކުންހޭ މެކްގްރެއާއާ ތަޅާނީ،" އެލަބީ ވިދާޅުވި އެވެ.
ދެ ތެޅުންތެރިންނަކީ ވެސް އޭގެ ޒާތުގައި ވަރަށް ނުރައްކާތެރި ހަމަލާތައް، އިދިކޮޅު ތެޅުންތެރިޔާ އަށް ދޭ ބައެކެވެ. މެކްގްރެގާ ވަނީ "އެންމެ 30 ސިކުންތުގެ ތެރޭގައި" މޭވެދާ "މަރާ ވައްޓާލާނެ" ކަމަށް ކުރިން ބުނެފަ އެވެ.