19 ޖޫން 2017 - 11:47
އީރާނުގެ އިންގިލާބީ ލަޝްކަރުން ސީރިޔާގެ ސަރަހައްދުގެ އެތެރޭގައިވާ އަމާޒުތަކަކަށް މިސައިލް ހަމަލާތަކެއް ދީފި އެވެ.
އީރާނުން ބުނި ގޮތުގައި ބިމުން ބިމަށް ހަމަލާ ދޭ ޒާތުގެ މިސައިލް ބޭނުންކޮށްގެން ހަމަލާ ދިނީ، ސީރިޔާގައި ހަރަކާތްތެރިވާ އިސްލާމިކް ސްޓޭޓް (އައިއެސް)ގެ އަމާޒުތަކަކަށެވެ. އެއީ މި މަހުގެ ކުރީކޮޅު އީރާންގެ ގާނޫނު ހަދާ މަޖިލީހުގެ ތެރޭގަ އާއި އާޔަތުﷲ ޚުމައިނީގެ މަގްބަރާ ކައިރީގައި ދިން ހަމަލާތަކަށް ބަދަލު ހިފުމުގެ ގޮތުންނެވެ.
ސީރިޔާގެ ތެރެއަށް ހަމަލާ ދިނުމަށް ފަހު އީރާނުން ނެރުނު ބަޔާނެއްގައި ބުނި ގޮތުގައި އީރާންގެ އެއްވެސް މަސްލަހަތަކަށް ލޮޅުމެއް އަރުވައިފި ކޮންމެ ބަޔަކާ ދެކޮޅަށް ކުރިމަގުގައި ވެސް އެކަށީގެންވާ ގޮތަކަށް އީރާނުން ޖަވާބުދާރީ ވާނެ އެވެ.
އީރާނުން ބުނި ގޮތުގައި މެދުރާސްތާގެ މިސައިލް ބޭނުންކޮށްގެން ހަމަލާ ދިނީ، ސީރިޔާގެ ދޭރުއް ޒޫރް ސަހަރުގައި އައިއެސްގެ ހަނގުރާމަވެރިން ތިބި މަރުކަޒަކަށެވެ. އީރާނުން ބުނި ގޮތުގައި ސީރިޔާ އަށް ހަމަލާ ދިން މިސައިލްތައް ފޮނުވައިލީ ސީރިޔާއާ ކައިރީގައިވާ އީރާންގެ ސަރަހައްދަކުންނެވެ.
ސީރިޔާ ހަނގުރާމައިގައި އީރާނުން ސީރިޔާ ސަރުކާރަށް ތާއީދު ކުރި ކަމުގައި ވިޔަސް، މިހާތަނަށް އަމަލީ ގޮތުން މި ހަނގުރާމައިގައި އީރާން ބައިވެރިއެއް ނުވެ އެވެ. އަދި މިއީ އީރާނުން ސީރިޔާގެ އެތެރޭގައިވާ ސަރަހައްދަކަށް ހަމަލާ ދިން ފުރަތަމަ ފަހަރެވެ.
ސީރިޔާގެ ދޭރުއް ޒޫރް ސަހަރަކީ އައިއެސްގެ ހަނގުރާމަވެރިންގެ އިތުރުން ގިނަ އަދަދެއްގެ އާންމުން ވެސް ދިރިއުޅޭ ސަރަހައްދެކެވެ. އީރާންގެ މި ހަމަލައާ ގުޅޭ ގޮތުން ސީރިޔާގެ އެއްވެސް ފަރާތަކުން އެއްޗެއް ނުބުނެ އެވެ.
މި މަހުގެ 7 ވަނަ ދުވަހު އީރާންގެ ގާނޫނު ހަދާ މަޖިލީހަށާއި އާޔަތުﷲ ޚުމައިނީގެ މަބްގަރާ ކައިރީގައި ދިން ހަމަލާގައި 17 މީހަކު މަރުވެ އިތުރު 50 މީހަކު ޒަޚަމްވި އެވެ. އީރާނުން ތުހުމަތު ކުރާ ގޮތުގައި އެ ހަމަލާ ދިނީ އައިއެސްގެ ހަނގުރާމަވެރިންނެވެ.