19 ޖޫން 2017 - 08:11
ޝާހްރުކްގެ މިހާރު ރިލީޒްކުރަން ތައްޔާރުވަމުން އަންނަ "ޖަބް ހެރީ މެޓް ސޭޖަލް" އަށް ނަން ދިން ރަންބީރު ކަޕޫރަށް އޭގެ ބަދަލުގައި ޝާހްރުކް 5000 ރުޕީސް ދީފި އެވެ. އެއީ އެ ފިލްމުގެ ޓީމުން ދޭން ވައުދުވެފައިވާ ހަދިޔާ އެއް ކަމަށްވެ އެވެ.
ފައިސާ ދެނިކޮށް ނަގާފައިވާ ފޮތޯއާ ޝާހްރުކްގެ ޓުވީޓްގައި މި ފައިސާގެ އެއްބައި ޕްރޮޑިއުސަރު-ޑައިރެކްޓަރު ކަރަން ޖޯހަރަށް ދޭން އެދިފައިވެ އެވެ. ސަބަބަކީ ފިލްމުގެ ނަމުގެ "ޖަބް" އެ ލަފުޒަކީ ކަރަން ދިން ޚިޔާލަކަށް ވާތީ އެވެ.
"ޖައްގާ ޖާސޫސް. މިހާރު ދެ މީހުންގެ ހިސާބު ބަރާބަރު ވެއްޖެ. ޖޭއެޗްއެމްއެސް (ޖަބް ހެރީ މެޓް ސޭޖަލް) ގެ 'ޖަބް' ގެ ބަޔަށް ކަރަން ޖޯހަރަށް ދޭން ޖެހޭ ހިއްސާ އޭނާއަށް ދޭތި،" ޝާހްރުކް ގެ ޓުވީޓްގައި ބުނެފައިވެ އެވެ.
މި ސަމާސާގައި ކަރަން ޖޯހަރް ވެސް ވަނީ ޓުވީޓްކޮށްފަ އެވެ. ކަރަންގެ ޓުވީޓްގައި ބުނެފައި ވަނީ ރަންބީރު އޭނާއަށް މިހާރު 1250 ރުޕީސް ދޭން ޖެހިފައިވާ ކަމަށާއި އެ ފައިސާ އަށް އިންތިޒާރުކުރަމުން އަންނަ ކަމަށެވެ.
މި މަޖާ ފެށުނީ ފިލްމަށް ކީ ނަމަކީ އޭނާ ދިން ޚިޔާލަކަށް ކީ ނަމެއް ކަމަށް ރަންބީރު ބުނި ހިސާބުންނެވެ. މިކަމަށް ސޯޝަލް މީޑިއާ މީހުން ދިން ސަމާލުކަން ބޮޑުވުމުން މިއީ ފިލްމުގެ ޕްރޮމޯޝަނަށް ރަނގަޅު ކަމެއްގެ ގޮތުގައި ވިސްނި ޝާހްރުކް މިކަން ކުރިއަށް ގެންދިޔައީ އެވެ.
އެންމެ ކުރިން ފިލްމުގެ ނަން ހާމަކުރުމުގެ ގޮތުން މިދިޔަ ހަފުތާގައި ޝާހްރުކް ކުރި ޓުވީޓްގައި ބުނެފައިވަނީ ރަންބީރު ފަހަރެއްގައި އެ ފިލްމަށް ކިޔާފައިވަނީ އޭނާ ދިން ނަމެކޭ ބުނެފާނެ ކަމަށާއި ނަަމަވެސް އެއީ ރަންބީރު ދިން ނަމެއް ނޫން ކަމަށެވެ. އެހެންވެ އޭނާއަށް 5000 ރުޕީސް ނުލިބޭނެ ކަމަށް ބުންޏެވެ. ނަމަވެސް ކުއްލިއަކަށް އިއްޔެ އޭނާ ރަންބީރަށް އެފައިސާ ދިން ސަބަބެއް ހާމަކޮށްފައެއް ނެތެވެ.
އަންނަ އޮގަސްޓް މަހުގެ 4 ވަނަ ދުވަހު ރިލީޒްކުރަން ހަމަޖެހިފައިވާ އިމްތިޔާޒު އަލީ ޑައިރެކްޓްކޮށްފައިވާ "ޖަބް ހެރީ މެޓް ސޭޖަލް" ގެ ބަތަލާ އަކީ އަނުޝްކާ ޝަރުމާ އެވެ. މި ފިލްމުގެ ޕްރޮމޯޝަނަށް މި ނޫން ވެސް ވަރަށް ޚާއްސަ ބައެއް ކަންތައްތައް ކުރުމަށް ޝާހްރުކް އަންނަނީ ތައްޔާރުވަމުންނެވެ. އެގޮތުން ސޭޖަލް ކިޔާ މީހުން އެންމެ ގިނައިން އިންޑިއާގައި އުޅޭ ސިޓީއަކަށް ޝާހްރުކް ޒިޔާރަތް ކުރާނެ ކަމަށާއި އެ ނަން ކިޔާ މީހުން އޭނާއަށް މެސެޖް ކުރަމުން ގެންދިއުމަށް ވެސް ޝާހްރުކް އެދިފައިވެ އެވެ.
ޝާހްރުކް އިންސްޓަގްރާމް ކޮށްފައިވާ މި ވީޑިއޯގައި އޭނާ ވަނީ "ދިލް ލަގީ ކުޅީ ގުޖްރާތުކީ" އެ ލަވަ ވެސް ކިޔާފަ އެވެ. އޭނާ ބުނި ގޮތުގައި މިއީ އޭނާގެ ފިލްމުގެ ލަވައެއް ނޫނެވެ. ނަމަވެސް ހަރިންދުރަ ސިންގް ނެހްރާ ނުވަތަ ހެރީ އަކީ ލަވަކިޔުންތެރިއަކަށް ވާހިތުން އުޅޭ މީހަކަށް ވާތީ އެ ލަވަ ކިޔާލީ ކަމަށް ބުންޏެވެ. ސޭޖަލް އާއި ހެރީ ބައްދަލުވާ ކޮންމެ ފަހަރަކުވެސް ވަރަށް މަޖާ ކަންތައްތަކެއް ދިމާވާ ކަމަށް ވެސް ޝާހްރުކް ބުނެފައިވެ އެވެ.