20 ޖޫން 2017 - 08:18
އިނގިރޭސި ވިލާތުގެ މީހެއް ކަމަށްވާ ކްރިސްޓީން ސްޓޯން ބަނޑުބޮޑުކަން އެނގުނު ވަގުތު އެ ވާހަކަ މަންމަ ގާތު ބުނަން ބޭނުންވި އެވެ. ނަމަވެސް އޭނާގެ މަންމަ އަކީ އަލްޒައިމާޒް ޑިޒީޒް ނުވަތަ ހަނދާން ނެތޭ ބަލި ޖެހިފައިވާ މީހަކަށް ވާތީ މަންމަ ގާތު އެ ވާހަކަ ބުނާ ވަގުތަކީ ވެސް ތާރީޚީ ވަގުތުކޮޅަކަށް ހަދަން އޭނާ ބޭނުންވި އެވެ.
އެހެންވެ ހަތަރު ދުވަސް މަތިން ކޮންމެ ދުވަހަކު އެއްފަހަރު، 77 އަހަރުގެ މަންމަ ކައިރީގައި އެ ވާހަކަ ބުނާ މަންޒަރު ކްރިސްޓީން ވީޑިއޯ ކުރި އެވެ. ކޮންމެ ދުވަހަކުވެސް ކްރިސްޓީން އޭނާގެ މަންމަ ކައިރީ އެވާހަކަ ބުނާއިރަށް އުފަލުން ހޭން ފަށާފައި އަތްތިލަބަޑި ޖަހަން ފަށަ އެވެ.
ކްރިސްޓީން ބަނޑުބޮޑު ވާހަކަ ބުނާ ކޮންމެ ފަހަރަކު އޭނާގެ މަންމަ ސެޓްސޫކޯ، ވިހަނީ ކޮން އިރަކުންތޯ އަހަ އެވެ. އަދި ވަރަށް އުފާވެއްޖޭ ކިޔާފައި ވަރަށް އުފަލުން އުޅެ އެވެ.
އެމެރިކާގެ ސައުތު ކެރޮލައިނާގެ ފްލޯރެންސްގައި ދިރިއުޅޭ ކްރިސްޓީން ބުނި ގޮތުގައި ބަނޑުބޮޑު ވާހަކަ ކޮންމެ ދުވަހަކު ކިތަންމެ ފަހަރަކު ބުންޏަސް ފުރަތަމަ ފަހަރަށް އެ ވާހަކަ އިވުނީމަ ހަދާ ގޮތްތައް މަންމަ ތަކުރާރުކޮށް ހަދަ އެވެ. އެހެންވެ މަންމަ ގާތު އެ ވާހަކަ އަބަދު ބުނަން އޭނާ ވަރަށް ހިތްހަމަޖެހެ އެވެ.
"އަހަރެން ބަނޑުބޮޑު ވާހަކަ މަންމަ ގާތު ބުނާތާ ދެ މިނިޓް ފަހުން އަނެއްކާ އެ ވާހަކަ ބުންޏަސް މަންމަ ހައިރާންވޭ. އަދި އުފަލުން ގޮސް ހީނ އަތްތިލަބަޑި ޖަހާނެ،" ކްރިސްޓީން ބުންޏެވެ.
އޭނާ ބުނި ގޮތުގައި މި ވީޑިއޯ އޭނާ ތައްޔާރުކޮށްފައިވަނީ ބަނޑުގައި އޮތް އަންހެންދަރިފުޅަށެވެ. އެ ދަރިފުޅު ބޮޑުވެގެން މި ވީޑިއޯ ބަލާފައި އޭނާގެ މާމަ އޭނާ އަންނަން އުޅޭތީ އުފާވި މިންވަރު ދައްކާލުމަށެވެ.
ސެޓްސޫކޯ އަށް ހަނދާންނެތޭ ބަލި ޖެހުނީ މީގެ އަށެއްކަ އަހަރު ކުރިންނެވެ. އޭރުއްސުރެ އޭނާ ބެލެހެއްޓުމުގައި 24 ގަޑިއިރު ހޭދަކުރަނީ ފިރިމީހާ ބޮބް، 69، އެވެ.
މިހާރު ކްރިސްޓީންގެ ބަނޑަށް 20 ހަފުތާ ފުރިފައިވާއިރު ހަފުތާ ބަންދުގައި މަންމަ ބެލެހެއްޓުމުގެ ޒިންމާ އުފުލަނީ އޭނާ އެވެ. އެއީ ބައްޕައަށް ލުއިކޮށްދިނުމަށެވެ.
ކްރިސްޓީން ބުނި ގޮތުގައި މި ވީޑިއޯ ފެނިފައި އޭނާގެ ބައްޕަ ވަރަށް ދެރަވެ އެވެ. ނަމަވެސް އޭނާގެ މަންމަ އުފަލުން އުޅޭގޮތް ފެނިފައި ހިތްހަމަޖައްސާލަނީ އެވެ.
ކްރިސްޓީންގެ މަންމަގެ ޝޯޓް ޓާމް މެމޮރީ އަށް ވަނީ ވަރަށް ބޮޑަށް އަަސަރުކޮށްފަ އެވެ. އެހެންވެ ކައި ނިމިގެން އެއް މިނިޓް ވާއިރަށް ކޭ ކަން ހަނދާނެއް ނުހުރެ އެވެ. އަދި ފާޚާނާ ހުންނަ ތަން ވެސް ހަނދާނެއް ނުހުރެ އެވެ. އެހެންވެ ކްރިސްޓީންގެ މަންމަ ގެންގުޅުން އޭނާގެ ބައްޕައަށް ވަރަށް ބުރަ ކަމަކަށް ވަނީ ވެފަ އެވެ.
"މާކުރީގެ ވާހަކަތައް މަންމަ ވަރަށް ރަނގަޅަށް ހަނދާން ހުރޭ. ނަމަވެސް މިހާރު ވާ ކަންތައްތައް ހަނދާން ނެތި އަބަދު އަބަދު އެއް ސުވާލެއް ކޮށްފާނެ. އެހެންވެ ވަރަށް ދެރަވޭ. ނަމަވެސް މަންމައަކީ ވަރަށް ޕޮޒިޓިވް ވިސްނުމެއް ގެންގުޅޭ މީހެއް،" ކްރިސްޓީން ބުންޏެވެ.
ހަނދާން ނެތޭ ބަލި ޖެހިފައިވާ 46.8 މިލިއަން މީހުން މިހާރު ދުނިޔޭގައި އެބަތިއްބެވެ.